ဧရာဝတီတိုင်း၊ မအူပင်မြို့မှာ စစ်ကောင်စီတပ်သားတွေက ဂိတ်အသစ်ဖွင့်လှစ်ကာ ကားနဲ့ ဆိုင်ကယ်တွေကို ဆက်ကြေးတောင်းသလို ငွေတောင်းခံနေတယ်လို့ သိရပါတယ်။ 

မအူပင်မြို့က ကြိုဆိုပါ၏ ဆိုင်းဘုတ်အနားမှာ ဧပြီလဆန်းပိုင်းက စတင်ကာ စစ်ကောင်စီတပ်သားတွေ ရဲတွေနဲ့ သတင်းပေးတွေပေါင်းပြီး စစ်ဆေးရေးဂိတ်အသစ်ဖွင့်ကာ လာသမျှ ကားနဲ့ဆိုင်ကယ်ကို ငွေတောင်းနေတာလို့ ဒေသခံတွေက ပြောပါတယ်။ 

“မိုးမလင်းခင်ထဲကရောက်နေပြီ၊ တွေ့သမျှ ကား၊ ဆိုင်ကယ် အကုန်တောင်းတာ။ စစ်ဆေးစရာရှိတယ်ဆိုပြီး ရပ်ခိုင်းတယ်၊ ပြီးရင်တောင်းတော့တာပဲ။ အဲ့နားမှာ မူးပြီး မှောက်တဲ့သူက မှောက်၊ တောင်းတဲ့သူက တောင်း အဲ့လိုဖြစ်နေတာ” လို့ ဒေသခံတဦးက ပြောပါတယ်။ 

မအူပင်မြို့အဝင်မှာလည်း စစ်ဆေးရေးဂိတ်ရှိတဲ့အပြင် ဂိတ်အသစ်ထပ်ဖွင့်တာကြောင့် မလိုအပ်ဘဲ လမ်းကြေး ပုံစံ ၂ ဆပေးနေရသလို စစ်ကောင်စီတပ်သားတွေက ပိုက်ဆံတောင်းပြီး အနားက ဘီယာဆိုင်မှာ ဘီယာ ဝယ်သောက်လေ့ရှိတယ်လို့ ဆိုပါတယ်။

ဂိတ်အသစ်ဖွင့်ကာ ပိုက်ဆံတောင်းတဲ့နေရာမှာ စစ်ကောင်စီတပ်သားတွေနဲ့ ရဲတွေ သေနတ်လွယ်ထားတဲ့အပြင် သတင်းပေးသူတွေကိုပါ သေနတ်ထုတ်ပေးထားပြီး တောင်းခိုင်းနေတာလို့ ဒေသခံတွေက ပြောဆိုပါတယ်။

ပဲခူးတိုင်းအနောက်ခြမ်း၊ ပေါင်းတည်၊ နတ္တလင်းနဲ့ ကြို့ပင်ကောက်မြို့နယ်တွေထဲက ကျေးရွာ တချို့မှာ စစ်တပ်က အာဏာသိမ်းပြီးစကတည်းက လောင်းကစား၀ိုင်းတွေကို တရား၀င်လူ မြင်ကွင်းတွေမှာ ပြုလုပ်နေကြတယ်လို့ ဒေသခံတွေကပြောပါတယ်။

နတ္တလင်းမြို့နယ်က ကန်တွင်းကျေးရွာ၊ ပန်းတင်လေး-ချောင်းစောက်ကျေးရွာ၊ သစ်စိမ့်ကုန်းကျေးရွာ၊ ချောင်းစောက်၊ ကြိုပင်ကောက်မြို့က ပန်းတင်လမ်းနဲ့ ဇီးကုန်းမြို့နယ်ထဲက လောင်းကစားဝိုင်းတွေပြုလုပ်ခဲ့တာဖြစ်ပါတယ်။

အခုလို လောင်းကစားဝိုင်းတွေကြောင့် ကျေးရွာဒေသခံပြည်သူတွေ စိတ်အနှောင့်အယှက်တွေ ဖြစ်နေကြတယ်လို့  နတ္တလင်းမြို့ ဒေသခံတယောက်က ပြောပါတယ်။

