ပီအက်စ်ဂျီတိုက်စစ်မှူး မက်ဆီရဲ့ ခြေစွမ်းဟာ လာမယ့်ရာသီရောက်မှ ပိုကောင်းလာမယ်လို့ နည်းပြ ပိုချက်တီနိုက ပြောပါတယ်။
မက်ဆီဟာ အခုနှစ်ရာသီမှာ ပြင်သစ်လိဂ်ကို ပြောင်းရွှေ့လာပြီးနောက် လိဂ်ပြိုင်ပွဲမှာ သွင်းဂိုး ၄ ဂိုးသာ သွင်းယူထားပါတယ်။
လေ့လာသူတချို့က မက်ဆီရဲ့ စွမ်းဆောင်ရည်အပေါ် ဝေဖန်မှုတွေရှိပေမယ့် နည်းပြပိုချက်တီနိုက တော့ ကစားသမားဘက်ကနေ ကာကွယ်သွားခဲ့ပြီး နယ်မြေသစ်တခုမှာ အသားကျဖို့ အချိန်ယူရ နိုင်ကြောင်း ပြောပါတယ်။
ဘာစီလိုနာကနေ ပဲရစ်ကို ပြောင်းရွှေ့လာတာက ကြီးမားတဲ့ အပြောင်းအလဲတခုဖြစ်ပြီး အသားကျဖို့က လိုအပ်တဲ့လုပ်ငန်းစဉ်တခု ဖြစ်တယ်လို့ ပိုချက်တီနိုက ပြောပါတယ်။
“အခြေအနေတွေက သူနှစ်ပေါင်း ၂ဝ လောက် ဖြတ်သန်းလာခဲ့တဲ့ ဘာစီလိုနာမှာလို သက် သောင့်သက်သာလုပ်ပြနိုင်ခဲ့တဲ့ ခံစားချက်မရှိနိုင်ပါဘူး။ ဒီအချိန်မှာ မက်ဆီကို ဝေဖန်သုံးသပ်မှုတွေက မျှတမှုမရှိပါဘူး။ သူ့ရဲ့အရည်အသွေးအပေါ်မှာ သံသယဖြစ်စရာမရှိဘူး။ သူက မာရာဒိုနာ လို အဆင့်အတန်းရှိသူပါ။ လာမယ့်ရာသီမှာဆိုရင် သူ့အတွက် အလွန်ကွဲပြားခြားနားတဲ့ ရာသီဖြစ် လာလိမ့်မယ်။”
မက်ဆီဟာ ပီအက်စ်ဂျီအသင်းမှာ ဂိုးသွင်းယူရတာထက်စာရင် ဂိုးဖန်တီးမှုအပိုင်းကို ပိုမို လုပ်ဆောင်ရပြီး လီဂူးဝမ်းမှာ ၄ ဂိုးပဲရပေမယ့် ဂိုးဖန်တီးမှု ၁၃ ကြိမ်အထိ ပြုလုပ်ထားပါတယ်။
ပီအက်စ်ဂျီအသင်း တိုက်စစ်မှူး လီယိုနယ်မက်ဆီဟာ ကိုဗစ်-၁၉ ရောဂါကူးစက်ခံ နေရတယ်လို့ အသင်းတာဝန်ရှိသူတွေက အတည်ပြုပြောပါတယ်။
မက်ဆီနဲ့ အတူ ကစားဖော် ပီအက်စ်ဂျီအသင်းသား ၄ ယောက်မှာ ကိုဗစ်-၁၉ ရောဂါ စစ်ဆေးတွေ့ရှိတာပြီး သူတို့ ၄ ယောက်စလုံးကို သီးသန့်စီ ခွဲနေခိုင်းထားတယ်လို့လည်းဆိုပါတယ်။
လတ်တလော မက်ဆီဟာ ဆောင်းရာသီအားလပ်ရက် အာဂျင်တီးနားနိုင်ငံမှာပဲ ဆက်ရှိနေမှာဖြစ်ပြီး ရောဂါစစ်ဆေးလို့ မပျောက်မချင်း ခရီးထွက်မှာ မဟုတ်ဘူးလို့လည်း ပီအက်စ်ဂျီ နည်းပြ ပိုချက်တီနိုက မနေ့က သတင်းစာရှင်းလင်းပွဲမှာ ပြောပါတယ်။
ပီအက်စ်ဂျီတိုက်စစ်မှူး မက်ဆီဟာ ပြီးခဲ့တဲ့နွေရာသီက ဘာစီလိုနာကနေ ပီအက်စ်ဂျီအသင်းကို ပြောင်းရွှေ့ခဲ့ပြီး ၂၀၂၃ ခုနှစ် နွေရာသီမှာ စာချုပ်သက်တမ်းကုန်ဆုံးမှာပါ။
မက်ဆီကတော့ အနာဂတ်မှာ အမေရိကန်မေဂျာလိဂ်ဆီကို ပြောင်းရွှေ့ကစားနိုင်တယ်လို့ ပြောထားပါတယ်။
ကစားသမားဘဝကနေ အနားမယူခင်ကာလ မေဂျာလိဂ်မှာ ဘယ်လိုအတွေ့အကြုံ၊ အဆင့်အတန်းမျိုးရှိသလဲဆိုတာ လေ့လာချင်သေးပြီး အပြောင်းရွှေ့ဖြစ်မလားဆိုတာကတော့ မသိနိုင်ကြောင်း မက်ဆီက Mirror သတင်းစာကို ပြောပါတယ်။
“ကျနော့်ကစားသမားဘဝနောက်ပိုင်းကာလမှာ ပြောင်းရွှေ့ကစားချင်တယ်။ ဒါပေမဲ့ ဒါက ဖြစ်လာမလား၊ မလာဘူးလားဆိုတာကတော့ ကျနော်လည်း မသိပါဘူး” လို့ မက်ဆီကပြောပါတယ်။
မက်ဆီဟာ ဒေးဗစ်ဘက်ခမ်းပိုင်ဆိုင်တဲ့ အင်တာမီယာမီအသင်း၊ မန်စီးတီးအသင်းနဲ့ မွေးရပ်မြေကလပ် နယူးဝဲလ်အိုးဘွိုင်းအသင်းတွေဆီ ပြောင်းရွှေ့ကစားနိုင်တယ်လို့ သတင်းထွက်ခဲ့ဖူးပါတယ်။
