ယူကရိန်းအရှေ့ပိုင်း ဒွန်ဘတ်စ်ဒေသထဲက စစ်ဆင်ရေးအတွက် အရေးကြီးတဲ့ နေရာတွေမှာရှိတဲ့ ဘာလက်လီယာနဲ့ အစ်ဇိယံမြို့တွေက တပ်တွေကို ပြန်ဆုတ်နေပြီလို့ ရုရှားစစ်တပ်က စက်တင်ဘာ ၁၀ ရက်မှာ ပြောပါတယ်။

ယူကရိန်းအစိုးရကလည်း ယူကရိန်းစစ်တပ်ဟာ နိုင်ငံရဲ့ ဒုတိယမြို့တော် ခါခိဗ်ရဲ့တောင်ဘက် ရုရှားတပ်တွေ သိမ်းပိုက် ထားတဲ့ဒေသတွေကို လျှပ်တပြက်စီးနင်း သိမ်းပိုက်နိုင်ခဲ့တယ်လို့ အခိုင်အမာ ပြောပါတယ်။ 

ရုရှားရဲ့ ခံစစ်စည်းတွေ ကျိုးပေါက်ပြီး တခြားအနားက မြို့တွေကို အပြင်းအထန် ဖိအားပေးနေတာကြောင့် အရပ်သားတွေကို ဘေးလွတ်ရာ ရွှေ့ပြောင်းထားတယ်လို့ ဒေသဆိုင်ရာ ရုရှားအုပ်ချုပ်ရေးမှူးတဦးက စက်တင်ဘာ ၉ ရက်မှာ ပြောပါတယ်။

ယူကရိန်းအရှေ့ပိုင်း ဒွန်ဘတ်စ်ဒေသ လွတ်မြောက်ရေး အထူးစစ်စစ်ဆင်ရေးရဲ့ ဖော်ပြထားတဲ့ ရည်မှန်းချက်တွေ အောင်မြင်စေဖို့ ဘာလက်လီယာနဲ့ အစ်ဇိယံခရိုင်တွေမှာ တပ်စွဲထားတဲ့ ရုရှား တပ်တွေကို ပြန်စုဖွဲ့ဖို့ ဆုံးဖြတ်လိုက်တယ်လို့ ကာကွယ်ရေးဝန်ကြီးဌာန ပြောခွင့်ရ ဗိုလ်ချုပ် အစ်ဂေါ ခိုနာရှန်ကို့ဗ်က ဝန်ကြီးဌာနရဲ့ Telegram ရုပ်သံလိုင်းမှာ ပြောခဲ့ပါတယ်။ 

အဓိက ထောက်ပံ့ရေးစခန်းဖြစ်တဲ့ ယူကရိန်းမြို့  ကူပြန့်စ်ခ်ကနေ ထွက်ပြေးလာသူ အများအပြားကို တွေ့မြင်ခဲ့ရတယ်လို့ မျက်မြင်တဦးက ပြောကြောင်း ရိုက်တာသတင်းမှာ ဖော်ပြထားပါတယ်။

“မြို့တဝက်လောက်ကို ယူကရိန်းစစ်တပ်က သိမ်းယူပြီး ရုရှားက ပြန်ဆုတ်နေတယ်... တိုက်ပွဲတွေ နီးကပ်လာနေပြီ။" 

ယူကရိန်းအရှေ့ပိုင်းက ကိုယ်ပိုင်ကြွေးကြော်ထားတဲ့ ဒန်ညက်စ် ပြည်သူ့ သမ္မတနိုင်ငံခေါင်းဆောင် ဒန်းနစ် ပွတ်ရှိလင်ကလည်း ရုရှားတပ်တွေ သိမ်းပိုက်ထားတဲ့ ရှေ့တန်းရဲ့တခြားအစိတ်အပိုင်းတွေမှာ “ပြဿနာတွေ ရှိနေတာကို အသိအမှတ်ပြုခဲ့ပါတယ်။

ကရက်စ်နီ လီမဲန်မြို့ရဲ့ အခြေအနေဟာ သမ္မတနိုင်ငံမြောက်ပိုင်းမှာလိုပဲ ခက်ခဲနေတယ်လို့ သူက ပြောခဲ့ပါတယ်။