ဇီးကုန်းမြို့ခံတယောက်ကလည်း “သူတို့က တရွာကို တပတ်ကို ၂ ရက် အလှည့်ကျလုပ်ကြတာ။ လာကစားသူတွေက ပြည်၊ ဇီးကုန်း ၊နတ္တလင်း ၊ ပေါင်းတည်၊ ရွှေတောင်စတဲ့ မြို့နယ်တွေကနေ ကားတွေ ဆိုင်ကယ်တွေနဲ့ လာကစားကြတာ၊ တနေကုန် ညနက်အထိ ကစားကြတော့ လူကြီးတွေ၊ ကလေးငယ်ရှိတဲ့အိမ်တွေ အဲ့ဒိ ဆူညံသံကြောင့် စိတ်အနှောင့်အယှက်ဖြစ်ရတယ်”လို့ ပြောပါတယ်။

လေးကောင်ဂျင်၀ိုင်း၊ ဂျုံးဂျုံးကျ၊ ဖဲ၀ိုင်း၊ ကြက်၀ိုင်းစတဲ့ လောင်းကစားပွဲတွေကို  စစ်ကောင်စီကို ဆက်ကြေးပေးပြီး စစ်အုပ်စုနဲ့ နီးစပ်သူတွေက  ဒိုင်ခံပြီးပြုလုပ်ကြတာဖြစ်ပါတယ်။ 

ဒေသခံတယောက်က “သူတို့က ပွဲလမ်းသဘင်တခုခုကိုခံပြီး လုပ်တာမဟုတ်ဘူး၊ ဘယ်ရက် ဘယ်မြို့နယ်ဆိုတာတော့ အတိအကျမပြောတတ်ဘူး၊ ဥပမာ အခု စနေကို နတ္တလင်းမြို့နယ်ထဲက ရွာတရွာမှာ စလုပ်တယ်ဆိုရင် တရွာကို ၂ ရက်စီလောက်လုပ်သွားတာ။ သူတို့က  ရဲကို လိုင်းကြေး တနေ့ကို ၄ သိန်း၊ ခရိုင်ရဲရုံးကို တလ ၁၆ သိန်းနဲ့ စစ်တပ်ကိုတော့ ဘယ်လောက်ပေးရသလဲ မသိဘူး။ အဲ့ဒါကြောင့် ပေါ်တင်လုပ်တာ” လို့ပြောပါတယ်။

အဲဒီလိုလောင်းကစား၀ိုင်းတွေများလာတာကြောင့် ပေါင်းတည်၊ နတ္တလင်း၊ ဇီးကုန်း၊ ကြို့ပင်ကောက် မြို့နယ်တွေမှာ နေစဥ်နဲ့အမျှ ဆိုင်ကယ်ပျောက်ဆုံးမှုတွေ ဖြစ်ပေါ်နေတယ်လို့ သိရပါတယ်။ 

ဖေဖေါ်ဝါရီလ  ၁ ရက်က ဇီးကုန်းမြို့နယ်က စည်ပင်အရာရှိအိမ်က ဆိုင်ကယ်တစီး အခိုးခံလိုက်ရတယ်လို့  ဇီးကုန်းမြို့ခံတယောက်က ပြောပါတယ်။

အခုလို‌လောင်းကစား၀ိုင်း‌တွေနဲ့ ပတ်သက်ပြီး နတ္တလင်းမြို့မရဲစခန်းကို ဖုံးနဲ့ဆက်သွယ်မေးမြန်းဖို့ အကြိမ်ကြိမ်ကြိုးစားခဲ့ပေမဲ့ တာ၀န်ရှိသူက  ဖုန်းချပြစ်လိုက်တဲ့အတွက် ဆက်သွယ်လို့မရခဲ့ပါဘူး။ 

ရှမ်းပြည်မြောက်ပိုင်း မူဆယ်ခရိုင် နမ့်ခမ်းမြို့ပေါ်မှာ ဖေဖော်ဝါရီ ၄ ရက် မနက်ပိုင်းက  TNLA ပလောင်စစ်သားများ လက်နက်၊ ယူနီဖောင်းအပြည့်အစုံနဲ့ ဝင်ရောက်လာပြီး ဆက်ကြေးကောက်သွားတယ်လို့ ဒေသခံတွေက ပြောပါတယ်။

