ရေရှည်အစီအစဉ်မှာ တိုက်စစ်ဘယ်နေရာမှာကစားရမလဲဆိုတာ မသိရှိကြောင်း လီဗာပူး တိုက်စစ်ကစားသမား ဂတ်ပိုကပြောပါတယ်။

ဟော်လန်တိုက်စစ်မှူးဟာ ပွဲစဉ်တိုင်းလိုလိုမှာ ဗဟိုတိုက်စစ်မှူးနေရာမှာ ကစားနေရပေမဲ့ ရေရှည်အစီအစဉ်မှာတော့ နည်းပြယာဂန်ကလော့ပ်ကသာ သိရှိနိုင်ကြောင်း ဂတ်ပိုက ပြောပါတယ်။

ဗဟိုတိုက်စစ်မှူးနေရာမှာကစားရတာက အလေ့အကျင့်တောင်ဖြစ်နေပေမဲ့ ရေရှည်အစီအစဉ်မှာ ဘယ်နေရာမှာကစားရမလဲဆိုတာကတော့ နည်းပြ ယာဂန်ကလော့ပ်ကိုသာ မေးမြန်းသင့်ကြောင်း ဂတ်ပိုက ပြောပါတယ်။

ဂတ်ပိုဟာ  တိုက်စစ်မှူးနေရာအပြင် ဘယ်တောင်ပံနဲ့ နောက်ချန်တိုက်စစ်မှူး နေရာတွေမှာလည်း ကစားနိုင်ပါတယ်။

သူဟာ အသင်းကို စတင်ရောက်ရှိချိန်မှာရုန်းကန်ခဲ့ရပြီး ဖေဖော်ဝါရီနဲ့ မတ်လအတွင်းမှာ ၄ ဂိုးသွင်းခဲ့ပေမဲ့ နောက်ဆုံးလေးပွဲ ဆက်တိုက်ဂိုးပေါက်ပျောက်ဆုံးခဲ့ပြန်ပါတယ်။

ဟော်လန်တိုက်စစ်မှူး ဂတ်ပို အနေနဲ့ လီဗာပူးအသင်းဆီ ပြောင်းရွှေ့ခဲ့တာဟာ အချိန်စောနေသေးကြောင်း နည်းပြ ရော်နယ်ကိုးမန်းက ပြောပါတယ်။

အသက် ၂၃ နှစ်ရှိ တိုက်စစ်မှူး ဂတ်ပိုဟာ ကမ္ဘာ့ဖလားပြိုင်ပွဲမှာ ခြေစွမ်းပြသနိုင်ခဲ့ပြီးနောက် လီဗာပူးအသင်းက ခေါ်ယူခဲ့တာပါ။

ဂတ်ပိုဟာ လီဗာပူးနဲ့ ပြိုင်ပွဲစုံ ၆ ပွဲ ကစားအပြီးမှာ ဂိုးသွင်းယူနိုင်ခြင်းမရှိလို့ ဝေဖန်ခံနေရတာပါ။ ဂတ်ပိုလို လူငယ်တိုက်စစ်မှူးတဦးအတွက် ပရီးမီးယားလိဂ်ပြိုင်ပွဲဟာ ခက်ခဲကြမ်းတမ်းနေမှာဖြစ်ပြီး အသက် ၂၈ နှစ်ခန့်အရွယ်၊ အတွေ့အကြုံရှိတဲ့ ကစားသမား ဆိုရင်သာ အဆင်ပြေနိုင်ကြောင်း ဟော်လန်နည်းပြ ကိုးမန်းက ပြောပါတယ်။

ဂိုးလည်းမသွင်းနိုင်၊ အသင်းကလည်း ရှုံးပွဲတွေ့နေချိန်တွေဟာ လူငယ်ကစားသမားတွေ အလွန်ခက်ခဲတဲ့အချိန်ဖြစ်ကြောင်း၊ အင်္ဂလန်ပရီးမီးယားလိဂ်ရဲ့ အဆင့်အတန်းက ဟော်လန်လိဂ်ထက် ပိုပြီးမြင့်မားကြောင်း နည်းပြ ရော်နယ်ကိုးမန်းက ပြောသွားပါတယ်။

ဂတ်ပိုဟာ လီဗာပူးဆီ မပြောင်းရွှေ့ခင်က ပီအက်စ်ဗွီနဲ့ ၁၄ ပွဲမှာ ၉ ဂိုးသွင်းပြီး ၁၂ ကြိမ် ဂိုးဖန်တီးမှု ပြုလုပ်နိုင်ခဲ့ပါတယ်။