ကာတာစီးပွားရေးလုပ်ငန်းရှင်တွေဟာ မန်ယူအသင်းကိုဝယ်ယူဖို့ အပြိုင်အဆိုင် ကြိုးပမ်းနေကြပြီး ကမ်းလှမ်းမှုတွေ စတင်တော့မယ်လို့ ဒေးလီးမေးလ်သတင်းမှာ ဖော်ပြပါတယ်။
ကာတာလုပ်ငန်းရှင်တွေဟာ ပီအက်စ်ဂျီအသင်းကိုပိုင်ဆိုင်တဲ့ ကာတာရင်းနှီးမြှုပ်နှံမှုအုပ်စုနဲ့ သက်ဆိုင်မှုမရှိဘဲ တဦးချင်း ကြွယ်ဝချမ်းသာသူတွေ ဖြစ်တယ်လို့ ဆိုပါတယ်။
ဒီလိုအခြေအနေကြောင့် မန်ယူအသင်းကိုဝယ်ယူဖို့ ကြိုးပမ်းရာမှာ ပီအက်စ်ဂျီအသင်းရဲ့ ပိုင်ဆိုင်သူတွေနဲ့ ပတ်သက်ပြီး ပြဿနာတစုံတရာ မရှိနိုင်ဘူးလို့ ယုံကြည်နေကြတာပါ။
မန်ယူအသင်းကို ဝယ်ယူနိုင်မယ်ဆိုရင် နည်းပြတန်ဟတ်ဂ်အတွက် အပြောင်းအရွှေ့မှာ ကစားသမားကောင်းတွေကို ခေါ်ယူခွင့်ပေးသွားဖို့ ရည်ရွယ်ထားတယ်လို့ သိရပါတယ်။
မန်ယူအသင်းကို ပိုင်ရှင် ဂလေဇာမိသားစုက အရောင်းစာရင်းတင်ထားပြီး ပေါင် ၆ ဘီလီယံလောက်ရဖို့ အလိုရှိပါတယ်။
မန်ချက်စတာယူနိူက်တက် အသင်းကို အသင်းပိုင်ရှင် ဂလေဇာ မိသားစုက ရောင်းချဖို့ စဉ်းစားနေတယ်လို့ အသင်းက ထုတ်ပြန်ပါတယ်။
အသင်းအနေနဲ့ ဗျုဟာမြောက် ရွေးချယ်စရာတွေကိုလည်း ထည့်သွင်း စဉ်းစားမယ်လို့ ဆိုထားပါတယ်။
အဲဒီထဲမှာ အသင်းကို ရင်းနှီးမြှပ်နှံမှု အသစ်တွေ လုပ်တာ၊ ရောင်းချတာနဲ့ ကုမ္ပဏီနဲ့ ပတ်သက်တဲ့ လွှဲပြောင်းတာတွေ ပါဝင်တယ်လို့ ထုတ်ပြန်ချက်မှာ ဖော်ပြထားပါတယ်။
အမေရိကန်ဘီလျံနာ ဂလေဇာ မိသားစုဟာ မန်ယူနိုက်တက်ကို ဒေါ်လာ ၁ ဒသမ ၃၄ ဘီလီယံနဲ့ ၂၀၀၅ ခုနှစ်မှာ ဝယ်ယူခဲ့တာပါ။
အသင်းကို စဝယ်တုန်းကတည်းက ပရိတ်သတ်တွေက ဂလေဇာမိသားစုကို ဆန့်ကျင်ကန့်ကွက် ဆန္ဒပြတာတွေ အခုအချိန်အထိ အကြိမ်ကြိမ် လုပ်ခဲ့ပါတယ်။
အသင်းနဲ့ လမ်းခွဲသွားပြီဖြစ်တဲ့ တိုက်စစ်မှူး ရော်နယ်ဒိုကလည်း ဂလေဇာ မိသားစုဟာ ယူနိူက်တက်ကို ဂရုစိုက်မှု မရှိတာကြောင့် ထိပ်တန်းအသင်းအဆင့် ပြန်ရောက်ဖို့ ခက်ခဲကြောင်း ဝေဖန်အပြီးမှာပဲ အသင်းကို ရောင်းချဖို့ ပိုင်ရှင်ဘက်က စဉ်းစားလာတာပါ။
ဂလေဇာ မိသားစုဟာ မန်ယူအသင်းရဲ့ ရှယ်ယာ ၁၀ ရာခိုင်နှုန်းလောက်ကိုတော့ ၂၀၁၂ မှာ ရောင်းချထားပါတယ်။
