တက်စ်လာ-လျှပ်စစ်ကားကုမ္ပဏီ အမှုဆောင်အရာရှိချုပ် အီလွန်မက်စ်က သူ့ကုမ္ပဏီက ထုတ်လုပ်လိုက်တဲ့ ပထမဆုံး  Semi လျှပ်စစ်ကုန်တင်ထရပ်ကားသစ်ကို ဒီဇင်ဘာ ၁ ရက်မှာ စတင်မိတ်ဆက်လိုက်ပါတယ်။

အမေရိကန်ပြည်ထောင်စု နီးဗားဒါးပြည်နယ်ရှိ တက်စ်လာစက်ရုံမှာကျင်းပတဲ့အခမ်းအနားမှာ အီးလွန်မက်စ်က ဘက်ထရီ ပါဝါသုံး၊ ခရီးဝေးသွား ထရပ်ကားဟာ အဝေးပြေးလမ်းမတွေမှာ ဓာတ်ငွေ့ထုတ်လွှတ်မှုကို လျှော့ချနိုင်ပြီး ပါဝါနဲ့ ဘေးကင်းရေးပိုင်းမှာ လက်ရှိ ဒီဇယ်သုံး ကုန်တင်ယာဉ်ကြီးတွေထက် စွမ်းဆောင်ရည် သာလွန်တဲ့အပြင် တက်စ်လာကနေ လာမယ့် ဆိုက်ဘာကုန်တင်ထရပ်ကားမှာ သုံးစွဲမယ့် အမြန်အားသွင်း နည်းပညာကို စတင်သုံးစွဲထားတယ်လို့ ပြောပါတယ်။

ဒီဇယ်စွမ်းအင်သုံး ကုန်တင်ယာဉ်တွေထက် မောင်နှင်အား ၃ ဆ သာလွန်မှာဖြစ်သလို စွမ်းဆောင်ရည် တိုးတက်စေမယ့် စွမ်းအင်ပြန်ထုတ် သုံးစွဲနိုင်တဲ့ ဘရိတ်ဖမ်းစနစ်သစ်ကို သုံးစွဲထားကြောင်းလည်း မက်စ်က ပြောပါတယ်။

တက်စ်လာဟာ ကယ်လီဖိုးနီးယား ပြည်နယ် ဖရီမွန့်ရှိ သူ့ရဲ့စက်ရုံကို အစိတ်အပိုင်းတွေ တင်ပို့ဖို့ Semi ထရပ်ကို စတင်အသုံးပြုမယ်လို့ ဆိုပါတယ်။

Semi ထရပ်ကားကို တစ်ကြိမ်အားသွင်းထားပြီး အလေးချိန် ပေါင် ၈၁၀၀၀ ကို တင်ဆောင်ထားရင်း  မိုင် ၅၀၀ ထိ အားမပြတ်ပဲ မောင်းနှင်နိုင်ကြောင်းကို စမ်းသပ်ပြီးသွားပြီလို့ တက်စ်လာ ကုမ္ပဏီက ပြောပါတယ်။

၂၀၁၇ ခုနှစ်က တက်စ်လာဟာ Semi ထရပ်ကားရဲ့ မိုင် ၃၀၀ ပြေး အမျိုးအစားဟာ ဒေါ်လာ ၁ သိန်းခွဲနဲ့ မိုင် ၅၀၀ ပြေးထရပ်ကားကတော့ ဒေါ်လာ ၁၈၀,၀၀၀  ကုန်ကျနိုင်ကြောင်း ပြောထားပါတယ်။

ဒါပေမဲ့ တက်စ်လာ ရဲ့ လူစီးလျှပ်စစ်ကားတွေရဲ့ ဈေးနှုန်းတွေဟာ အဲဒီအချိန်ကတည်းက သိသိသာသာ မြင့်တက်ခဲ့ပါတယ်။ ဒီထရပ်ကားနဲ့ ပထမဆုံး ကုန်တင်ကုန်ချ ပြေးဆွဲမှု အပြီးအစီး လုပ်ကြည့်ခဲ့တဲ့ အမေရိကန်အစားအစာ ကုမ္ပဏီ ပက်ပ်စီက ၂၀၁၇ ခုနှစ်မှာ ထရပ်ကား စီးရေ ၁၀၀ မှာယူခဲ့ပါတယ်။ Semi ထရပ်ကားကို တခြားကုမ္ပဏီကြီးတွေလည်း ကြိုတင်မှာယူနေကြပါတယ်။ 

တက်စ်လာကုမ္ပဏီရဲ့ အမှုဆောင်အရာရှိချုပ် အီလွန်မတ်စ်ခ်က မန်ချက်စတာယူနိုက်တက် ဘောလုံးကလပ်ကို ဝယ်နေတယ်လို့ သြဂုတ် ၁၆ ရက်က ပြောလိုက်ပါတယ်။

ကမ္ဘာ့အချမ်းသာဆုံးပုဂ္ဂိုလ်ဖြစ်တဲ့ မတ်စ်ခ်ဟာ တွစ်တာ လူမှုကွန်ရက်မီဒီယာကို ဝယ်ဖို့ လုပ်ဖူးတဲ့ သမိုင်းကြောင်းရှိပြီး သဘောတူညီချက်ကို အကောင်အထည်ဖော်ဖို့ အစီအစဉ်ရှိမရှိ ချက်ချင်းမသိရသေးပါဘူး။

“ကျနော် မန်ချက်စတာယူနိုက်တက်ကို ဝယ်နေပါတယ်” လို့ မတ်စ်ခ်က တွစ်တာမှာ ရေးတာပါ။

မန်ချက်စတာယူနိုက်တက် ဘောလုံးအသင်းဟာ ကမ္ဘာပေါ်မှာ ပံ့ပိုးကူညီမှုအကောင်းဆုံး ဘောလုံးအသင်းတွေထဲက တခုပါ။

အင်္ဂလန်ရဲ့ စံချိန်တင် ချန်ပီယံ အကြိမ် ၂၀ နဲ့ ဂုဏ်သိက္ခာအရှိဆုံး ကလပ်တွေနဲ့ ယှဉ်ပြိုင်ရင်း ဥရောပ ချန်ပီယံဆုဖလား ၃ ကြိမ် ဆွတ်ခူးထားနိုင်ခဲ့ပါတယ်။

အမေရိကန်နိုင်ငံသား ဂလေဇာမိသားစုက ထိန်းချုပ်ထားတဲ့ မန်ယူအဖွဲ့ကို မှတ်ချက်ပေးဖို့ တောင်းဆိုပေမဲ့ ချက်ချင်း မတုံ့ပြန်သေးပါဘူး။

မန်ယူနိုက်တက် ဘောလုံးအသင်းဟာ အင်္ဂါနေ့ စတော့ဈေးကွက်ပိတ်ချိန်အထိ စျေးကွက်အရင်းအနှီး ဒေါ်လာ ၂ ဒသမ ၀၈ ဘီလီယံ ရှိထားပါတယ်။