ယူကရိန်းစစ်တပ်က ရုရှားရဲ့ ထိုးစစ်ကို အကြီးအကျယ်ရင်ဆိုင်နေရတဲ့ ယူကရိန်းနိုင်ငံ အရှေ့ပိုင်း ဒွန်ဘတ်စ်ဒေသမှာ အခြေအနေက အလွန်အမင်း ခက်ခဲနေတယ်လို့ ယူကရိန်းသမ္မတ  ဇလန်းစကီးက မေ ၃၀ ရက်မှာ ပြောလိုက်ပါတယ်။

ဒွန်ဘတ်စ် ဒေသလွတ်မြောက်ရေးဟာ ခြွင်းချက်မရှိ ထိပ်တန်းဦးစားပေးလို့ ရုရှားနိုင်ငံခြားရေး ဝန်ကြီး ဆာဂီးလ် လာ့ဗ်ရော့ဗ်က မေ ၂၉ ရက်မှာ ပြောခဲ့ပါတယ်။

ရုရှားဟာ တကမ္ဘာလုံးအဆင့်အနေနဲ့ အခြေအနေမတည်ငြိမ်အောင် ယူကရိန်းရဲ့ ကောက်ပဲ သီးနှံတွေကို ပိတ်ဆို့ထားတယ်။

ဒါကြောင့် အာဖရိက အာရှနဲ့ ဥရောပက တချို့နိုင်ငံတွေမှာ ဆာလောင်မွတ်သိပ်မယ့် ခြိမ်းခြောက်မှုတွေ တိုးလာနေတယ်လို့ နေ့စဉ်ပြောတဲ့ ရုပ်သံမိန့်ခွန်းအတွင်း ဇလန်းစကီးက ပြောခဲ့ပါတယ်။

ရုရှားသမ္မတ ဗလာဒီမီယာ ပူတင်ကတော့ ယူကရိန်းဆိပ်ကမ်းတွေကနေ ကောက်ပဲသီးနှံ တင်ပို့ရေး ပံ့ပိုးဆောင်ရွက်ပေးဖို့ ရုရှားအစိုးရက အဆင်သင့်ပဲလို့ ပြောပါတယ်။ ဒါဟာ စားနပ်ရိက္ခာ အကျပ်အတည်းကို သက်သာစေမယ့် ဖြစ်နိုင်ခြေ တရပ်ပါ။

ရုရှားကို သီးခြားခွဲထုတ်ရေး အနောက်နိုင်ငံတွေရဲ့  ကြိုးပမ်းမှုနဲ့ စစ်ပွဲကြောင့် စပါးနဲ့ အခြား ကုန်စည်ဈေးနှုန်းတွေ မြင့်တက်လာခဲ့ပါတယ်။

ဇလန်းစကီးကတော့ ခါခိဗ်မြို့ကိုသွားခဲ့ပြီး နောက်နေ့မှာ ရုရှားတပ်တွေက မြို့ကို ပစ်ခတ်တာကြောင့် လူအတော်များများ ဒဏ်ရာရပြီး အိမ်တွေ မီးရှို့ခံရတယ်လို့ ညပိုင်း မိန့်ခွန်းအတွင်း ပြောပါတယ်။

ခါခိဗ်မြို့ ခရီးစဉ်ဟာ ရုရှားကျူးကျော်စစ် စပြီးကတည်းက ကိယက်ဒေသအပြင်ကို ပထမဆုံး တရားဝင် သွားရောက်တဲ့ ဇလန်းစကီးရဲ့ ခရီးစဉ်ပါ။

ယူကရိန်းတပ်တွေဟာ နိုင်ငံရဲ့ ဒုတိယအကြီးဆုံး ခါခိဗ်မြို့ကို ခုခံရင်း ရုရှားတပ်တွေကို ဒီလ အစောပိုင်းမှာ နယ်စပ်ထိ မောင်းထုတ်နိုင်ခဲ့ပေမဲ့ ခုတော့ မြို့ဟာ ရုရှားအမြောက်တပ်တွေ ဝိုင်းထားတာကို ခံနေရပါတယ်။