အိန္ဒိယ-မြန်မာနယ်စပ်၊ စစ်ကိုင်းတိုင်း၊ တမူးမြို့အခြေစိုက်၊ ပကဖ တပ်ရင်းက ရဲဘော် ၂ ဦး စစ်ကောင်စီရဲ့ ပစ်ခတ်မှုကြောင့် ကျဆုံးခဲ့ရတယ်လို့ တမူး PDF က ပြောပါတယ်။
ဒီဇင်ဘာ ၂ ရက်နေ့က တမူး PDF ရဲဘော်တွေဟာ တမူးမြို့အထွက် ၄ မိုင်ကို ကင်းပုန်းချ၊ လမ်းကြောစစ်ဆေးဖို့ သွားရောက်စဉ် ပစ်ခတ်ခံရတာကြောင့် ရဲဘော်တဦး ကျဆုံးခဲ့ပြီး နောက်တဦးကတော့ မိုင်းနင်းမိ ကျဆုံးခဲ့ရတာလို့ တမူး PDF တာဝန်ရှိသူတဦးက ပြောပါတယ်။
“ကိုဒီမိုတို့တပ်ဖွဲ့ လမ်းပေါ်ထွက်တော့ စစ်သားတွေ ကင်းပုန်းကြို၀ပ်ပြီး ပစ်တာ ကိုဒီမိုထိပြီး ပြန်ဆုတ်မရလို့ အဖွဲ့ထဲက တယောက်က စစ်ကူခေါ်တာ သွားတာမှာ မိုင်းမိသွားတာ။ တယောက်က ပွဲချင်းပြီး ဆုံးသွားတယ်။ တယောက်က တခါတည်းမသေဘူး၊ ဒရွတ်တိုက်ဆုတ်ခဲ့သေးတယ်။ ဘယ်လိုမှ မရလို့ ထားခဲ့ကြရတာ။ စစ်သားတွေ ဝင်စီးတော့ အဲ့နှစ်ယောက်ကို ခေါင်းကိုအနီးကပ်ပစ်သွားတာပါ။"
အဆိုပါ ပကဖ ရဲဘော် ၂ ဦး ကျဆုံးသွားတဲ့အတွက် လွန်စွာမှ စိတ်မကောင်းဖြစ်ရပြီး စစ်အာဏာရှင်ကို အမြစ်ပြတ်သည်အထိ တိုက်ခိုက်ချေမှုန်းသွားမယ်လို့ တမူး PDF အဖွဲ့ဝင်တဦးက ပြောပါတယ်။
နိုဝင်ဘာ ၁၅ ရက်နေ့ကလည်း အိန္ဒိယ-မြန်မာနယ်စပ်တလျှောက် တမူးမြို့နယ်တောင်ပိုင်းမှာ အခြေချထားတဲ့ တမူးပြည်သူ့ကာကွယ်ရေး မဟာမိတ်စခန်း ၆ ခုကို စစ်ကောင်စီတပ်သားတွေက သိမ်းပိုက်ခဲ့ပါသေးတယ်။
အိန္ဒိယ-မြန်မာနယ်စပ်၊ စစ်ကိုင်းတိုင်း၊ တမူးမြို့တွင်းကနေ စစ်ကောင်စီတပ်ဖွဲ့ဝင်တွေက ဒေသခံကာကွယ်ရေးတပ်ဖွဲ့ဝင်တွေ စစ်ဆေးရေးလုပ်နေတဲ့ နေရာဘက်ကို နိုဝင်ဘာ ၁၄ ရက်က လက်နက်ကြီးတွေနဲ့ အဆက်မပြတ် ပစ်ခတ်ခဲ့လို့ တမူး PDF ရဲဘော် ၁ ဦးကျဆုံးသွားပါတယ်။
စစ်ကောင်စီဘက်က လက်နက်ကြီးနဲ့ စတင်ပစ်ခတ်ခဲ့တာကြောင့် မိမိတို့ တပ်ဖွဲ့ဝင်တွေဘက်ကလည်း လက်နက်ကြီးတွေနဲ့ ပြန်လည်ပစ်ခတ်ခဲ့တယ်လို့ တမူး PDF တာဝန်ခံက ဒီဗွီဘီကို ပြောပါတယ်။
“ကျနော်တို့ဘက်က ပကဖတပ်ရင်းက ရဲဘော်တယောက် လက်နက်ကြီးထိမှန် ကျဆုံးသွားတယ်။ ကျန်တဲ့အဖွဲ့ဝင်တွေ ကျဆုံးတာတော့ မရှိဘူး။ အနီးကပ်တိုက်ပွဲတော့ မဟုတ်ဘူး။ လက်နက်ကြီးနဲ့ အပြန်အလှန် ပစ်ခတ်ကြတာ။ သူတို့ဘက်က ကျနော်တို့ကို ကြားညှပ်ပစ်သလို ဖြစ်သွားတာပေါ့။ သူတို့တွေနေထိုင်တဲ့ တပ်ကုန်း၊ ၄ မိုင် စစ်ဆေးရေးဂိတ်နဲ့ မြေနီကုန်းက ပျူစောထီးတွေ စုပေါင်းပြီး ပစ်ခတ်ခဲ့ကြတာ။ သူတို့တွေ လက်နက်သယ်ယူဖို့ လမ်းရှင်းဖို့အတွက် လက်နက်ကြီးတွေနဲ့ ပစ်ခတ်တာ။ သူတို့ဘက်ကို လက်နက်ကြီး ပြန်ပစ်ခဲ့ပေမဲ့ သူတို့ဘက်က ထိခိုက်ကျဆုံးတဲ့ အခြေအနေတော့ မသိရဘူး။”
အခုရက်ပိုင်း တိုက်ပွဲတွေ ဆက်တိုက်ဖြစ်ပွားနေတာကြောင့် မိဘပြည်သူတွေအနေနဲ့ တတ်နိုင်တဲ့ဘက်က ဝိုင်းဝန်းကူညီကြဖို့လည်း တမူး PDF က မေတ္တာရပ်ခံထားပါတယ်။
တမူးမြို့နယ်အတွင်းမှာ စစ်ကောင်စီတပ်တွေနဲ့ ဒေသခံ ကာကွယ်ရေးတပ်ဖွဲ့တွေကြား တိုက်ပွဲတွေ မကြာခဏရှိပြီး စစ်ကောင်စီက တမူးမြို့နယ်ကို အင်တာနက်လိုင်း ဖြတ်တောက်ထားတာ ၈ လကျော် ကြာမြင့်နေပြီလည်းဖြစ်ပါတယ်။
တမူးမြို့နယ်မှာ စစ်အာဏာသိမ်းပြီးချိန်ကစပြီး ဇွန်လကုန်အထိ အရပ်သားပြည်သူ ၁၉ ဦးထက်မနည်း သတ်ဖြတ်ခံခဲ့ရပြီး ဖမ်းဆီးခံရသူ ၆ ဦးထက်မနည်း ရှိလာကာ မီးရှို့ဖျက်ဆီးခံရတဲ့ အိမ်ခြေလည်း ၁၉ လုံးထက်မနည်း ရှိလာပြီလို့ ကူကီးကျောင်းသားလူငယ် အဖွဲ့အစည်းက ထုတ်ပြန်ထားပါတယ်။