အင်အား ၇၀  - ၈၀ လောက်ရှိ ပလောင်စစ်သားတွေဟာ ဒီကနေ့မနက် ၉ နာရီလောက်က နမ့်ခမ်းမြို့ အရှေ့ဘက်တောင်ကုန်းတွေကနေ  နောင်စန့်ကုန်းရပ်ကွက်၊ ဟိုကတ်ရပ်နဲ့ နမ့်ခမ်းမြို့ထဲ ဝင်ရောက်လာကြောင်း၊ ရဲစခန်းအနီးမှာ ကားရပ်ထားပြီး ဈေးထဲမှာ သူတို့ကိုအခွန်ဆောင်ဖို့ လိပ်စာ ကပ်ပြားနဲ့ ဖုန်းနံပါတ်တွေ လာဝေသွားတယ်လို့ ဒေသခံတစ်ဦးက ဒီဗွီဘီကို ပြောပါတယ်။

“ကျနော်တို့တွေ့ရသလောက်တော့ အင်အား ၇၀-၈၀ လောက်ရှိမယ်ထင်တယ်၊ သေနတ်တွေ ယူနီဖောင်းတွေနဲ့ ဝင်လာတာ။ ဈေးထဲမှာ အခွန်ဆောင်ဖို့ လိပ်စာကတ်တွေဝေသွားတယေ။ သူတို့ဝင်လာတော့ တချို့ကကြောက်ပြီး ဆိုင်သိမ်း‌ေ၊ ဆိုင်ပိတ်တာတွေလုပ်တာပေါ့။ အိမ်တွေတော်တော်များလည်း တံခါးမဖွင့်ရဲဘူး၊ အရင်တခေါက်လို ပစ်ခတ်ပြီး ခြံထဲဝင်လာတာ အမှုပတ်တာတွေဖြစ်မှာစိုးလို့လေ။ မနက် ၉  ခွဲလောက်ကျတော့ အေးဆေးဘဲ ပြန်ထွက်သွားတယ်။”

နမ့်ခမ်းမှာ နယ်မြေအခြေစိုက် စစ်တပ်၊ ရဲနဲ့ အခြားလက်နက်ကိုင်အဖွဲ့တွေ အများကြီးရှိပါလျက်နဲ့  တအာင်းအမျိုးသားလွတ်မြောက်ရေးတပ်မတော် (TNLA) က ဝတ်စုံပြည့်နဲ့ ပေါ်တင်ဆက်ကြေးဝင်ကောက်ပြီး အေးဆေးဆေး ဆေးပြန်သွားနိုင်တဲ့အပေါ် အလွန်အံ့ဩမိကြောင်း၊ လက်နက်ကိုင်ကာ လုပ်ချင်ရာလုပ်လုပ်လို့ရတဲ့ သဘောကိုဆောင်ပြီး သူတို့မြို့ကတော့ လုံးဝလုံခြုံမှုမရှိတော့ဘူးလို့ ဒေသခံတစ်ဦးက ပြောပါတယ်။ 

လက်နက်အပြည့်စုံနဲ့ ဝင်လာတာကို ဘယ်အဖွဲ့မှ တားဆီးနိုင်ခြင်းမရှိတာဟာ သူတို့အချင်းချင်း ကြိုတင်အကြောင်းကြားထားပြီးလို့ ယူဆရကြောင့် ဒေသခံ နောက်တဦးက ပြောပါတယ်။

TNLA တပ်ဖွဲ့ဝင်တွေဟာ ယခင်က နမ့်ခမ်းဈေးထဲမှာ အခွန်လာကောက်ပါက အရပ်သား ဝတ်စုံနဲ့ ၂ ယောက် ၃ ယောက်သာ လာရောက်ပေမယ့် ပြီးခဲ့တဲ့ ဇန်နဝါရီ ၄ ရက်နေ့က တော့ အခွန်လာကောက်သူ ၂ ‌ယောက် ဈေးထဲမှာပစ်သတ်ခံခဲ့ရတာကြောင့် ဒီတခေါက် ဝတ်စုံပြည့်နဲ့ အဖွဲ့လိုက်ဝင်လာတာလို့ ဆိုပါတယ်။ 

TNLA တပ်ဖွဲ့က အခွန်ကောက်သူ ၂ ယောက် အပစ်ခံရပြီး နောက်တနေ့ မြို့ထဲဝင်လာရာမှာ  မြန်မာစစ်တပ်နဲ့ တိုက်ပွဲဖြစ်ပြီး ဒေသခံနေအိမ်ကို လက်နက်ကြီးကျလို့ နေအိမ်တွေပျက်စီး၊ ရွာသားတွေလည်း ထိမှန်ဒဏ်ရာရကာ ဖမ်းဆီးစစ်ဆေးခံရတာတွေ ရှိခဲ့ပါတယ်။