စပါးအသင်းနည်းပြ ကွန်တီဟာ ရာထူးကနေ ထုတ်ပယ်ခံရဖို့ ဆန္ဒရှိကြောင်း အင်္ဂလန် နောက်ခံလူ ဟောင်းကာရေဂါက ပြောသွားပါတယ်။
ကွန်တီဟာ ဆောက်သမ်တန်နဲ့ ၃ ဂိုး စီသရေကျတဲ့ပွဲအပြီးမှာ ကစားသမားတွေထဲမှာ တစ်ကိုယ်ကောင်ဆန်တဲ့ သူတွေ အများကြီးရှိနေကြောင်း၊ အသင်းတစ်သင်းလို မြင်လို့မရကြောင်း ဝေဖန်ခဲ့တာပါ။
ပြီးခဲ့တဲ့လပိုင်းတွေကလည်း စပါးအသင်းရဲ့ ဆုဖလားလက်မဲ့မှု အခြေအနေတွေနဲ့ နည်းပြတွေကို ထုတ်ပယ်ဖို့ ဝန်မလေးတဲ့ အစဉ်အလာတွေကို နည်းပြကွန်တီက ဝေဖန် ခဲ့ဖူးပါတယ်။
အဲဒီလို ကိုယ့်အသင်းအပေါ် စည်းလွတ်ဝါးလွတ်ပြောနေပုံတွေကိုကြည့်မယ်ဆိုရင် နည်းပြကွန်တီဟာ အခုလာမယ့် နိုင်ငံတကာပွဲရက်သတ္တပတ်မှာပဲ ထုတ်ပယ်ခံရဖို့ ဆန္ဒရှိနေပုံရကြောင်း ကာရေဂါက ဝေဖန်သုံးသပ်ခဲ့တာဖြစ်ပါတယ်။
အာဆင်နယ်အသင်းဟာ မန်စီးတီးလို ကစားရခက်ခဲတဲ့အသင်းဖြစ်လာပြီလို့ စပါးနည်းပြကွန်တီက ပြောသွားပါတယ်။
အာဆင်နယ်ကို အိမ်ကွင်းမှာ ၂ ဂိုး ဂိုးမရှိနဲ့ရှုံးနိမ့်ခဲ့ပြီးနောက်မှာ ပြိုင်ဘက်အသင်းနဲ့ ပတ်သက်ပြီး နည်းပြကွန်တီက မှတ်ချက်ပေးခဲ့တာပါ။
အာဆင်နယ်အသင်းရဲ့ စွမ်းဆောင်နိုင်မှုဟာ ချန်ပီယံဆုဖလားကိုစိန်ခေါ်ဖို့ အဆင်သင့်ဖြစ်နေတယ်ဆိုတာကို ပြသနေပြီး မန်စီးတီးအသင်းလို ကစားရ ခက်ခဲတဲ့အသင်းဖြစ်လာပြီလို့ နည်းပြကွန်တီကပြောပါတယ်။
“အာဆင်နယ်က မန်ချက်စတာစီးတီးလို ခက်ခဲတဲ့ပြိုင် ဘက်အသင်းဖြစ်လာတယ်။ နှစ်သင်းစလုံးက ချန်ပီယံဆုကို စိန်ခေါ်နိုင်တဲ့အသင်းတွေဖြစ်ပြီး တစ်သင်းကပဲ ပရီးမီးယားလိဂ်ချန်ပီယံဖြစ်လိမ့်မယ်” လို့ နည်းပြကွန်တီကပြောပါတယ်။
စပါးအသင်းအနေနဲ့ ဦးဆောင်ဂိုး ၂ ဂိုးပေးလိုက်ရပြီးနောက်မှာ ပြန်လာနိုင်ဖို့ခက်ခဲသွားပြီး အာဆင်နယ်ဂိုးသမားကလည်း ကာကွယ်မှုတွေပြုလုပ်နိုင်ခဲ့ကြောင်း နည်းပြ ကွန်တီကပြောသွားပါတယ်။
