ကုလသမဂ္ဂလုံခြုံရေးကောင်စီအနေနဲ့ မြောက်ကိုရီးယား အရေးကိစ္စဆိုင်ရာ အရေးပေါ် အစည်းအဝေးတရပ်ကို ခေါ်ယူကျင်းပပေးဖို့ ဂျပန်နိုင်ငံဝန်ကြီးချုပ် ဖူမိယိုကီရှီဒါက  ဖေဖော်ဝါရီ ၂၀ ရက်မှာ တောင်းဆိုပါတယ်။

ဒါဟာ မြောက်ကိုရီးယားနိုင်ငံက ပစ်လွှတ်လိုက်တဲ့ တာဝေးပစ် ပဲ့ထိန်းဒုံးကျည်တွေဟာ ဂျပန်နိုင်ငံ အနောက်ဘက်ကမ်းလွန်ဒေသ ပင်လယ်ပြင်ထဲကို ကျရောက်ခဲ့တာကြောင့် ဖြစ်ပါတယ်။

ဖေဖော်ဝါရီ ၁၈ ရက်မှာ မြောက်ကိုရီးယားက အရှေ့ဘက်ကမ်းလွန်ပင်လယ်ပြင်ကို ပဲ့ထိန်းဒုံးကျည်တစင်းနဲ့ ပထမဆုံး စတင်ပစ်ခတ်ခဲ့တယ်လို့ တောင်ကိုရီးယား ပူးတွဲစစ်ဦးစီးချုပ်ဖြစ်သူက ပြောပါတယ်။

အဲ့ဒီနောက်မှာ နောက်ထပ် အလားတူပစ်ခတ်မှု ၂ ကြိမ်ကို ဖေဖော်ဝါရီ ၂၀ ရက်မှာ ပြုလုပ်သွားတာပါ။

ဂျပန်အစိုးရ အတွင်းရေးမှူးချုပ် ပြောရေးဆိုခွင့်ရှိသူ ဟီရိုခါ့ဇု မတ်ဆုနိုက ဒီ ဒုံးကျည်ပစ်လွှတ်မှုတွေနဲ့ ပတ်သက်ပြီး ဂျပန်နိုင်ငံအနေနဲ့ မြောက်ကိုရီးယားနိုင်ငံကို ကန့်ကွက်ကြောင်း ပြောဆိုခဲ့ပါတယ်။

“ဂျပန်နိုင်ငံ အပါအဝင် ဒေသတွင်းနဲ့ နိုင်ငံတကာ အသိုက်အဝန်းအပေါ် မြောက်ကိုရီးယားက ခြိမ်းခြောက်မှုလုပ်ရပ်တွေ ဆက်တိုက်လုပ်ဆောင်လာတာကြောင့် ဒါဟာ လုံးဝလက်ခံနိုင်စရာ မရှိဘူး” လို့ မတ်ဆုနိုက သတင်းစာရှင်းလင်းပွဲတခုမှာ ပြောပါတယ်။

ယူကရိန်းနိုင်ငံ၊ ကရီမန်ချတ်မြို့ရှိ ကုန်တိုက်တခုကို ဒုံးကျည်တွေနဲ့ ပစ်ခတ်တိုက်ခိုက်တယ်ဆိုတာ မဟုတ်ကြောင်း ရုရှားကာကွယ်ရေးဝန်ကြီးဌာနက ဇွန် ၂၈ ရက်မှာ ငြင်းဆိုလိုက်ပါတယ်။

သိမ်းဆည်းထားတဲ့ ခဲယမ်းမီးကျောက်တွေကို ဖောက်ခွဲလိုက်တာကနေ လက်နက်သိုလှောင်ရုံရဲ့ အနီးနားက လုပ်ငန်းလည်ပတ်မှုမရှိတဲ့ ဈေးဝယ်စင်တာတခုမှာ မီးလောင်မှုဖြစ်ပွားခဲ့တာလို့ ရုရှားကာကွယ်ရေးဝန်ကြီးဌာန ပြောရေးဆိုခွင့်ရှိသူ အီဂေါ ကိုနာရှန်ကော့ဗ်က ရှင်းလင်းပြောကြားခဲ့တာပါ။

ယူကရိန်းကတော့ စျေးဝယ်စင်တာကို ရုရှားဒုံးကျည်တွေ တိုက်ရိုက်ထိမှန်ခဲ့ပြီး ပစ်ခတ်ချိန်မှာ လူ ၁,၀၀၀ လောက် အတွင်းမှာရှိနေပြီး လူ ၁၈ ဦးထက်မနည်း သေဆုံးခဲ့ရကြောင်း ပြောထားပါတယ်။

ဇွန် ၂၈ ရက်မှာတော့ အသက်ရှင်ကျန်သူတွေနဲ့ ရုပ်အလောင်းတွေ ပြန်ရနိုင်ဖို့ ကယ်ဆယ်ရေးလုပ်ငန်းတွေ ဆက်လုပ်ဆောင်နေပြီး ဒါဇင်နဲ့ချီတဲ့ ဒဏ်ရာရသူတွေကို ဆေးရုံတင်ထားရပါတယ်။

ဒီရက်ပိုင်းအတွင်း ရုရှားရဲ့တိုက်ခိုက်မှုတွေ သိသိသာသာများလာကြောင်း ယူကရိန်းက အစီရင်ခံထားပါတယ်။

ရုရှားက အရပ်သားတွေကို ပစ်မှတ်ထားပြီး ဈေးဝယ်စင်တာကို ရည်ရွယ်ချက်ရှိရှိနဲ့ ဝင်တိုက်တဲ့ ကိစ္စအပေါ် ရုရှားရဲ့ ငြင်းဆိုပြောကြားချက်ကိုရော ယူကရိန်းသမ္မတ ဇလန်းစကီးရဲ့ အခိုင်အမာ ပြောကြားချက်တွေကိုပါ ရိုက်တာသတင်းဌာနအနေနဲ့ သီးခြားအတည်ပြုနိုင်ခြင်း မရှိခဲ့ပါဘူး။

ဇွန် ၂၇ ရက်က ကရီမန်ချတ်မြို့မှ ပထမဆုံး အသေအပျောက်သတင်းတွေထွက်လာပြီး နာရီပိုင်းအကြာမှာ ကုလသမဂ္ဂဆိုင်ရာရုရှားလက်ထောက်သံအမတ် ဒီမစ်ထရီပိုလီရန်စကီးက ယူကရိန်းဟာ ဇွန် ၂၈ ရက်မှ ၃၀ ရက်အထိ နေတိုးစစ်မဟာမိတ်အဖွဲ့ ထိပ်သီးအစည်းအဝေး မတိုင်ခင်မှာ စာနာသနားမှုရအောင် ဒီဖြစ်ရပ်ကို အခွင့်ကောင်းယူနေတာလို့ စွပ်စွဲလိုက်ပြီး ကိယက်ဗ်ရဲ့ပြောကြားချက်နဲ့ သိသာတဲ့ကွဲလွဲချက်တွေ ရှိနေတယ်လို့ ပြောပါတယ်။

ရုရှားဟာ ယူကရိန်းကို လေးလကြာ ထိုးစစ်ဆင်နေချိန်အတွင်း အရပ်သား နယ်မြေဒေသတွေကို ပစ်မှတ်ထား တိုက်ခိုက်ခဲ့တာကို အကြိမ်ကြိမ် ငြင်းဆိုထားပါတယ်။