ပြင်သစ်တိုက်စစ်မှူးအမ်ဘာပေနဲ့ တွဲဖက်ပြီး ကမ္ဘာ့ဖလားပြိုင်ပွဲ ကစားချင်တယ်လို့ နယူးကာဆယ် တိုက်စစ် ကစားသမား စိန့်မက်ဆီမင်က ပြောပါတယ်။ 

အသက် ၂၅ နှစ်ရှိ တောင်ပံတိုက်စစ်မှူးဟာ နယူးကာဆယ်မှာ ခြေစွမ်းပြခဲ့ပေမယ့် ဒဏ်ရာ ပြဿနာတွေကြောင့် ၂၀၂၂ ကမ္ဘာ့ဖလားကစားခဲ့တဲ့ ပြင်သစ်အသင်းမှာ ရွေးချယ်ခြင်း မခံခဲ့ရတာပါ။ 

ဒါပေမဲ့ ၂၀၂၆ ခုနှစ် ကမ္ဘာ့ဖလားပြိုင်ပွဲမှာတော့ တိုက်စစ်မှူး အမ်ဘာပေနဲ့အတူ ပြင်သစ် အသင်းမှာ တွဲဖက်ကစားချင်တယ်လို့ စိန့်မက်ဆီမင်က ပြောပါတယ်။ 

ပြင်သစ်အသင်းမှာ ပါဝင်ခွင့်ရဖို့ စကားပြောဆိုမှုတချို့ ရှိခဲ့ပေမဲ့ ကမ္ဘာ့ဖလားပြိုင် ပွဲမတိုင်ခင် နှစ်ပတ်အလိုမှာ ဒဏ်ရာရသွားတာက ခက်ခဲစေခဲ့ကြောင်း စိန့်မက်ဆီမင်က ဆိုပါတယ်။

“နယူးကာဆယ်မှာ ဆက်ကြိုးစားပြီး ခြေစွမ်းပြနိုင်ရင် ပြင်သစ်အသင်းက သတိထားမိမှာပါ။ ကျနော်တို့အသင်းက ကမ္ဘာ့အကောင်းဆုံးလိဂ်ရဲ့ အဆင့်သုံးနေရာမှာ ရပ်တည်နေတာဖြစ်လို့ အသင်းငယ်တစ်သင်းလို့ မဆိုနိုင်ပါဘူး။ ပြင်သစ်အသင်းမှာ ကစားနိုင်တဲ့ ခြေစွမ်းရှိတယ်လို့ ယုံကြည်ပါတယ်”လို့ စိန့်မက်ဆီမင်က ပြောပါတယ်။ 

မက်ဆီမင်ဟာ ပြင်သစ်ယူ ၁၇၊ ယူ ၂၀ နဲ့ ယူ ၂၁ အသင်းတွေမှာ ၁၁ ပွဲ လောက် ကစားခဲ့ဖူးပေမယ့် လက်ရွေးစင်အသင်းမှာတော့ ရွေးချယ်ခံရတာမရှိသေးပါဘူး။

လီဗာပူးတိုက်စစ်မှူး မာနေးလို ခြေစွမ်းအဆင့်အတန်း ရှိတယ်လို့ နယူးကာဆယ် တောင်ပံကစားသမား စိန့်မက်ဆီမင်က ပြောပါတယ်။

ပြင်သစ်တောင်ပံတိုက်စစ်မှူးဟာ အခုနှစ်ရာသီမှာ နယူးကာဆယ်အတွက် ၅ ဂိုးသွင်းပြီး ၄ ကြိမ် ဂိုးဖန်တီးမှု ပြုလုပ်ထားပါတယ်။

ပိုကောင်းတဲ့ အသင်းဖော်တွေနဲ့သာ တွဲဖက်ကစားခွင့်ရမယ်ဆိုရင် လီဗာပူးတိုက်စစ်မှူး မာနေးလို ခြေစွမ်းအဆင့်အတန်းမျိုး ရရှိနိုင်တယ်လို့ စိန့်မက်ဆီမင်က ပြောခဲ့တာပါ။

“ခြေစွမ်းနဲ့ပတ်သက်ရင် ကျနော့်အနေနဲ့ မာနေးကို မနာလိုစရာမရှိဘူးဆိုတာ ကျနော်နဲ့ တွဲဖက်ကစားခဲ့တဲ့ ကစားသမားတိုင်း သိပါတယ်။ ကျနော် အခွင့်အရေး ဖန်တီးနိုင်ခဲ့တာတွေကိုသာ အသင်းဖော်တွေက အသုံးချနိုင်မယ်ဆိုရင် သွင်းဂိုး ၁ဝ ဂိုးနဲ့ ဖန်တီးမှု ၁၅ ကြိမ်လောက်ကို နှစ်စဉ် ပြုလုပ်ပေးနိုင်ပါလိမ့်မယ်။ ဒါဆိုရင် ကျနော့်ရဲ့နာမည်ဟာလည်း လူတွေရဲ့စိတ်ထဲမှာ ချီးကျူးစရာ ဖြစ်လာလိမ့်မယ်” လို့ စိန့်မက်ဆီမင်က ပြောပါတယ်။

အသက် ၂၅ နှစ်ရှိ ပြင်သစ်ကစားသမားဟာ နယူးကာဆယ်အသင်းရဲ့ အကောင်းဆုံး ကစားသမားအဖြစ် သတ်မှတ်ခံထားရပါတယ်။

လီဗာပူးတိုက်စစ်မှူး မာနေးက ပရီးမီးယားလိဂ်မှာ ၁၄ ဂိုး သွင်းထားပေမဲ့ အသင်းဖော်ချင်း ယှဉ်ရင်တော့ မာနေးက ကစားသမားကောင်းတွေနဲ့ တွဲဖက်ကစားနေရတာကို စိန့်မက်ဆီမင်က ရည်ညွှန်းခဲ့တာဖြစ်ပါတယ်။