တတိယကမ္ဘာစစ်ကြီး နီးလာပြီလို့ ရုရှားပုဂ္ဂလိက စစ်ဘက်ဆိုင်ရာကုမ္ပဏီ ဝဂ္ဂနာအုပ်စုကို တည်ထောင်သူ ယက်ဗ်ဂျေညီ ပရီဂေါ့ရှင်က ဧပြီ ၂၅ ရက်မှာထုတ်ပြန်တဲ့ ဗွီဒီယိုကနေ သတိပေးပြောပါတယ်။

ရုရှားနိုင်ငံ လုံခြုံရေးကောင်စီရဲ့ လက်ရှိ လက်ထောက်အကြီးအကဲနဲ့ ရုရှားသမ္မတဟောင်း ဒီမီထရီ မက်ဗီဒက်က အင်္ဂါနေ့ကကျင်းပတဲ့ လူငယ်ဖိုရမ်မှာ ပြောခဲ့တဲ့ အလားတူ သတိပေးချက်ကို ပရီဂေါ့ရှင်က ပဲ့တင်ထပ် ပြောဆိုလိုက်တာပါ။

ပရီဂေါ့ရှင်က အမျိုးသားတွေကို ဝဂ္ဂနာအုပ်စုမှာပါဖို့ တိုက်တွန်းခဲ့ပြီး သူ့အဖွဲ့ဝင်တွေဟာ မနေ့က သာမန်ယောက်ျားလေးတွေသာ ဖြစ်ကြပြီး ခုတော့ နိုင်ငံကို ကာကွယ်နေပြီလို့ ပြောပါတယ်။

ဝဂ္ဂနာအုပ်စုနဲ့ ပုံမှန် ရုရှားတပ်ဖွဲ့တွေဟာ ယူကရိန်းတပ်တွေ ခေါင်းမာမာနဲ့ ခုခံနေတဲ့ ဘတ်မွတ်မြို့ကို သိမ်းပိုက်ဖို့ ကြိုးပမ်းရင်း အဆုံးအရှုံးတွေ အကြီးအကျယ် ကြုံတွေ့နေရလို့ ဝဂ္ဂနာခေါင်းဆောင်ဟာ ဝန်ထမ်းအသစ်တွေ စုဆောင်းနေရတာပါ။

ဘတ်မွတ်မြို့တိုက်ပွဲဟာ ပြီးခဲ့တဲ့ သြဂုတ်လကတည်းက ပြင်းထန်ခဲ့ပြီး ဒုတိယကမ္ဘာစစ်အတွင်း စတာလင်ဂရက်ဒ်တိုက်ပွဲထက် လပေါင်းများစွာ ကြာခဲ့ပါပြီ။

ပရီဂေါ့ရှင်ဟာ ရုရှား ကာကွယ်ရေးဝန်ကြီးဌာနနဲ့ လက်နက်ကိုင်တပ်ဖွဲ့တွေရဲ့ ထိပ်တန်းအရာရှိတွေနဲ့ အဆင်မပြေဖြစ်နေပုံရပြီး ခဲယမ်းမီးကျောက်တွေ ပံ့ပိုးပေးဖို့ ပျက်ကွက်တယ်လို့ စွပ်စွဲထားပါတယ်။

သမ္မတဂျိုးဘိုင်ဒင်က ရုရှား-ယူကရိန်းစစ်ပွဲမှာ အမေရိကန်နဲ့ နေတိုးမဟာမိတ်တွေ တိုက်ရိုက်ပါဝင်လာရင် တတိယကမ္ဘာစစ်ဖြစ်သွားလိမ့်မယ်လို့ ပြောပါတယ်။

ရုရှားရဲ့တိုက်ခိုက်မှုကနေ ယူကရိန်းကို ကာကွယ်ဖို့ လေယာဉ်မပျံသန်းရဇုန် တောင်းဆိုနေသူတွေကို ဘိုင်ဒင်က အမေရိကန်ရဲ့ စစ်ပွဲတိုက်ရိုက်ပါဝင်မှုက တတိယကမ္ဘာစစ်ကို ဦးတည်သွားလိမ့်မယ်လို့ တုံ့ပြန်ပြောခဲ့တာပါ။ 

သူက “အမေရိကန် တိုက်ခိုက်ရေး စစ်လေယာဉ်တွေ တင့်ကားတွေ ပိုက်လော့တွေ စစ်သားတွေ ယူကရိန်းကို လွှတ်လိုက်ရင် တတိယကမ္ဘာစစ်လို့ ခေါ်ရတော့မှာပေါ့၊ ဒါကို အလိုရှိနေကြတာလား၊ ပေါ့ပေါ့ မစဉ်းစားပါနဲ့။ ဒါပေမဲ့ ကျနော်တို့ နေတိုးအဖွဲ့ဝင်နိုင်ငံတွေရဲ့ နယ်နိမိတ်ကိုတော့ တလက်မမှ အကျူးအကျော်မခံပါဘူး၊ နေတိုးနယ်မြေတွေအပေါ်မှာ ကြီးမားတဲ့တာဝန်ဝတ္တာရား ကျနော်တို့မှာ ရှိပါတယ်။ ယူကရိန်းမှာတော့ တတိယကမ္ဘာစစ် မစတင်နိုင်ပါဘူး” လို့ ဒီမိုကရက်ပါတီဝင်တွေနဲ့ တွေ့ဆုံပွဲမှာ ပြောခဲ့ပါတယ်။ 

အဲဒီနောက် ဘိုင်ဒင်က “ပူတင်ရဲ့ ယူကရိန်းကို စစ်ဆင်မှု မအောင်မြင်နိုင်ပါဘူး၊ ကျနော်တို့ရဲ့ ဒီမိုကရေစီ မဟာမိတ်အင်အားစုတွေက သွယ်ဝိုက်ပြီး ပုံအောကူညီနေပေးပါတယ်။ သမ္မတဇလန်းစကီးကိုလည်း ဒီနေ့ စကားပြောပြီး လိုအပ်တဲ့ စစ်ဘက်အကူအညီတွေ၊ ယူကရိန်းလူထုအတွက် လိုအပ်တဲ့ လူသားချင်းဆိုင်ရာ အကူအညီတွေ ပေးနေပါတယ်” လို့ ပြောပါတယ်။