မန်ယူအသင်းဟာ ဂိုးသမားဒီဂီယာကို ရောင်းချဖြစ်မယ်ဆိုရင် စပိန်ဂိုးသမား အူနိုင်းဆီမွန်နဲ့ ပေါ်တူဂီဂိုးသမား ဒီယေဂိုကော်စတာတို့ကိုခေါ်ယူဖို့ ပစ်မှတ်ထားနေပါတယ်။

စပိန်ဂိုးသမား ဒီဂီယာဟာ အခုနှစ်ရာသီအကုန်မှာစာချုပ်သက်တမ်းကုန်ဆုံးတော့မှာပါ။ မန်ယူအသင်းဘက်က စာချုပ်သက်တမ်းတိုးဖို့ ကမ်းလှမ်းမယ်လို့ သတင်းထွက်ပေါ်နေပေမဲ့ လက်ရှိလုပ်ခလစာ အတိုင်းခံစားခွင့်ပေးမှာမဟုတ်ဘဲ လုပ်ခလျှော့ချပြီး ကမ်းလှမ်းမှာပါ။

ဒီဂီယာဟာ တစ်ပတ်လုပ်ခပေါင် ၃၇၅၀၀၀ ရရှိနေပြီး စာချုပ်သစ်မှာတော့ လုပ်ခလျှော့ချသွားမယ်လို့ The Athletic သတင်းမှာဖော်ပြပါတယ်။

အဆင်မပြေခဲ့ရင်တော့ လာလီဂါကလပ် ဘီလ်ဘာအိုအသင်းက စပိန်လက်ရွေးစင် ဂိုးသမား အူနိုင်းဆီမွန်နဲ့ ပေါ်တိုဂိုးသမား ကော်စတာတို့ကို ကမ်းလှမ်းသွားဖို့ ပစ်မှတ်ထားနေပါတယ်။

နည်းပြအဲရစ်တန်ဟတ်ဂ်ဟာလည်း ဂိုးသမားဒီဂီယာရဲ့ စွမ်းဆောင်ရည် အပေါ် ကျေနပ်အားရမှု မရှိတာကြောင့် ဂိုးသမားသစ်တစ်ဦး အပြောင်းအလဲလုပ်လိုတယ်လို့သိရပါတယ်။

မန်ယူအသင်းဟာ ပြီးခဲ့တဲ့ရာသီက ပေးဂိုးစံချိန်တင်ခဲ့ပေမယ့် ဂိုးသမားဒီဂီယာက အသင်းရှိ ကစားသ မားတွေက ရွေးချယ်တဲ့ အကောင်းဆုံးကစားသမားဆု ရရှိသွားပါတယ်။

ယူနိုက်တက်ဟာ ပြီးခဲ့တဲ့ရာသီက ပေးဂိုး ၅၇ ဂိုးအထိ ခွင့်ပြုခဲ့ရပြီး အဆိုးရွားဆုံး ပေးဂိုးအရေအတွက်အဖြစ် မှတ်တမ်းဝင်ခဲ့ပေမယ့် ဂိုးသမားဒီဂီယာဟာလည်း ဂိုးပေါက်ကာကွယ်မှုတွေ အမြောက်အမြားပြုလုပ်နိုင်ခဲ့တာပါ။

ပြီးခဲ့တဲ့ရာသီ ပရီးမီးယားလိဂ် ၃၈ ပွဲမှာ ၈ ပွဲသာ ဂိုးမပေးခဲ့ရတဲ့ပွဲဖြစ်ခဲ့ပြီး ပွဲ ၃၀ မှာ ဂိုးတွေခွင့်ပြုခဲ့ရတာပါ။

ဒီဆုဟာ ဒီဂီယာအတွက် အသင်းဖော်တွေကရွေးချယ်ချီးမြှင့်တဲ့ ၄ ကြိမ်​မြောက် တစ်နှစ်တာ အကောင်းဆုံးကစားသမားဆုဖြစ်ပါတယ်။

လက်ရှိယူနိုက်တက်အသင်းမှာ စီရော်နယ်ဒိုနဲ့ လုခ်ရှောတို့ကသာ တစ်ကြိမ်ထက်ပိုပြီး အသင်းဖော်တွေကရွေးချယ်တဲ့ တစ်နှစ်တာအကောင်းဆုံးကစားသမားဆုတွေ ရယူနိုင်ခဲ့ကြပြီး ဒီဂီယာက အကြိမ်အရေအတွက် အများဆုံးရယူနိုင်ခဲ့ ပါတယ်။

မန်ယူအသင်းရဲ့ တစ်နှစ်တာအကောင်းဆုံးကစားသမားဆုဖြစ်တဲ့ ဆာမက်ဘက်စ်ဘီဆု  အတွက်တော့ ဆန်ခါတင် ၃ ဦးစာရင်းထုတ်ပြန်ထားပြီး ဒီဂီယာ၊ ဖရက်ဒ်နဲ့ စီရော်နယ်ဒိုတို့ ပါဝင်နေပါတယ်။