မြောက်ကိုရီးယားက  ဖေဖော်ဝါရီ ၂၆ ရက်နဲ့ မတ်လ ၄ ရက်နေ့တွေမှာ ပစ်လွှတ်စမ်းသပ်ခဲ့တာဟာ တိုက်ချင်းပစ် ပဲ့ထိန်းဒုံးကျည် ICBM စနစ်သစ်တွေ ဖြစ်တယ်လို့ အမေရိကန်သမ္မတ ဂျိုးဘိုင်ဒင် အစိုးရရဲ့ အကြီးတန်းအရာရှိတယောက်က မတ်လ ၁၀ ရက်မှာ ပြောပါတယ်။

ဒါဟာ တကမ္ဘာလုံးက ညီညီညွတ်ညွတ် တုံ့ပြန်ဖို့လိုတဲ့ အသည်းအသန် အရေးကြီးပြီး ပိုကျယ်ပြန့် ပြင်းထန်လာတဲ့ စိန်ခေါ်မှုလို့လည်း သူက ခေါ်ဝေါ်လိုက်ပါတယ်။

အမည်မဖော်တဲ့ အမေရိကန်အရာရှိက  "ဒီစနစ်သစ်ထဲမှာ ICBM အရည်အသွေးကို စွမ်းဆောင်နိုင်တဲ့ အခြေခံအချက်တွေ ပါပေမဲ့ ပစ်လွှတ်ချိန်မှာ အဲဒီစနစ်ကို သရုပ်ပြသုံးစွဲတာ မလုပ်ခဲ့ဘူး၊ ဒါဟာ အပြည့်အဝ ပစ်လွှတ်စမ်းသပ်တာ မလုပ်ခင် စနစ်ရဲ့ အစိတ်အပိုင်းတွေကို စမ်းသပ်ဖို့ ရည်မှန်းတာ ဖြစ်ပုံရပြီး အာကာသလွှတ်တင်ရေးအဖြစ် ရုပ်ဖျက်ဖို့ အလားအလာ ဖြစ်နိုင်တယ်" လို့ သတင်းထောက်တွေကို ပြောပါတယ်။

၂၀၂၀ အောက်တိုဘာလက မြောက်ကိုရီးယား မြို့တော် ပြုံယမ်းမှာ စစ်ရေးပြပွဲအတွင်း ခင်းကျင်းပြသခဲ့တဲ့ ဒုံးကျည်စနစ်ကို မြင်ခဲ့ဖူးပါတယ်။ ခေါင်းဆောင် ကင်မ်ဂျွန်အန်းနဲ့ တခြား အကြီးတန်း အရာရှိတွေက အလေးပြုခဲ့ပြီး အလံတွေ ဝှေ့ယမ်းနေတဲ့ လူအုပ်ကို ဖြတ်သန်းရင်း ဒုံးကျည်တွေကို သယ်ဆောင်သွားခဲ့တာပါ။

မြောက်ကိုရီးယားဟာ အမေရိကန်နဲ့ မဟာမိတ်တွေရဲ့ စစ်ရေးလှုပ်ရှားမှုတွေနဲ့ ပတ်သက်ပြီး အချိန်နဲ့တပြေးညီ သတင်းအချက်အလက်တွေ ရဖို့ လာမယ့်နှစ်တွေမှာ ကင်းထောက်ဂြိုဟ်တုတွေ ပစ်လွှတ်သွားမယ်လို့ ကင်မ်ဂျွန်အန်းကို ကိုးကားပြီး မြောက်ကိုရီးယားအစိုးရ မီဒီယာက မနေ့က ကြေညာခဲ့ပါတယ်။

မိနစ်မဲန်း သရီးလို့ နာမည်ပေးထားတဲ့ တိုက်ချင်းပစ် ပဲ့ထိန်းဒုံးကျည် ပစ်လွှတ်စမ်းသပ်ဖို့ အစီအစဉ်ကို ရွှေ့ဆိုင်းလိုက်တယ်လို့ အမေရိကန်စစ်တပ်က မတ်လ ၂ ရက်မှာ ပြောပါတယ်။

ရုရှားက သူ့ရဲ့ နျူကလီးယားတပ်တွေကို တပ်လှန့်ထားလိုက်ပြီလို့ ကြေညာအပြီး တင်းမာမှု မြင့်လာတာကို လျော့ကျစေဖို့ ရွှေ့ဆိုင်းတာလို့ ဆိုပါတယ်။

