ဒိန်းမတ်နိုင်ငံ အနောက်မြောက်ပိုင်းမှာရှိတဲ့ ဗိုက်ကင်းခံတပ်တစ်ခုအနီးမှာ နှစ်ပေါင်း ၁၀၀၀ နီးပါး သက်တမ်းရှိပြီလို့ ယူဆရတဲ့ ငွေဒင်္ဂါးပြား ၃၀၀ နီးပါးကို  ပြီးခဲ့တဲ့ဆောင်းဦးရာသီက ပြောင်းဖူးခင်း တစ်ခုမှာ သတ္တုတူးဖော်နေတဲ့ မိန်းကလေးက ရှာဖွေတွေ့ရှိခဲ့ပါတယ်။

ဒီလိုအစုလိုက်တွေ့ရတာ အလွန်ရှားပါတယ်လို့ ရှေးဟောင်းပစ္စည်းများခင်းကျင်းပြသတဲ့ နော့ဒ် ဂျွတ်လန်း ပြတိုက်ရဲ့ ဒါရိုက်တာ လာစ်ခရစ်စတင်းနောဘတ်စ်က ပြောပါတယ်။

ငွေဒင်္ဂါးတွေကို ဟိုဘရိုမြို့အနီးက ခံတပ်မှာ ရှာဖွေတွေ့ရှိခဲ့တာဖြစ်ပြီး ပါရှိတဲ့ ကမ္ပည်းစာအရ ၉၈၀ ခုနှစ်က ဖြစ်တယ်လို့ ယုံကြည်ကြပါတယ်။

တူးဖော်ရရှိတဲ့ ဒင်္ဂါးတွေထဲမှာ ဒိန်းမတ်၊ အာရပ် နဲ့ ဂျာမန်ဒင်္ဂါးတွေအပြင် စကော့တလန် သို့မဟုတ် အိုင်ယာလန်က လက်ဝတ်ရတနာတွေပါဝင်ပြီး အခုတွေ့ရှိမှုဟာ ဘုရင် ဟာရတ်ဒ် ဘလူးတုခ်ျ က တည်ဆောက်ထားတဲ့ ခံတပ်နဲ့ တူညီတဲ့ကာလကဖြစ်ပြီး ဗိုက်ကင်းတွေရဲ့ သမိုင်းကြောင်းကို ပိုမို ထိုးထွင်းသိမြင်စေလိမ့်မယ်လို့ နော့ဘတ်စ် ကဆိုပါတယ်။

အဆိုပါရှေးဟောင်းပစ္စည်းတွေကို အယ်လ်ဘရော့ သမိုင်းပြတိုက်မှာ ဇူလိုင်လမှာ စတင်ပြသမှာဖြစ်ပြီး ရှာဖွေတွေ့ရှိခဲ့တဲ့ မိန်းကလေးကတော့ လူသိရှင်ကြားမထုတ်ပြန်ရသေးတဲ့ လျော်ကြေးငွေရရှိမှာဖြစ်ပါတယ်။

ရှေးဟောင်းသုတေသနပညာရှင်များကတော့ စပါးရိတ်သိမ်းပြီးကာလ နောက်နှစ်ဆောင်ဦးမှာ တူးဖော်မှုကို ဆက်လက်လုပ်ဆောင်ကြမှာဖြစ်ပြီး သင်္ချိုင်းနေရာတွေ၊ ရတနာသိုက်တွေနဲ့ အိမ်တွေကို ရှာဖွေတွေ့ရှိဖို့  မျှော်လင့်‌‌တယ်လို့သိရပါတယ်။

Source -The Guardian

ဂျာမနီ၊ ဒိန်းမတ်နဲ့ နယ်သာလန်တို့ဟာ စက်မှုလုပ်ငန်း လက်ကျန်စတော့တွေကနေ Leopard 1 တင့်ကားတွေကို ပြန်ယူဖို့ ရန်ပုံငွေတွေကို စုစည်းထားမှာဖြစ်ပြီး အဲဒါတွေကို လာမယ့်လတွေအတွင်း ကိယက်ဗ်ကို ထောက်ပံ့ပေးမယ်လို့ ဖေဖော်ဝါရီ ၇ ရက်မှာ ကြေညာလိုက်ပါတယ်။

