ဂျာမနီနိုင်ငံ မြူးနစ်မြို့မှာ ရာနဲ့ချီတဲ့ဆန္ဒပြသူတွေက ယူကရိန်းအတွက် လက်နက်တွေ ပို့ပေးနေတာကို ဆန့်ကျင်ပြီး နေတိုးအဖွဲ့ဝင်အဖြစ်ကနေလည်း နုတ်ထွတ်ဖို့ ဖေဖော်ဝါရီ ၁၈ ရက်က ဂျာမနီအစိုးရကို တောင်းဆိုခဲ့ကြပါတယ်။

ဒီဆန္ဒပြမှုအတွင်း လူဦးရေ ၁၀,၀၀၀ လောက်  ပါဝင်ခဲ့တယ်လို့ မြူးနစ်ရဲတပ်ဖွဲ့ကဆိုပါတယ်။ မြူးနစ်မြို့မှာ ကျင်းပတဲ့ လုံခြုံရေးဆိုင်ရာညီလာခံပြင်ပမှာ ဆန္ဒပြတောင်းဆိုတာဖြစ်ပြီး နေတိုး အဖွဲ့အပါအဝင် အမေရိကန်နဲ့ လက်နက်ပို့ဆောင်မှုတွေအပေါ် ဒီလိုဆန့်ကျင်ဆန္ဒပြတာဟာ အရင်ကတည်းက အစဉ်အလာရှိခဲ့တာပါ။

တချို့ဆန္ဒပြ သူတွေကလည်း ဆီရီးယားသူပုန်တွေ ထိန်းချုပ်ထားတဲ့ ဒေသအလံတွေ ကိုင်ဆောင်ရင်း တူရကီအတွက် လက်နက်ရောင်းချမှုကို အဆုံးသတ်ဖို့ တောင်းဆိုခဲ့ကြပါတယ်။

ရုရှားနဲ့ ယူကရိန်းအကြား ငြိမ်းချမ်းရေးဆိုင်ရာ ညှိနှိုင်းဆွေးနွေးမှုတွေ လုပ်ဆောင်ဖို့ တောင်းဆိုတဲ့အနေနဲ့ "ငါတို့ ငြိမ်းချမ်းရေး လိုချင်တယ်" ဆိုတဲ့ ကြွေးကြော်သံတွေအောက်မှာ ဆန္ဒပြတောင်းဆိုခဲ့ကြပါတယ်။

ဆန္ဒပြသူ တစ်ဦးက“ဒီစစ်ပွဲတွေ အဆုံးမသတ်သေးသရွေ့ လက်နက်တွေကို အမြဲထောက်ပံ့ပေးနိုင်မှာ မဟုတ်ဘူးဆိုတဲ့ အချက်က ရိုးရှင်းပေမယ့် အရေးကြီးပါတယ်။ နေ့စဉ်နေ့တိုင်း လက်နက်တွေ ထောက်ပံ့ ပေးနေသမျှတော့ နှစ်ဖက်စလုံးက လူတွေ သေကြေကြရမှာဖြစ်တယ်”လို့ ပြောပါတယ်။

ဒီဆန္ဒပြပွဲကို စီစဉ်သူဟာ ကိုရိုနာဗိုင်းရပ်စ်ကန့်သတ်ချက်တွေအပေါ် ဆန့်ကျင်ဆန္ဒပြခဲ့တဲ့ အုပ်စု တွေနဲ့ ဆက်စပ်မှုရှိကြောင်း စွပ်စွဲခံထားရတယ်လို့လည်း မြူးနစ်ရဲတပ်ဖွဲ့က ပြောပါတယ်။ တစ်ဖက်မှာ လည်း ယူကရိန်းအပေါ် ထောက်ခံရင်း လက်နက်ကြီးတွေ ပိုမိုပို့ဆောင်ပေးဖို့ တောင်းဆိုဆန္ဒပြမှု တွေလည်း အဲဒီတစ်ရက်တည်းမှာတင် ရှိခဲ့ပါတယ်။

ရုရှား-ယူကရိန်းပဋိပက္ခမှာ ဂျာမနီက စွက်ဖက်မှုမပြုလုပ်ဖို့ မြို့တော် ဘာလင်ရဲ့ လမ်းတွေပေါ်မှာ  ပြည်သူတွေ ဆန္ဒပြခဲ့ကြပါတယ်။

ယူကရိန်း- ရုရှားပဋိပက္ခကြောင့်  စွမ်းအင်အကျပ်အတည်း၊ စီးပွားရေး ယိုစိမ့်မှုနဲ့ ကုန်စျေးနှုန်း ထိုးတက်တာတွေ ဖြစ်လာခဲ့တာပါ။

ဆန္ဒပြသူတွေက ယူကရိန်းအကျပ်အတည်းနဲ့ ပတ်သက်တဲ့ ဂျာမနီအစိုးရရဲ့ မူဝါဒတွေကို ပြစ်တင်ဝေဖန်ခဲ့ကြပြီး ယူကရိန်းကို လက်နက်ထောက်ပံ့မှု ချက်ချင်း ရပ်ဖို့နဲ့ ရုရှားအပေါ် ပိတ်ဆို့အရေးယူဖို့ တောင်းဆိုခဲ့ကြပါတယ်။

ရုရှား -ယူကရိန်း ပဋိပက္ခ ဖြစ်ပြီးကတည်းက ဥရောပသမဂ္ဂ အီးယူဟာ ရုရှားအပေါ် တင်းကျပ်တဲ့ ပိတ်ဆို့အရေးယူမှုတွေ ချမှတ်ခဲ့ပြီး စွမ်းအင်အကျပ်အတည်း နဲ့ စွမ်းအင်စျေးနှုန်းတွေ မြင့်တက်လာခဲ့ပါတယ်။ 

ခုနှစ် သဘာဝဓာတ်ငွေ့ အပူပေးမှုဆိုင်ရာ ဥပဒေကြမ်းဟာ မနှစ်ကထက် အနည်းဆုံး ၅၀ ရာခိုင်နှုန်း ပိုများတယ်လို့ ဆန္ဒပြသူတွေက ပြောပါတယ်။

"စွမ်းအင်စျေးနှုန်းက ဆက်တက်နေပါတယ်။ အပူပေးဖို့အတွက် သဘာဝဓာတ်ငွေ့ကို သုံးပေမယ့် ဈေးနှုန်း ဘယ်လောက်မြင့်မလဲဆိုတာ ဘယ်သူမှ မသိနိုင်ပါဘူး" လို့ ဆန္ဒပြသူတဦးက ပြောပါတယ်။

သီးခြား ဆန္ဒပြပွဲတရပ်မှာ လူတွေက အချိန်ကြာလာနေတဲ့ ပဋိပက္ခမှာ နေတိုးရဲ့ စွက်ဖက်မှုကို အပြစ်တင်ခဲ့ကြပါတယ်။

ယူကရိန်းကို လက်နက်တွေ သယ်ပို့ပေးတာ ရပ်တံ့ဖို့ ဂျာမန်အစိုးရကို မေတ္တာရပ်ခံပြီး ငြိမ်းငြိမ်းချမ်းချမ်း ဖြေရှင်းဖို့ တိုက်တွန်းခဲ့ပါတယ်။