တောင်ကိုရီးယားနိုင်ငံ၊ ဆိုးလ်မြို့လယ်မှာ ဧပြီ ၂ ရက်က တောမီးလောင်ကျွမ်းမှုကြောင့် အနည်းဆုံး အိမ်ခြေ ၁၂၀ ကို ဘေးလွတ်ရာ ပြောင်းရွှေ့ပေးခဲ့ရတယ်လို့ အာဏာပိုင်တွေက ပြောပါတယ်။

လူဦးရေထူထပ်တဲ့ ဆိုးလ်မြို့လယ်က တောင်တန်းတခုမှာ ဒေသစံတော်ချိန် မနက် ၁၁ နာရီ ၅၃ မိနစ်က မီးစတင်လောင်ကျွမ်းခဲ့တာဖြစ်ပြီး ဘောလုံးကွင်း ၃၀ စာ ပမာဏရှိတဲ့ သစ်တောတွေ ပျက်စီးဆုံးရှုံးခဲ့ရတယ်လို့ သိရပါတယ်။

အဲ့ဒီတရက်တည်းမှာတင် ညနေ ၅ နာရီလောက်က မီးငြှိမ်းသတ်နိုင်ခဲ့ပြီး သေဆုံးဒဏ်ရာရသူ မရှိဘူးလို့ အာဏာပိုင်တွေက အတည်ပြုပါတယ်။

မီးသတ်သမားတွေက မီးသတ်လေယာဉ်နဲ့အတူ မီးငြှိမ်းသတ်နေစဉ်မှာပဲ ဒီသစ်တောထဲကနေ မီးခိုးလုံးကြီးတွေ ထွက်ပေါ်လာတာကို ဆိုးလ်မြို့အနှံ့အပြားမှာ တွေ့ရပါတယ်။

ရဟတ်ယာဉ်အများအပြားကလည်း ဟန်မြစ်ပေါ်မှာ ပျံဝဲနေကြပြီး မီးငြှိမ်းသတ်ရာမှာ ရေထောက်ပံ့ပေးဖို့အတွက် ကြိုးပမ်းနေကြတယ်လို့ မျက်မြင်သက်သေတဦးက ဆိုပါတယ်။

တောင်ကိုရီးယားနိုင်ငံ၊ ဆိုးလ်မြို့တော် အပိုင်နယ်မြေထဲက ချောင်ကျကျ မြို့ကျဉ်းကျဉ်းလေးမှာ ဇန်နဝါရီ ၂၀ ရက်က မီးလောင်မှုဖြစ်ပွားလို့ တောင်ကိုရီးယား မီးသတ်သမားတွေ မီးငြှိမ်းသတ်ခဲ့ကြပြီး အာဏာပိုင်တွေက လူ ၅၀၀ လောက်ကို ဘေးလွတ်ရာ ရွှေ့ပြောင်းပေးခဲ့ရပါတယ်။

ဂန်းနမ်ခရိုင်ထဲက အိမ်ထောင်စု ၆၀၀ လောက် နေထိုင်ကြတဲ့ ဆိုးလ်မြို့တောင်ပိုင်းက ဂူရုန်းကျေးရွာမှာ ဒေသစံတော်ချိန် မနက် ၆ နာရီ ၂၇ မိနစ်က မီးလောင်ကျွမ်းခဲ့တာပါ။

လက်ရှိအချိန်အထိ အိမ်ခြေ ၄၀ လောက် ပျက်စီးသွားတယ်လို့ မီးသတ်အရာရှိတွေက ပြောကြားပြီး မီးငြှိမ်းသတ်ဖို့ မီးသတ်သမား အယောက် ၁၄၀ ကို ခေါ်ယူထားတယ်လို့လည်း ဆိုပါတယ်။

တောင်ကိုရီးယားအမျိုးသားမီးသတ်အေဂျင်စီက ပေးပို့လာတဲ့ ဗီဒီယိုမှာတော့ ရွာကနေ မီးခိုးလုံးကြီးတွေ ထွက်လာတာတွေနဲ့ မီးလောင်နေတဲ့အိမ်တွေကို မီးသတ်သမားတွေက မီးငြှိမ်းသတ်ဖို့ လုပ်ဆောင်နေကြတာတွေကို မြင်တွေ့ရပါတယ်။

သမ္မတ ယွန်းဆွတ်ခ်ယိုးက အပျက်အစီး အနည်းဆုံးဖြစ်အောင် အစွမ်းကုန်ကြိုးပမ်းကြဖို့နဲ့ ရနိုင်သမျှ မီးသတ်သမားတွေနဲ့ ပစ္စည်းကိရိယာတွေ အားလုံးကို စုစည်းလုပ်ဆောင်ကြဖို့ တောင်းဆိုထားတယ်လို့ သူ့ရဲ့ ပြောခွင့်ရအမျိုးသမီး ကင်မ်ယွန်ဟေးက ပြောပါတယ်။