ကာတာကမ္ဘာ့ဖလားပြိုင်ပွဲကျင်းပချိန်မှာ ဆေးရုံတက်နေရတဲ့ ဘရားဇီး ဘောလုံးအကျော်အမော် ဂန္တဝင်ကစားသမားဟောင်း ပီလီဟာ အသက်ရှူ လမ်းကြောင်း ဆိုင်ရာ ရောဂါပိုးကူးစက်ခံထားရပေမယ့် အခြေအနေတည်ငြိမ်နေဆဲပဲလို့ ဒီဇင်ဘာ ၂ ရက်က ဆာပေါ်လိုမြို့ အဲလ်ဘတ်အိုင်းစတိုင်းဆေးရုံက ထုတ်ပြန်ထားပါတယ်။ 

ပီလီဟာ ရောဂါ ကူးစက်မှုအတွက် ပိုးသတ်ဆေးတွေနဲ့ ကုသနေသလို တုံ့ပြန်မှုလည်းရှိတယ်လို့ ဆိုပါတယ်။  အသက် ၈၂ နှစ်အရွယ် ပီလီဟာ ဆေးကုသမှု ဆက်လက်ခံယူဖို့ ဆေးရုံမှာ ရက်အနည်းငယ် နေရဦးမယ်လို့ သူရဲ့ကျန်းမာရေးဝန်ထမ်းက ပြောပါတယ်။ 

ဂန္တဝင်ဘောလုံးကစားသမားကြီးဟာ ၂၀၂၁ ခုနှစ် စက်တင်ဘာလမှာ အူမကြီးထဲက အကျိတ်ကို ဖယ်ရှားပြီးနောက် ကင်ဆာရောဂါကုသမှုအတွက် ပြန်အကဲဖြတ်မှု ဆောင်ရွက်ဖို့ နိုဝင်ဘာ ၂၉ ရက် မှာ ဆေးရုံတက်ခဲ့တာပါ။ 

ပြီးခဲ့တဲ့ ကြာသပတေးနေ့တုန်းက ဒီရှေ့တန်းတိုက်စစ်မှူးဟောင်းဟာ အပြုသဘောဆောင် အားပေးတဲ့ မက်ဆေ့ချ်တွေ လက်ခံရရှိခဲ့တာကြောင့် အားပေးသူပရိသတ်ကို ကျေးဇူးတင်ရှိ ကြောင်း ဖော်ပြပြီး အင်စတာဂရမ်မှာ ဓာတ်ပုံတင်ခဲ့ပါတယ်။ 

ESPN ဘရာဇီးလ်ရဲ့  သတင်းဖော်ပြချက်ထဲမှာတော့ ပီလီဟာ "သာမန်ရောင်ရမ်း"မှုကြောင့် ဆေးရုံတက်ခဲ့ရတာဖြစ်ပြီး သူရဲ့ ကျန်းမာရေးအခြေအနေအတွက် အသေးစိတ် ဆေးစစ်မှုတွေ လုပ်နေတယ်လို့ သမီးဖြစ်သူ နာဆီမန်တိုက အင်စတာဂရမ်မှာ မှတ်ချက်ပေးထားပါတယ်။ 

အွန်လိုင်းပေါ်က အလွဲသုံးစားလုပ်မှုတွေတွေကို ကိုင်တွယ်ရေး ဆိုရှယ်မီဒီယာလုပ်ငန်းရှင် ကုမ္ပဏီတွေ ပိုဆောင်ရွက်ရမယ်လို့ ပြင်သစ်ဘောလုံးသမားဟောင်း အာဆင်နယ်အသင်းရဲ့ ဂန္တဝင်တိုက်စစ်မှူး အွန်နရီက နိုဝင်ဘာ ၂ ရက်မှာ ပြောပါတယ်။

လူမှုကွန်ရက်လုပ်ငန်းကြီးတွေကိုလည်း သူက ပြင်းပြင်းထန်ထန် ဝေဖန်လိုက်ပြီး လူမျိုးရေး ခွဲခြားမှုနဲ့ အနိုင်ကျင့်မှု တိုက်ဖျက်ရေး အရေးယူဆောင်ရွက်တာ ကင်းမဲ့တာကို ဆန့်ကျင်တဲ့အနေနဲ့ ဒီနှစ်အစောပိုင်းကစပြီး လူမှုကွန်ရက် သုံးစွဲမှုကို သူက စွန့်လွှတ်ခဲ့တာပါ။

Facebook ၊ Instagram နဲ့ Twitter လူမှုကွန်ရက်တွေပေါ်မှာ ပရိသတ် ၁၅ သန်းလောက် ရှိတဲ့ အွန်နရီဟာ မတ်လက သူ့အကောင့်ကို ပိတ်ခဲ့ပါတယ်။

ဉာဏပစ္စည်း မူပိုင်ခွင့် ချိုးဖောက်မှုအတွက် အရေးယူရေး အားထုတ်သလောက် အလားတူ အားထုတ်မှုတွေနဲ့ အွန်လိုင်းပေါ်က အလွဲသုံးစားမှုတွေကို ကိုင်တွယ်ဖြေရှင်းဖို့ လူမှုကွန်ရက် လုပ်ငန်းကြီးတွေကို သူက ဆော်ဩခဲ့ပါတယ်။

အာဆင်နယ်နဲ့ ဘာစီလိုနာအသင်းတွေမှာ ကစားခဲ့တဲ့ ဘောလုံးသမား အွန်နရီဟာ သူ့ ဘောလုံးသမား သက်တမ်းတလျှောက် လူမျိုးရေး အလွဲသုံးစားမှုတွေကို ခံခဲ့ရပြီး ခုတော့ လူမှုကွန်ရက် မီဒီယာတွေကို စွန့်ခွာခဲ့တာ ၆ လ ရှိပါပြီ။

အခြေအနေက အရင်အတိုင်း ဖြစ်လို့ သူဟာ တကိုယ်ရေ လူမှုကွန်ရက်အကောင့်တွေကို ဘယ်တော့မှ ပြန်မသုံးဘဲ နေကောင်းနေမယ်လို့လည်း ပြောပါတယ်။

“လူမှုကွန်ရက် မီဒီယာတွေဟာ ကျနော်တို့နေတဲ့ ကမ္ဘာကြီးထဲက လိုအပ်တဲ့ ကိရိယာတွေပါ။ ဒါပေမဲ့ ဘေးကင်းနိုင်ရဲ့လား။ ဒါဟာ ကိစ္စကြီးတရပ်ပါ” လို့ အွန်နရီက ပြောပါတယ်။

ခုတော့ သူဟာ အားကစားဝတ်စုံ ရောင်းချတဲ့ ကမ္ဘာကျော်ကုမ္ပဏီ ပူးမားနဲ့အတူ သုံးစွဲသူတွေဟာ မေတ္တာရပ်ခံတာကနေ ဆန္ဒပြကန့်ကွက်တာအထိ လုပ်ငန်းတွေမှာ ပါဝင်လုပ်ဆောင်ခြင်းအားဖြင့် လူသားတွေကို ကောင်းကျိုးပြုဖို့ အားပေးတဲ့ ပလက်ဖောင်းတခု ဖြစ်စေရေး အပါအဝင်  အွန်လိုင်း အလွဲသုံးစားမှုတွေကို ဖြေရှင်းရေးအတွက် နည်းလမ်းတွေကို ရှာရာမှာ လက်တွဲ ပါဝင်နေပါတယ်။