ယူကရိန်းမှာ ဂဏန်း ၂ လုံးပါရှိတဲ့ Leopard 1 တင့်ကားတွေ မတ်လမှာ ရောက်ရှိနေဖို့ မျှော်လင့်ထားကြောင်း ဂျာမနီ ဒုတိယအဓိပတိနဲ့ စီးပွားရေးဝန်ကြီး ရောဘတ်ဟာဘခ်က ဝါရှင်တန်ကို ဖေဖော်ဝါရီ ၇ ရက်က လာရောက်ချိန်မှာ ပြောကြားခဲ့ပါတယ်။

ဒါပေမဲ့ တရားဝင်ခွင့်ပြုထားတဲ့ တင့်ကား ၁၇၈ စီးထဲက ဘယ်လောက်ပေးပို့မယ် ဆိုတာတော့ သေချာမပြောသေးပါဘူး။

“တိုက်ပွဲဝင်ဖို့အတွက် ပြုပြင်မှုတချို့ လိုအပ်တာကြောင့် ပြန်မွမ်းမံချိန်ညှိရမှာ ဖြစ်ပေမဲ့လည်း ရုရှားနွေဦးထိုးစစ်ကို ချေမှုန်းဖို့အတွက် ဒီမှာရရှိနိုင်မယ့် အရေအတွက် များများရှိတယ်” လို့ ဟာဘခ်က ပြောပါတယ်။

နှစ်သစ်ကူးပြီးကတည်းက အနောက်နိုင်ငံတွေဟာ ရုရှားတပ်တွေကို ဖြတ်ပြီး နယ်မြေတွေကို ဒီနှစ်နှောင်းပိုင်းမှာ ပြန်သိမ်းဖို့အတွက် ပစ်ခတ်မှုစွမ်းအားနဲ့ ရှေ့ကိုချီတက်နိုင်စေဖို့ ရာနဲ့ချီတဲ့ တင့်ကားတွေနဲ့ သံချပ်ကာကားတွေကို ယူကရိန်းကိုပေးပို့မယ်လို့ ကတိပြုခဲ့ကြပါတယ်။

ဂျာမနီ၊ ဒိန်းမတ်နဲ့ နယ်သာလန်တို့ဟာ သူတို့ရဲ့ Leopard 1 တင့်ကားတွေ ကနဦးပေးပို့မှုဟာ နောက်ထပ် မိတ်ဘက်တွေအတွက် လမ်းဖွင့်ထားတာဖြစ်ပြီး ဘယ်လ်ဂျီယံက ပါဝင်ဖို့ အစဦး စိတ်ဝင်စားမှု ပြသခဲ့ကြောင်း ပြောပါတယ်။

ဂျာမန် လက်နက်ထုတ်လုပ်ရေးကုမ္ပဏီ ရိုင်းန်မေတဲလ်က အခုနှစ်မှာ ယူကရိန်းကို Leopard တင့်ကား အစီး ၂၀-၂၅ လောက်အထိ ပေးပို့မှာဖြစ်ပြီး ကျန်ရှိတဲ့ Leopard 1 တင့်ကား ၈၈ စီးကို လာမယ့်နှစ်မှာ ပေးပို့မယ်လို့ အစောပိုင်းမှာ ပြောကြားခဲ့ပါတယ်။

နိုင်ငံတကာဖိအားတွေ မြင့်တက်နေချိန်မှာ ပိုခေတ်မီတဲ့ Leopard 2 တိုက်ပွဲဝင် တင့်ကားတွေကို စစ်တပ်သိုလှောင်ထားမှုကနေ ပေးပို့ဖို့ ဂျာမနီအစိုးရဟာ ပြီးခဲ့တဲ့လက ဆုံးဖြတ်ခဲ့တာ ဖြစ်ပါတယ်။