စီရော်နယ်ဒို အသင်းလူစာရင်းမှာရှိနေရင် မန်ယူအသင်းရဲ့ခြေစွမ်းပိုမိုကောင်းမွန်ကြောင်း နောက်ခံလူ ဒါလော့ကပြောပါတယ်။
စီရော်နယ်ဒိုဟာ ပြီးခဲ့တဲ့တစ်ပတ်က စပါးအသင်းကို အနိုင်ရတဲ့ ပွဲစဉ်အတွင်း ပွဲမပြီးခင်ကွင်းထဲဝင်သွားခဲ့တာကြောင့် မန်ယူအသင်းက တစ်ပွဲပယ်ပြစ်ဒဏ်ချမှတ်ပြီး ချဲလ်ဆီးနဲ့ အရေးကြီးပွဲစဉ်မှာ ထည့်သွင်းခဲ့ခြင်းမရှိခဲ့ပါဘူး။
ဒါပေမဲ့ ရှရစ်နဲ့ ယူရိုပါလိဂ်ပွဲစဉ်မှာ စီရော်နယ်ဒိုက ပွဲထွက်လူစာရင်းမှာပြန်ပါလာခဲ့ပြီး ကိုယ်တိုင်အနိုင်ဂိုးသွင်းခဲ့သလို အသင်းကလည်း ၃ ဂိုး ဂိုးမရှိနဲ့ အနိုင်ရခဲ့တာပါ။
နိုင်ငံအသင်းဖော်လည်းဖြစ်သူ ဒါလော့ကတော့ မန်ယူအသင်းဟာ စီရော်နယ်ဒို ကွင်းထဲမှာရှိနေတိုင်း အသင်းကို ကူညီပေးစမြဲဖြစ်ကြောင်း၊ ရော်နယ်ဒိုဟာ အသင်းရဲ့ခြေစွမ်းကို ပိုမို ကောင်းမွန်လာအောင်လုပ်ဆောင်နိုင်စွမ်းရှိကြောင်း ဒါလော့ကချီးကျူးသွားခဲ့ပါတယ်။
မန်ယူနိုက်တက် ကစားသမားသစ် အန်တိုနီဟာ ပေါ်တူဂီစကား ပြောတာကြောင့် အသင်းနဲ့အတူ အမြန်အံဝင်ခဲ့တာဖြစ်ကြောင်း နောက်ခံလူ ဒါလော့က ပြောပါတယ်။
ဘရာဇီးနိုင်ငံမှာ ပေါ်တူဂီစကားက အသုံးအများဆုံး ဘာသာစကားဖြစ်ပြီး ပေါ်တူဂီသားတွေရှိတဲ့ မန်ယူအသင်းမှာ အန်တိုနီတယောက် အမြန်ဆုံး အသားကျခဲ့ပြီး ပွဲဦးထွက်မှာပဲ အနိုင်ဂိုးတဂိုး သွင်းယူပေးခဲ့ပါတယ်။
ကစားသမားသစ်တေယာက်အနေနဲ့ ပုံမှန်အတိုင်းဆိုရင် အသားကျဖို့ အချိန်ယူရနိုင်ပေမဲ့ အန်တိုနီအတွက်တော့ ပေါ်တူဂီစကားပြောတဲ့အတွက် အသားကျဖို့ ပိုပြီးလွယ်ကူခဲ့တယ်လို့ ဒါလော့က ပြောပါတယ်။
“သူနဲ့ ပေါ်တူဂီစကားပြောဖြစ်တာမလို့ အင်္ဂလိပ်လိုပြောတာထက် ပိုပြီး သဘောပေါက်လွယ်စေတယ်။ သူက ပွင့်လင်းပြီး ကူညီချင်တဲ့စိတ်ရှိတယ်။ ဒါက အတော်ကောင်းပြီး လျှင်မြန်စွာလည်း အသားကျခဲ့တယ်။ လူတိုင်းက သူ့ကို ကြိုဆိုခဲ့ကြတယ်။ သူဟာ ဒီမှာ နှစ်အကြာကြီးကစားပြီး အောင်မြင်မှုရယူနိုင်မယ့် ကစားသမားဖြစ်မယ်ဆိုတာ သေချာတယ်” လို့ အသင်းဖော် အန်တိုနီကို ဒါလော့က ချီးကျူးပါတယ်။
အန်တိုနီအတွက် ယူရိုသန်း ၁၀၀ ပေးချေခဲ့ရတဲ့အပေါ်မှာ ဝေဖန်မှုတွေရှိခဲ့ပေမဲ့ ပွဲဦးထွက် ခြေစွမ်းအပေါ်မှာတော့ မန်ယူအသင်းပရိသတ်တွေက ကျေနပ်အားရနေပါတယ်။
