ကိုလံဘီယာနိုင်ငံအနောက်ပိုင်း ကောက်ကာချိုင့်ဝမ်းဒေသမှာ ဧပြီလ ၁၂ ရက်က တံတားပြိုကျမှုကြောင့် လူ ၂ ဦး သေဆုံးပြီး ၁၅ ဦး ဒဏ်ရာရရှိခဲ့ကြောင်း ဒေသတွင်း မီဒီယာတွေမှာ ဖော်ပြပါတယ်။

သေဆုံးသူ ၂ ဦး စလုံးဟာ အမျိုးသားရဲတပ်ဖွဲ့မှ ရဲအရာရှိတွေ ဖြစ်ကြပြီး သူတို့စီးလာတဲ့ကားဟာ မြစ်ထဲကိုပြုတ်ကျတဲ့ ကွန်ကရစ်ပြားတွေကြားမှာ ပိတ်မိနေတာပါ။ 

တံတားကိုဖြတ်ကူးတဲ့ တခြားကုန်တင်ကား ၂ စီးနဲ့ ကိုယ်ပိုင်ကား ၁ စီးလည်း ပိတ်မိနေပါတယ်။ ဒဏ်ရာရသူတချို့ဟာ သူတို့ရဲ့ မော်တော်ယာဉ်တွေကနေ လွတ်မြောက်နိုင်ခဲ့ပါတယ်။ ကင်ဒီယိုနဲ့ ကောက်ကာချိုင့်ဝှမ်းဒေသရဲ့ နယ်မြေတွေကိုဆက်သွယ်ပေးတဲ့ လာတီဘေဒါမြို့နယ်ရှိ လာဗီယေဟာ မြစ်ကူးတံတား ပြိုကျရာနေရာကို ကယ်ဆယ်ရေးသမားတွေကို ခေါ်ယူခဲ့ပါတယ်။ အသက်ရှင်ကျန်ရစ်သူတွေကို အနီးနားရှိ ဆေးဘက်ဆိုင်ရာဌာနတွေဆီ ခေါ်ဆောင်သွားခဲ့ကြောင်း ဒေသတွင်းမီဒီယာတွေက ဖော်ပြပါတယ်။

ဒေသခံအာဏာပိုင်တွေကတော့ တံတားပြိုကျရတဲ့အကြောင်းရင်းကို ရှာဖွေနေတယ်လို့ ပြောပါတယ်။ 

ကိုလံဘီယာ အမျိုးသားအခြေခံအဆောက်အအုံ အေဂျင်စီ (ANI)မှ ဝီလျံဖာနန်ဒိုကမာဂိုကတော့ တံတားရုတ်တရက် ချို့ယွင်း ပြိုကျမှု ဖြစ်နိုင်တဲ့ အကြောင်းရင်းအဖြစ် ထောက်ပြခဲ့ပါတယ်။ ဒီတံတားကို ၁၉၈၄ ခုနှစ်က တည်ဆောက်ခဲ့ပြီး ပုံမှန်စစ်ဆေးခဲ့ကြောင်းနဲ့ လွန်ခဲ့တဲ့ ၃ လ လောက်က နောက်ဆုံးစစ်ဆေးခဲ့ကာ  သူ့ရဲ့လုပ်ငန်းလည်ပတ်မှုနဲ့ စွမ်းဆောင်ရည်နဲ့ပတ်သက်ပြီးတော့ စိုးရိမ်စရာ မရှိကြောင်း ဒေသခံ မီဒီယာက ဖော်ပြခဲ့ပါတယ်။

အီကွေဒေါနိုင်ငံ နာပိုပြည်နယ်မှာ တံတားတခုပြိုကျခဲ့လို့ ပိုက်လိုင်းတွေပါ ပိတ်သွားရတဲ့ မမျှော်လင့်ထားတဲ့ဖြစ်ရပ် ကြုံခဲ့ရကြောင်း စွမ်းအင်ဝန်ကြီးဌာနက ကြေညာခဲ့ပြီးနောက်မှာ အီကွေဒေါရဲ့ ရေနံလုပ်ငန်းဟာ ၃ ပတ်အတွင်း ပုံမှန် ပြန်လည်ပတ်နိုင်မယ်လို့ အစိုးရက ဖေဖော်ဝါရီ ၂၄ ရက်မှာ ခန့်မှန်းထားပါတယ်။ 

နိုင်ငံပိုင်ရေနံကုမ္ပဏီ ပက်ထရိုအီကွေဒေါ နဲ့  ပုဂ္ဂလိက ပိုက်လိုင်းအော်ပရေတာ အိုစီပီ အီကွေဒေါ တို့ဟာ နာပိုပြည်နယ်က သူတို့ရဲ့လုပ်ငန်းခွင် ဘေးနားက ပြိုကျမှု ဖြစ်ပွားပြီးနောက်မှာ ကြိုတင် ကာကွယ်မှုအဖြစ် ဖေဖော်ဝါရီ ၂၂ ရက်မှာ သူတို့ရဲ့သက်ဆိုင်ရာ ပိုက်လိုင်းတွေက လုပ်ငန်း ဆောင်ရွက်မှုတွေကို ဆိုင်းငံ့ထားလိုက်ပါတယ်။ 

ကြိုတင်မသိရတဲ့ မလွှဲမရှောင်သာ ကိစ္စရပ်ကြောင့်လို့ ဖေဖော်ဝါရီ ၂၃ ရက်မှာ ကြေညာ လိုက်ပါတယ်။ 

ရေနံစုပ်ခြင်းကို‌တော့ နောက်ခုနှစ်ရက်အတွင်း ပြန်စတင်နိုင်မယ်လို့ ပက်ထရိုအီကွေဒေါက ဖေဖော်ဝါရီ ၂၃ ရက် နှောင်းပိုင်းမှာ ခန့်မှန်းထားပါတယ်။ 

ပက်ထရိုအီကွေဒေါ မန်နေဂျာ မာရီယာ အဲလစ်ဆာ ဆိုလီဒစ်ပ်ဆာကတော့ ကုမ္ပဏီဟာ လက်ရှိကြုံတွေ့နေရတဲ့ အရေးပေါ်အခြေအနေတွေကို ဖြေရှင်းနိုင်စေဖို့ လမ်းကြောင်းသစ်တခု လုပ်ဆောင်နေကြောင်း ပြောကြားခဲ့ပါတယ်။ 

ပက်ထရိုအီကွေဒေါက အမေဇုန်ရှိ ရေနံတွင်းတွေကို ဖြည်းဖြည်းချင်း စပြီး ပိတ်ပစ်နေပြီဖြစ် ကြောင်းနဲ့ ပြည်တွင်းဝယ်လိုအားကို ဖြည့်ဆည်းပေးနိုင်ဖို့ သိုလှောင်မှုကို အကောင်းဆုံးဖြစ်အောင် လုပ်ဆောင်သွားမှာဖြစ်ကြောင်း ဖေဖော်ဝါရီ ၂၄ ရက်နှောင်းပိုင်းက ထုတ်ပြန်ချက်တခုမှာ ပြောကြားခဲ့ပါတယ်။