အမေရိကန် အောက်လွှတ်တော်ဥက္ကဋ္ဌ ကီဗင် မက်ကာသီက သူ အပါအဝင် နိုင်ငံရဲ့ အဓိကပါတီ ၂ ခုစလုံးကဥပဒေပြုအမတ်တွေဟာ ထိုင်ဝမ်သမ္မတ ဆိုင်အင်းဝမ်နဲ့ အလွန်အကျိုးရှိတဲ့ ဆွေးနွေးမှုတခု လုပ်ဆောင်ခဲ့ကြောင်း ဧပြီလ ၅ ရက်က တရားဝင် ပြောကြားပါတယ်။

အမေရိကန်အနေနဲ့ ထိုင်ဝမ်အတွက် လက်နက်ရောင်းချမှုကို သေချာပေါက် ဆက်လက်ဆောင်ရွက်မှာဖြစ်သလို ကုန်သွယ်ရေးနဲ့ နည်းပညာဆိုင်ရာအပြင် စီးပွားရေးအရ ပူးပေါင်းဆောင်ရွက်မှုပါ ပိုမိုအားကောင်းလာစေရမယ်ဆိုပြီး မက်ကာသီက မှတ်ချက်ပေးပါတယ်။

ဝါရှင်တန်ရဲ့ ထိုင်ဝမ်အပေါ် ထောက်ခံမှုဟာလည်း မယိမ်းမယိုင်ဘဲ ခိုင်မာနေမှာ ဖြစ်တယ်လို့ ဆိုပါတယ်။

တရုတ်နိုင်ငံအနေနဲ့ လက်တုံ့ပြန်မှာဖြစ်ကြောင်း ခြိမ်းခြောက်ထားပေမဲ့လည်း မက်ကာသီဟာ ၁၉၇၉ ခုနှစ်နောက်ပိုင်း အမေရိကန်မြေပေါ်မှာ ထိုင်ဝမ်ခေါင်းဆောင်တဦးနဲ့ တွေ့ဆုံတဲ့ ရာထူးအကြီးဆုံး တာဝန်ရှိသူတဦး ဖြစ်လာခဲ့ပါတယ်။

ကိုယ်ပိုင်အုပ်ချုပ်ခွင့်ရ ထိုင်ဝမ်ဟာ သူပိုင်နယ်မြေဖြစ်တယ်လို့ တရုတ်ပြည်မကြီးရဲ့  အခိုင်အမာ ပြောဆိုချက်အပေါ်မှာ ထိုင်ဝမ်ဘက်က ပြန်လည်ငြင်းဆန်ထားပါတယ်။

မော်စကိုရဲ့ လက်နက်သိုလှောင်မှုတွေက ယူကရိန်းမှာ ဆက်တိုက်ဖို့အတွက် လုံလုံလောက်လောက် ရှိတယ်လို့ ရုရှားသမ္မတဟောင်း ဒီမီထရီ မက်ဗီဒက်က ဇန်နဝါရီ ၂၄ ရက်မှာ ပြောလိုက်ပါတယ်။

မက်ဗီဒက်ဟာ မော်စကိုမြို့အရှေ့ဘက် အိုက်စ်ဟက်ဗ်စ်ခ်မြို့ရှိ ကာလာ့ရှ်နိကော့ဗ် ကာကွယ်ရေးပစ္စည်းစက်ရုံကိုသွားရောက်ပြီး စက်ရုံထုတ်ရိုင်ဖယ်တွေ၊ အမြောက်ကျည်တွေ၊ ဒုံးကျည်တွေနဲ့ ဒရုန်းတွေကို စစ်ဆေးကြည့်ရှုစဉ် ပြောဆိုခဲ့တာဖြစ်ပြီးတော့ ပြီးခဲ့တဲ့ ၁၁ လတိတိ ရုရှားရဲ့ ယူကရိန်း ကျူးကျော်စစ်ပွဲတွေမှာ အမြောက်ကျည်တွေနဲ့ ဒုံးကျည်ထောင်ပေါင်းများစွာကို ပစ်ခတ်ပြီးနောက်မှာ လက်နက်ပြတ်လပ်မှုနဲ့ ရင်ဆိုင်နေရပြီဆိုတဲ့ ယူကရိန်းနဲ့ အနောက်နိုင်ငံ စစ်အရာရှိတွေရဲ့ ပြောကြားချက်တွေကို ပြန်တုံ့ပြန်ခဲ့တာပါ။

“ကျနော်တို့ရဲ့ ပြိုင်ဘက်တွေက စောင့်ကြည့်နေကြပြီးတော့ ဒါတွေမရှိဘူး၊ ဟိုဟာတွေမရှိဘူးလို့ ခဏခဏ ပြောနေကြလို့ သူတို့ကို စိတ်ပျက်သွားစေချင်တယ်။ အရာအားလုံး လုံလုံလောက်လောက် ရှိနေပါတယ်” လို့ မက်ဗီဒက်က ပြောပါတယ်။

ယူကရိန်းမှာ ရုရှားရဲ့ “အထူးစစ်ဆင်ရေး” အတွက် ဒရုန်းတွေကို အထူးသဖြင့် ဝယ်လိုအား မြင့်မားနေကြောင်း မက်ဗီဒက်က ခရီးစဉ်အတွင်းမှာ တာဝန်ရှိသူတွေကို ပြောကြားခဲ့ပါတယ်။

ဒရုန်းတွေဟာ စျေးသက်သာပြီး ပစ်မှတ်တိကျလို့ လူလိုက်ပါတဲ့ လေယာဉ်တွေထက် ပိုလုံခြုံတယ်လို့ ရှုမြင်ကြတာ‌ကြောင့် ရုရှားနဲ့ ယူကရိန်း ၂ နိုင်ငံစလုံးဟာ စစ်ပွဲစတင်ကတည်းက တိုက်ပွဲတွေမှာ ဒရုန်းတွေကို အသုံးပြုခဲ့ကြပါတယ်။

သမ္မတဟောင်း မက်ဒီဗက်ဟာ အခုအခါ သြဇာကြီးတဲ့ ရုရှားလုံခြုံရေးကောင်စီရဲ့ ဒုဥက္ကဋ္ဌဖြစ်ပြီး ဒီဇင်ဘာလတုန်းက စစ်ပွဲကို ပံ့ပိုးပေးဖို့အတွက် လက်နက်ထုတ်လုပ်ရေးကို ကြီးကြပ်ရမယ့် စစ်ရေးဆိုင်ရာ စက်မှုလုပ်ငန်း ကော်မရှင်အသစ်ရဲ့ခေါင်းဆောင် ဖြစ်လာခဲ့ပါတယ်။

ပြီးခဲ့တဲ့သီတင်းပတ်တုန်းက မက်ဒီဗက်ဟာ ယူကရိန်းမှာ ရုရှားရှုံးနိမ့်မှုဟာ နျူးကလီးယား စစ်ပွဲကို ဖြစ်စေနိုင်ကြောင်း ပြောခဲ့ပါတယ်။