ဂျူဗင်တပ်စ်အသင်းရှုံးပွဲနဲ့ ကြုံတွေ့ခဲ့ရတာဟာ သူ့ရဲ့အမှားတွေကြောင့်ဖြစ်ပြီး အားလုံးကို တောင်းပန်တယ်လို့ ဒီမာရီယာက ပြောပါတယ်။
ဂျူဗင်တပ်အသင်းဟာ နောက်ဆုံး ၄ ပွဲဆက်တိုက်နိုင်ပွဲပျောက်ခဲ့တာကြောင့် မွန်ဇာနဲ့ပွဲစဉ်ဟာ အနိုင်သုံးမှတ်ရဖို့ အရေးပါခဲ့တာပါ
ဒါပေမဲ့ ပွဲချိန်မိနစ် ၄၀ မှာ တောင်ပံကစားသမား ဒီမာရီယာထုတ် ပယ်ခံခဲ့ရပြီးနောက် ဒုတိယပိုင်း ပွဲချိန် ၇၅ မိနစ်မှာ အနိုင်ဂိုးပေးလိုက်ရပြီး တစ်ဂိုး ဂိုးမရှိနဲ့ ရှုံးပွဲတွေ့ခဲ့ရတာပါ။ အသင်းရဲ့ရှုံးပွဲနဲ့ပတ်သက်လို့ ဘယ်သူ့ကိုမှ အပြစ်တင်ဖို့မလိုအပ်ဘဲ မိမိရဲ့အမှားတွေကြောင့်သာဖြစ် ကြောင်း၊မွန်ဇာနဲ့ပွဲက မသင့်လျော်တဲ့ဖြစ်ရပ်အတွက် အားလုံးကိုတောင်းပန်လိုကြောင်း ဒီမာရီယာက သူ့ရဲ့အင်စတာဂရမ်ကနေတဆင့် ပြောပါတယ်။
ဒီမာရီယာက “တစ်ယောက်လျော့နဲ့ အသင်းကိုထားရစ်ခဲ့ရတာက ပွဲကို အလှည့်အပြောင်းဖြစ်စေပြီး ခက်ခဲစေခဲ့တယ်။ ရှုံးပွဲက ကျနော့်အမှားတွေကြောင့်ပါပဲ။ စိတ်မကောင်းပါဘူး။ ပရော်ဖက်ရှင်နယ်ကစားသမားဆိုပေမဲ့ တခါတလေမှာတော့ အမှားတွေပြုလုပ်မိခဲ့တယ်” လို့ ပြောပါတယ်။
အာဂျင်တီးနားတောင်ပံကစားသမားဟာ အခုနှစ်ရာသီကမှ ပီအက်စ်ဂျီကနေ ဂျူဗင်တပ်စ်အသင်းဆီ ရွှေ့လာခဲ့သူဖြစ်ပါတယ်။
ဘရိုက်တန်အသင်းကို အရှက်ရစရာရှုံးနိမ့်ခဲ့မှုအတွက် အသင်းပရိသတ်တွေအား တောင်းပန်ကြောင်း နည်းပြ ရင်းနစ်ခ်က ပြောပါတယ်။
မန်ယူအသင်းဟာ ဘရိုက်တန်အသင်းကို ၄ ဂိုး ဂိုးမရှိနဲ့ရူံးနိမ့်ခဲ့ပြီး ခြေစွမ်းပြသနိုင်ခြင်း လည်းမရှိတဲ့အပေါ် အရှက်ရစရာဖြစ်ခဲ့ပြီး ပရိသတ်တွေကို တောင်းပန်ရုံသာရှိတယ်လို့ နည်းပြ ရင်းနစ်ခ်က ပြောခဲ့တာပါ။
“မှန်ပါတယ်။ ပထမဆုံးမိနစ်ကနေ နောက်ဆုံမိနစ်အထိ ခြေစွမ်းဆိုးရွားခဲ့ပါတယ်။ နေရာတိုင်းမှာ လုံလောက်မှုမရှိခဲ့ပါဘူး။ အလွန်ဆိုးရွားတဲ့စွမ်းဆောင်ရည်ဖြစ်ခဲ့ပြီး အရှက်စရာရှုံးနိမ့်မှုဖြစ်ခဲ့တယ်” လို့ ပွဲအပြီးမှာ နည်းပြရင်းနစ်ခ်က ပြောပါတယ်။
ယူနိုက်တက်အသင်းဟာ လက်ကျန်တပွဲသာကျန်ရှိတော့ချိန်မှာ ရမှတ် ၅၈ မှတ်သာရရှိထားပြီး ၆၄ မှတ်ရခဲ့တဲ့ ၂၀၁၃-၂၀၁၄ ဘောလုံး ရာသီ နောက်ပိုင်းမှာ ရမှတ်အနည်းဆုံးရာသီအဖြစ် မှတ်တမ်းဝင်ခဲ့ပါတယ်။
ဒါ့အပြင် ပေးဂိုး ၅၆ ဂိုးအထိ ပေးထားရတာကြောင့် ၆၃ ဂိုးပေးခဲ့ရတဲ့ ၁၉၇၈-၁၉၇၉ ဘောလုံးရာသီနောက်ပိုင်း ပေးဂိုး အများဆုံးရာသီအဖြစ် မှတ်တမ်းဝင်သွားခဲ့ပါတယ်။
ဒါ့အပြင် အဝေးကွင်း ၅ ပွဲဆက်တိုက်ရှုံးနိမ့်ခဲ့တာကြောင့် ၆ ပွဲဆက်ရူံးခဲ့တဲ့ ၁၉၈၁ ခုနှစ် နောက်ပိုင်း နှစ်ပေါင်း ၄ဝ ကျော်အတွင်း ပထမဆုံးအကြိမ် အဝေးကွင်းပွဲဆက်အများဆုံး ရှုံးနိမ့်ခဲ့ရပါတယ်။
