ရည်မှန်းချက်တွေ ပြည့်ဝဖို့အတွက် မန်စီးတီးအသင်းဆီ ပြောင်းရွှေ့လာတာဖြစ်ကြောင်း တိုက်စစ်မှူးသစ်ဟာလန်းက ပြောပါတယ်။
မန်စီးတီးအသင်းနဲ့ တရားဝင်လက်မှတ်ထိုး၊ စာချုပ်ချုပ်ဆိုအပြီးမှာ ပြုလုပ်ခဲ့တဲ့ ပထမဆုံး အင်တာဗျူးမှာ မန်စီးတီးအသင်းဆီ ပြောင်းရွှေ့လာတဲ့အပေါ် ဟာလန်းက ပြောခဲ့တာပါ။
မန်စီးတီးအသင်းဟာ နော်ဝေတိုက်စစ်မှူး ဟာလန်းအတွက် ပေါင် ၅၁.၂ သန်း ပေးချေခဲ့ပြီး ၂၀၂၇ ခုနှစ်အထိ စာချုပ်ချုပ်ဆိုခဲ့ပါတယ်။
မန်စီးတီးအသင်းဆီ ပြောင်းရွှေ့ခွင့်ရတာက ဂုဏ်ယူစရာဖြစ်ပြီး ရည်မှန်းချက်တွေပြည့်ဝဖို့ မှန်ကန်တဲ့ ရွေးချယ်မှုဖြစ်ကြောင်း ဟာလန်းက ပြောပါတယ်။
“စီးတီးရဲ့ ကစားပုံကို ပြီးခဲ့တဲ့ရာသီတွေကတည်းက အမြဲတမ်းကြည့်ရှုခဲ့တယ်။ အသင်းရဲ့ကစားပုံက စိတ်လှုပ်ရှားစရာကောင်းပြီး အခွင့်အရေးတွေလည်း အများကြီးဖန်တီးနိုင်တာတွေ့ရပါတယ်။ ဒီ အချက်က ကျနော့်လို တိုက်စစ်မှူးအတွက်တော့ ပြီးပြည့်စုံတဲ့အချက်ပါပဲ။ ကမ္ဘာ့အဆင့် ကစားသမားတွေလည်းရှိပြီး အကောင်းဆုံးနည်းပြလည်းရှိနေတော့ ကျနော့်ရည်မှန်းချက်တွေ ပြည့်ဝေဖို့အတွက် မှန်ကန်တဲ့နေရာလို့ ယုံကြည်ပါတယ်။”
ဟာလန်းရဲ့ ဖခင်ဖြစ်သူဟာလည်း ၂၀၀၀ ပြည့်နှစ်ကနေ ၂၀၀၃ ခုနှစ်အထိ မန်စီးတီးမှာ ပါဝင် ကစားခဲ့ဖူးပါတယ်။
အသက် ၂၁ နှစ်ရှိ နော်ဝေတိုက်စစ်မှူးဟာ ဒေါ့မွန်အသင်းမှာ စုစုပေါင်း ၈၉ ပွဲ ကစားခဲ့ရာမှာ ၈၆ ဂိုးအထိ သွင်းယူနိုင်ခဲ့ပါတယ်။
တိုက်စစ်မှူးသစ်ခေါ်ယူနိုင်ဖို့အတွက် နည်းလမ်းပေါင်းစုံနဲ့ ကြိုးပမ်းနေတယ်လို့ ဘိုင်ယန်မြူးနစ် အားကစားဒါရိုက်တာ ဆာလီဟမ်မစ်ဆစ်က ပြောပါတယ်။
ဘိုင်ယန်ဟာ လီဗာပူးတိုက်စစ်မှူး မာနေးကို ခေါ်ယူနိုင်ဖို့အတွက် ကမ်းလှမ်းချက် နှစ်ကြိမ်စလုံး ပယ်ချခံထားရပေမဲ့ ပစ်မှတ်တခုတည်းကို အာရုံစိုက်ထားတာမဟုတ်ဘဲ နည်းလမ်းပေါင်းစုံ အသုံးပြုပြီး တိုက်စစ်မှူးတွေခေါ်ယူဖို့လုပ်နေတယ်လို့ ဘိုင်ယန်အားကစားဒါရိုက်တာက ပြောပါတယ်။
အားကစားဒါရိုက်တာ ဆာလီဟမ်မစ်ဆစ်က“တိုက်စစ်ပိုင်းအတွက် နည်းလမ်းပေါင်းစုံနဲ့ လုပ်ဆောင်နေတယ်။ အပြောင်းအရွှေ့ဈေးကွက်မှာ လှုပ်ရှားရတာက လွယ်တော့မလွယ်ကူပါဘူး။ အသင်းရဲ့ဘဏ္ဍာရေးအခြေအနေအပေါ် အမြဲတမ်းမူတည်တယ်။ တခြားအသင်းက ကစားသမားတွေနဲ့ ပတ်သက်လို့ ကျနော် မှတ်ချက်မပေးချင်ဘူး။ သေချာတာကတော့ ကစားသမားတစ်ဦးအပေါ်မှာပဲ အာရုံစိုက်နေတာမျိုးမဟုတ်ဘဲ တိုက်စစ်မြှင့်တင်နိုင်ဖို့ တခြားနည်းလမ်းပေါင်းစုံနဲ့ လုပ်ဆောင်နေတယ်ဆိုတာပါပဲ” လို့ ပြောပါတယ်။
ဘိုင်ယန်အသင်းမှာ တိုက်စစ်မှူး လီဝန်ဒေါစကီးက အသင်းပြောင်းမယ်လို့ အတည်ပြုထားလို့ တိုက်စစ်မှူးသစ် မဖြစ်မနေခေါ်ယူဖို့ ကြိုးပမ်းနေတာဖြစ်ပါတယ်။
