စပါးအသင်းတာဝန်ရှိသူတွေအနေနဲ့ ချန်ပီယံဆုကို စိန်ခေါ်နိုင်ချင်တယ်ဆိုရင် လူအင်အားဖြည့် တင်းပေးဖို့ လိုအပ်ကြောင်း နည်းပြ ကွန်တီက တောင်းဆိုလိုက်ပါတယ်။
စပါးအသင်းဟာ လိဒ်ယူနိုက်တက်နဲ့ပွဲစဉ်မှာ ၃ ကြိမ်တိုင်တိုင်ဦးဆောင်ခွင့်ပေးခဲ့ရပေမဲ့ နောက်ကျ ဂိုးတွေ နဲ့အတူ ၄ ဂိုး ၃ ဂိုး နဲ့အနိုင်ရယူနိုင်ခဲ့တာပါ။
နိုင်ပွဲ ရယူနိုင်ခဲ့လို့ ပျော်ရွှင်ရပေမယ့် ပရီးမီးယားလိဂ်ချန်ပီယံဆုဖလားကို စိန်ခေါ်နိုင်ဖို့ဆိုရင်တော့ အရည်အသွေးမြင့်ကစားသမားတွေ ခေါ်ယူပေးဖို့ လိုအပ်တယ်လို့ ကွန်တီက ပြောပါတယ်။
“မန်စီးတီး၊ လီဗာပူး၊ ချဲလ်ဆီးအသင်းတွေရဲ့ ဥပမာကို ခင်ဗျားတို့လည်းမြင်နိုင်ပါတယ်။ သူတို့က အမှန်တကယ်တောင့်တင်းတဲ့အသင်းတွေဖြစ်တယ်။ ဆုဖလားရယူဖို့ စဉ်းစားထားတယ်ဆိုရင် ခြေစွမ်းကောင်းတဲ့ကစားသမားတွေလိုပါတယ်” လို့ နည်းပြ ကွန်တီက ပြောပါတယ်။
စပါးအသင်းမှာ ကာလကြာရှည်တာဝန်ယူလိုပြီး ရလဒ်ကောင်းတွေရဖို့ စိတ်ရှည်သည်းခံပေးဖို့ လည်း လိုအပ်ကြောင်း နည်းပြ ကွန်တီက ပြောပါတယ်။
မန်စီးတီးနည်းပြဂွါဒီယိုလာဟာ ကမ္ဘာ့အကောင်းဆုံးနည်းပြဖြစ်တယ်လို့ ပြိုင်ဘက် စပါးနည်းပြ ကွန်တီက ချီးကျူးသွားပါတယ်။
စပါးအသင်းဟာ တနင်္ဂနွေနေ့မှာ မန်စီးတီးအသင်းနဲ့ ပရီးမီးယားလိဂ်ပွဲစဉ်ကစားရဖို့ရှိပြီး အဲဒီပွဲမတိုင်ခင်မှာ နည်းပြကွန်တီက ဂွါဒီယိုလာကိုထုတ်ဖော်ချီးကျူးခဲ့ တာပါ။
နည်းပြဂွာဒီယိုလာဟာ ဘာစီလိုနာ၊ ဘိုင်ယန်မြူးနစ်နဲ့ မန်စီးတီးအသင်းတွေကို ကွဲပြားခြားနားတဲ့ အခြေအနေတွေမှာတောင် အကောင်းဆုံးခြေစွမ်းရရှိအောင် လုပ်ဆောင်နိုင်သူဖြစ်တယ်လို့ ကွန်တီ ကပြောပါတယ်။
အဲဒီအသင်းတွေကလည်း အကောင်းဆုံးရင်းနှီးမြှုပ်နှံပေးခဲ့သလို ဂွာဒီယိုလာဟာလည်း အသင်းတိုင်းကို ယုံကြည်မှုပြန်ပေးခဲ့တယ်လို့ နည်းပြကွန်တီက ချီးကျူးပါတယ်။
“ပက်ဂွာဒီယိုလာရဲ့အသင်းကိုကြည့်လိုက်ရင် ဘောလုံးဒဿနတစ်ခုကို မြင်တွေ့နိုင်ပြီး ဒီလိုဖြစ်ဖို့ အတွက် လုပ်ဆောင်မှုတွေအများကြီးလိုတယ်ဆိုတာ နားလည်လိမ့်မယ်။ ဒီအချက်တွေကြောင့် ဂွါဒီယိုလာကလက်ရှိ ကမ္ဘာ့အကောင်းဆုံးနည်းပြဖြစ်တယ်” လို့ စပါးနည်းပြကွန်တီကပြောပါတယ်။
မန်စီးတီးနဲ့ ကွာဟချက်တွေရှိပေမယ့်လည်း အတတ်နိုင်ဆုံးကြိုးပမ်းယှဉ်ပြိုင်သွားမယ်လို့လည်း နည်းပြကွန်တီက ပြောသွားပါတယ်။
