လာမယ့် ချန်ပီယံလိဂ်ပွဲစဉ်မှာ ဘိုင်ယန်မြူးနစ်အသင်းအနေနဲ့ ခံစစ်ပိတ်ကစားမယ်လို့ မထင်ကြောင်း မန်စီးတီးနည်းပြ ဂွာဒီယိုလာက ပြောသွားပါတယ်။
မန်စီးတီးရဲ့ အိမ်ကွင်း အီတီဟတ်မှာ ဘိုင်ယန်မြူးနစ်နဲ့ကစားရမယ့် ချန်ပီယံလိဂ်ကွာ တားဖိုင်နယ်ပထမ အကျော့ပွဲစဉ်နဲ့ ပတ်သက်ပြီး နည်းပြဂွာဒီယိုလာက ပြောခဲ့တာပါ။
ဘိုင်ယန်အသင်းအနေနဲ့ ခံစစ် ကစားခဲ့ရင်တောင်မှ မန်စီးတီးအသင်းက ကစားပုံကောင်းမွန်နေလို့သာ ဖြစ်နိုင်ပြီး အီတီဟတ်မှာ ခံစစ်အထိုင်ချပြီး ကစားမဲ့ အသင်းမဟုတ်ကြောင်း နည်းပြဂွာဒီယိုလာက ပြောပါတယ်။
ဒါ့အပြင် ဘိုင်ယန်မြူးနစ် အသင်းဟာ ဒုတိယအကျော့ရောက်မှာပဲ အဖြေပေါ်ဖို့ကြိုးပမ်းမဲ့ အသင်းမဟုတ်ဘဲ အီတီဟတ်မှာကတည်းက အနိုင်ရဖို့အတွက်ပဲ ကစားလိမ့်မယ်လို့ ထင်ကြောင်း ဂွာဒီယိုလာက ပြောပါတယ်။
ဘိုင်ယန်အသင်းကို နည်းပြတူချယ်တာဝန်ယူသည်ဖြစ်စေ၊ နည်းပြဟောင်းနာဂယ်စမန်းပဲ ဆက်လက်တာဝန်ယူသည်ဖြစ်စေ ခက်ခဲစွာနဲ့ယှဉ်ပြိုင်ရမှာကတော့ အတူတူပင်ဖြစ်ကြောင်း နည်းပြဂွာဒီယိုလာက မှတ်ချက်ပေးသွားပါတယ်။
တိုက်စစ်မှူးဟာလန်းဟာ မက်ဆီနဲ့ ရော်နယ်ဒိုတို့ရဲ့ အဆင့်အတန်းကိုရောက်ရှိနေပြီလို့ နည်းပြဂွာဒီယိုလာက ချီးကျူးသွားပါတယ်။
ပြီးခဲ့တဲ့ဆယ်စုနှစ် နှစ်ခုစာလောက်အတွင်းမှာ ရော်နယ်ဒိုနဲ့ မက်ဆီတို့သာ အပြိုင်အဆိုင်ဖြစ်ခဲ့ပေမဲ့ လက်ရှိအချိန်မှာတော့ ဟာလန်းက သူတို့နှစ်ဦးရဲ့ အဆင့်အတန်းကိုရောက်ရှိ နေပြီလို့ ဂွာဒီယိုလာကပြောခဲ့တာပါ။
နော်ဝေတိုက်စစ်မှူးဟာ စနေနေ့က ကစားခဲ့တဲ့ ဆောက်သမ်တန်နဲ့ ပွဲစဉ်မှာ နှစ်ဂိုးသွင်းခဲ့ပြီးနောက် ပရီးမီးယားလိဂ် သွင်းဂိုး ၃၀ ပြည့်မြောက်ခဲ့ပြီး ပြိုင်ပွဲစုံမှာ ၄၄ ဂိုးရှိသွားခဲ့တာပါ။
ဂွာဒီယိုလာက “ဟာလန်းက ခရစ္စတီယာနိုနဲ့ အတော်လေးတူညီပါတယ်။ လီယွန်နယ်ကတော့ ပိုပြီး ပြီးပြည့်စုံတဲ့ ကစားသမားပါ။ ဒါပေမဲ့ ဟာလန်းက စက်ရုပ်တရုပ် လိုပါပဲ။ ဆယ်စုနှစ် နှစ်ခုလောက် သူတို့နှစ်ဦးကပဲ လွှမ်းမိုးလာခဲ့ပြီးနောက်မှာတော့ ဟာလန်းက သူတို့နေရာ ဝင်ဖို့ မယုံကြည်နိုင်လောက်အောင် မှန်ကန်တဲ့စိတ်ဓာတ်ရှိတယ်”လို့ ပြောပါတယ်။
လက်ကျန် ၉ ပွဲအလို လိဂ်သွင်းဂိုး ၃၀ ရရှိထားတဲ့ ဟာလန်းဟာ ၂၀၁၇-၂၀၁၈ ရာသီက တစ်ရာသီတည်း ၃၂ ဂိုးသွင်းခဲ့တဲ့ ဆာလာရဲ့စံချိန်ကို ကျော်ဖြတ်ဖို့လည်း အလားအလာ ကောင်းမွန်နေပါတယ်။
