ထိုင်ဝမ်ရေလက်ကြားမှာ စစ်ရေးတင်းမာမှုတွေ မြင့်တက်နေတုန်း တရုတ်စစ်တပ်က ထိုင်ဝမ်ပိုင်နက်နဲ့နီးတဲ့ နေရာတွေထဲကို ရုတ်တရက် ဝင်လာလို့ အခုနှစ်ထဲမှာ တပ်လှန့်ထားရတယ်လို့ ထိုင်ဝမ်ကာကွယ်ရေးဝန်ကြီး ချူကွာချန်က မတ် ၆ ရက်မှာ သတိပေးခဲ့ပါတယ်။

လွှတ်တော်အမတ်တွေရဲ့ မေးခွန်းတွေကို ဖြေရာမှာ ချူက တရုတ်ပြည်သူ့လွတ်မြောက်ရေး တပ်မတော် (PLA) ဟာ ထိုင်ဝမ်ရဲ့ လေကြောင်းနဲ့ ပင်လယ်ပြင်နားက ပိုင်နက် နယ်မြေတွေထဲကို ဝင်ဖို့ ဆင်ခြေရှာနိုင်တယ်လို့ ပြောပါတယ်။

ထိုင်ဝမ်ကျွန်းဟာ အမေရိကန်နဲ့ စစ်ရေးအရ အလဲအလှယ်တွေ တိုးလုပ်လာတဲ့အတွက် တရုတ်ပြည်မကြီးအစိုးရက ဒေါသထွက်နေတာပါ။

တရုတ်နိုင်ငံဟာ ထိုင်ဝမ်ကိုသိမ်းဖို့ အနာဂတ်မှာ “အင်အားသုံး” လာနိုင်ပါတယ်။ ထိုင်ဝမ်က သူ့ပိုင်နက်ထဲကို တရုတ်လက်နက်ကိုင်တပ်ဖွဲ့တွေ ဝင်လာရင် မိမိကိုယ်မိမိ ကာကွယ်ဖို့  တန်ပြန်တိုက်ခိုက်ပိုင်ခွင့်ကို ကျင့်သုံးသွားမယ်လို့ ကတိပြုထားပါတယ်။

တရုတ်နိုင်ငံဟာ ကိုယ်ပိုင်အုပ်ချုပ်နေတဲ့ ထိုင်ဝမ်ကို သူ့ပိုင်နက်အဖြစ် အခိုင်အမာ ပြောဆိုထားပြီး လိုအပ်ရင် ထိုင်ဝမ်ကျွန်းကို တရုတ်ထိန်းချုပ်မှုအောက် အရောက်သွင်းဖို့ အင်အားသုံးမယ့် နည်းလမ်းကို မပစ်ပယ်ထားပါဘူး။

တရုတ်စစ်တပ်ကို လေ့ကျင့်ပေးဖို့ အကူအညီတောင်းခံခဲ့တဲ့ အနောက်နိုင်ငံက စစ်လေယာဉ်မှူးတွေထဲမှာ ဩစတြေးလျနိုင်ငံသားတွေလည်း ပါဝင်နေကြောင်း အစီရင်ခံစာတွေ ထွက်လာပြီးနောက် သြစတြေးလျအစိုးရဟာ နိုင်ငံတော်ရဲ့ လျှို့ဝှက်ချက် တွေကို ကာကွယ်ရမယ့် ကာကွယ်ရေးတပ်ဖွဲ့ဝင်ဟောင်းတွေရဲ့ တာဝန်ဝတ္တရားတွေကို ပြန်လည်သုံးသပ်တော့မှာဖြစ်ကြောင်း နိုဝင်ဘာ ၉ ရက်က ပြောလိုက်ပါတယ်။

ထောက်လှမ်းရေးအေဂျင်စီတွေနဲ့ ဩစတြေးလျ ဖက်ဒရယ်ရဲတပ်ဖွဲ့တို့ဟာ သြစတြေးလျက အမှုကိစ္စတွေကို စုံစမ်းစစ်ဆေးနေကြောင်း ကာကွယ်ရေးဝန်ကြီး ရစ်ချတ်ဒ် မားလ်စ်က ပြောကြားပြီး သြစတြေးလျကာကွယ်ရေးတပ်က ဝန်ထမ်းတွေကို အုပ်ချုပ်တဲ့ မူဝါဒနဲ့ လုပ်ထုံးလုပ်နည်းတွေကို ပြန်လည်သုံးသပ်ကြောင်း ကြေညာခဲ့ပါတယ်။

သြစတြေးလျ ကာကွယ်ရေးတပ်ဖွဲ့မှာ အမှုထမ်းကြတဲ့ ဒါမှမဟုတ် ဓနသဟာယရဲ့ တခြားနိုင်ငံတခုခုမှာ တာဝန်ထမ်းဆောင်ကြတဲ့ ဒီနိုင်ငံရဲ့ လျှို့ဝှက်ချက်တွေကို ပိုင်ဆိုင်ထားသူတွေအတွက် အဲဒီလျှို့ဝှက်ချက်ကို ရေရှည်ထိန်းသိမ်းထားဖို့ တာဝန်ရှိတယ်လို့ မားလ်စ်က မီဒီယာညီလာခံမှာ ပြောကြားခဲ့ပါတယ်။

နယူးဇီလန် ကာကွယ်ရေးတပ်ဖွဲ့ဟာ အရင် စစ်ဘက်လေယာဉ်မှူးတွေကို လေ့ကျင့်ပေးနေတဲ့ နိုင်ငံခြားစစ်လေယာဉ်မှူးတွေကို ရပ်တန့်ဖို့ ဥပဒေတွေ လိုအပ်ခြင်း ရှိ မရှိ နယူးဇီလန် ကာကွယ်ရေးဝန်ကြီးကလည်း အကြံဉာဏ် တောင်းခံထားကြောင်း ဝန်ကြီးချုပ်ရုံးမှ ပြောရေးဆိုခွင့်ရှိသူတဦးက ပြောကြားခဲ့ပါတယ်။