အစ္စရေးရွေးကောက်ပွဲမှာ ဝန်ကြီးချုပ်ဟောင်း ဘင်ဂျမင် နေတန်ယာဟုဟာ လက်ယာစွန်းမဟာမိတ်တွေရဲ့ ထောက်ခံမှုနဲ့  အာဏာပြန်ရနိုင်ခြေရှိနေတယ်လို့   စစ်တမ်းတွေအရ သိရပါတယ်။

အစ္စရေးရဲ့ သက်တမ်းအရှည်ဆုံး ဝန်ကြီးချုပ်ဖြစ်ခဲ့ဖူးတဲ့ နေတန်ယာဟုဟာ အကျင့်ပျက်ခြစားမှု စွဲချက်တွေနဲ့ ရုံးတင်စစ်ဆေးခံနေရသူဖြစ်ပြီး ရွေးကောက်ပွဲမှာတော့ သူ့ရဲ့ပါတီဟာ  အမတ်နေရာ ၁၂၀ အနက် ၆၁ သို့မဟုတ် ၆၂ နေရာရဖို့ရှိတယ်လို့ အစ္စရေးရုပ်မြင်သံကြားရဲ့ စစ်တမ်းတွေက ဆိုပါတယ်။

အစ္စရေးရဲ့ အများပိုင်ရုပ်သံလွှင့်ဌာန Kan 11 မှ ထုတ်လွှင့်တဲ့ ရုပ်သံမှာတော့ နေတန်ယာဟုက ကောင်းသောအစပြုခြင်းပဲလို့ ပြောခဲ့သလို  အောင်မြင်မှုကြီးတခုရဖို့ နီးစပ်နေပြီလို့ ဂျေရုစလင်မြို့မှာ ထောက်ခံသူတွေကို ပြောကြားလိုက်ပါတယ်။

လက်ရှိ ဝန်ကြီးချုပ် ယာအီးလာပစ်နဲ့ သူ့ရဲ့ ညွန့်ပေါင်းလုပ်ဖော်ကိုင်ဘက်တွေကတော့ အမတ်နေရာ ၅၄ နေရာ၊ ၅၅ နေရာလောက်ယူဖို့ အဆင်သင့်ဖြစ်နေပြီး လွှတ်တော်ထဲမှာ ဒုတိယအကြီးဆုံးပါတီ ဖြစ်လာတယ်လို့ စစ်တမ်းတွေက ခန့်မှန်းပါတယ်။

ရွေးကောက်ပွဲ တရားဝင် ကနဦး မဲရလဒ်တွေကတော့ မကြာခင်နာရီပိုင်းအတွင်း ထွက်ပေါ်လာဖို့ ရှိနေပါတယ်။

ဂျေရုဆလင်မြို့ အယ်လ်အက်ဆာဗလီမှာ ကျောက်ခဲတွေနဲ့ ပစ်ပေါက်နေတဲ့ ပါလက်စတိုင်း လူငယ်တွေကို ဧပြီ ၂၉ ရက်မှာ အစ္စရေးလ်ရဲတွေက ရာဘာကျည်ဆန်တွေ၊ အသံဗုံးတွေနဲ့ ပစ်ခတ် လူစုခွဲခဲ့ပါတယ်။

ဒါဟာ မွတ်စလင်တွေနဲ့ ဂျူးတွေ ကြည်ညိုလေးစားတဲ့နေရာမှာ နောက်ဆုံးဖြစ်ခဲ့တဲ့ အကြမ်းဖက်မှုပါ။

အစ္စလာမ်ဘာသာရဲ့ တတိယ အမြတ်ဆုံးနေရာမှာ မနက်အစောပိုင်း ရုန်းရင်းဆန်ခတ်မှုအတွင်း ပါလက်စတိုင်း ၁၂ ယောက်ထက်မနည်း ဒဏ်ရာရတယ်လို့ ပါလက်စတိုင်း လခြမ်းနီအသင်းက ပြောပါတယ်။

ဂျူးလူမျိုး ဝတ်ပြုသူတွေ စုနေတဲ့ အနောက်ဘက်တံတိုင်း အပါအဝင် နေရာတွေကို ရာချီတဲ့လူတွေက ကျောက်ခဲတွေ၊ မီးပန်းတွေနဲ့ ပစ်ခတ်ခဲ့လို့ ကြားဖြတ် တားခဲ့ရတာလို့ အစ္စရေးလ်ရဲတွေက ပြောပါတယ်။

အများပြည်သူ ဘေးကင်းလုံခြုံရေးအတွက် ဥပဒေမဲ့ အဓိကရုဏ်းသမားတွေကို ပြတ်ပြတ်သားသား ဆက်ပြီး အရေးယူသွားမယ်လို့ ရဲတွေက ကြေညာချက် ထုတ်ပြန်ထားပါတယ်။

ဒီလထဲ ဗလီမှာ နေ့တိုင်းနီးပါး ထိပ်တိုက်တွေ့နေတာပါ။ ဒီနှစ်မှာ မွတ်စလင်တွေရဲ့ ရာမာဒန် ဥပုသ်လဟာ ဂျူးဘာသာဝင်တွေရဲ့ ကျွန်ဘဝက လွတ်မြောက်မှု အထိမ်းအမှတ်ပွဲတော်နဲ့ တိုက်ဆိုင်နေတာပါ။ ဒါကြောင့် ဂျေရုဆလင်မြို့ဟောင်းထဲမှာ မွတ်စလင်နဲ့ ဂျူးတွေ ထောင်သောင်းချီ ရောက်နေလို့ ရဲအင်အား အကြီးအကျယ် ချထားရပါတယ်။

လာမယ့်သီတင်းပတ်မှာ ရာမာဒန်ဥပုသ်လ ပြီးဆုံးပြီး  ဥပုသ်လရဲ့ နောက်ဆုံး သောကြာနေ့မှာ အယ်လ်အက်ဆာဗလီမှာ လူအုပ်ကြီးတွေ အကြီးအကျယ် စုဝေးလေ့ရှိတာ မကြာမကြာ တွေ့ရတတ်တယ်လို့ ရိုက်တာသတင်းဌာနက ထုတ်ပြန်ပါတယ်။