ယူကရိန်းကို ရုရှားက ကျူးကျော်စစ်ဟာ နျူကလီးယား စစ်ပွဲအထိ ဦးတည်သွားစေနိုင်တယ်ဆိုတဲ့ စိုးရိမ်ချက်တွေကို မီးလောင်ရာ လေပင့်တဲ့ အနေနဲ့ ရုရှားသမ္မတ ဗလာဒီမီယာ ပူတင်က သူ့နျူကလီးယားတပ်တွေကို တပ်လှန့်မှု အဆင့်မြှင့်ကြောင်း သီတင်းပတ်ကုန်ရက်က ကြေညာခဲ့ပါတယ်။ဒါဟာ အနောက်နိုင်ငံတွေကို ခြိမ်းခြောက်မှုအဖြစ် ဥရောပအရာရှိတချို့က ယူဆခဲ့ကြပါတယ်။

ရုရှား နိုင်ငံခြားရေးဝန်ကြီး ဆာဂီလ် လာ့ဗ်ရော့ဗ်ကလည်း တတိယကမ္ဘာစစ်ဟာ နျူကလီးယားစစ်ပွဲ ဖြစ်လာနိုင်တယ်လို့ မတ် ၂ ရက်နေ့က သတိပေးခဲ့ပါတယ်။

ရုရှားရဲ့လုပ်ရပ်ကို အမေရိကန်ရဲ့ ပင်တဂွန် စစ်ဌာနချုပ်ကလည်း အပြင်းအထန် ဝေဖန်လိုက်ပြီး သူ့ရဲ့ တိုက်ချင်းပစ် ပဲ့ထိန်းဒုံးကျည် စမ်းသပ်ချက်ဆိုင်ရာ ဆုံးဖြတ်ချက်ဟာ ရုရှားအတွက် ဥပမာဖြစ်လိမ့်မယ်လို့ ပြောခဲ့ပါတယ်။

နျူကလီးယားလက်နက် တပ်ဆင်နိုင်စွမ်းရှိတဲ့ မိနစ်မဲန်းသရီးဟာ အမေရိကန်စစ်တပ်ရဲ့ ဗျူဟာမြောက် လက်နက်တိုက်မှာ အဓိက အစိတ်အပိုင်းဖြစ်ပြီး မိုင် ၆,၀၀၀ အကွာအဝေးကို ပစ်ခတ်နိုင်စွမ်းရှိသလို ၁ နာရီ မိုင် ၁ သောင်းခွဲနှုန်းနဲ့ ပျံသန်းနိုင်ပါတယ်။

ဒုံးကျည်ပစ်လွှတ်ရေး တပ်ဖွဲ့ဝင်တွေက ဒုံးကျည်တွေကို မြေအောက် သိုလှောင်ရုံတွေထဲမှာ ဖြန့်ကျက် တပ်ချထားပါတယ်။

ရုရှား နျူကလီးယား ဒုံးကျည်တပ်ဖွဲ့၊ မြောက်ပိုင်းနဲ့ ပစိဖိတ် တပ်မဟာတို့က ပူတင်ဆီက အမိန့်အတိုင်း တိုက်ခိုက်ရေးတာဝန် တိုးမြှင့်ချထားပြီးပြီလို့ ရုရှား ကာကွယ်ရေးဝန်ကြီးဌာနက ဖေဖော်ဝါရီ ၂၈ ရက်မှာ ပြောခဲ့ပါတယ်။

ရုရှားရဲ့ ကြေညာချက် နောက်ပိုင်းမှာ အမေရိကန်သမ္မတ ဂျိုးဘိုင်ဒင် အစိုးရကတော့ ရုရှားရဲ့ ဘယ်လုပ်ရပ်ကိုမှ အတည်မပြုခဲ့ပါဘူး။ အမေရိကန်တွေဟာ နျူကလီးယားစစ်ပွဲနဲ့ ပတ်သက်ပြီး မစိုးရိမ်သင့်ဘူးလို့ အမေရိကန်သမ္မတ ဂျိုးဘိုင်ဒ ၏င်က ဆိုပါတယ်။

အမေရိကန်အစိုးရဟာ ကာကွယ်ရေး ရပ်တည်ချက်အရ သက်တောင့်သက်သာ ရှိနေတယ်လို့ အမေရိကန် နိုင်ငံခြားရေးဝန်ကြီး အန်ထော်နီ ဘလင်ကန်က မတ် ၂ ရက်နေ့မှာ ပြောခဲ့ပါတယ်။