တနင်္သာရီတိုင်း၊ မြိတ်မြို့နယ်မှာ ဓာတ်ဆီဈေးနှုန်းတွေ မြင့်တက်လာတာကြောင့် ဆိုင်ကယ်တက္ကစီသမားတွေ အရင်ကထက် စားဝတ်နေရေး ပိုမိုခက်ခဲပင်ပန်းလာကြတယ်လို့ မြို့ခံ ဆိုင်ကယ်တက္ကစီမောင်းသူတွေက ပြောပါတယ်။
ဓာတ်ဆီဈေးနှုန်း မြင့်မားလာတာကြောင့် ဆိုင်ကယ်တက္ကစီသမားတွေ အခက်အခဲရှိနေသလို မြို့ထဲလမ်းတွေမှာလည်း ယာဉ်ထိန်းရဲတွေက ဆိုင်ကယ်တွေကို မကြာခဏ ဖမ်းဆီးပြီး ဒဏ်ရိုက်နေတာကြောင့် ဆိုင်ကယ်တက္ကစီးသမားတွေ ပိုမိုခက်ခဲကျပ်တည်းလာနေတယ်လို့ ဆိုပါတယ်။
မြိတ်မြို့ ဆိုင်ကယ်တက္ကစီမောင်းသူတဦးက “ဓာတ်ဆီဈေးတွေက မတည်ငြိမ်ဘူး၊ ရက်ပိုင်းအတွင်းမှာကို မြင့်လိုက် ကျလိုက် ဖြစ်တာ၊ အရင်က ခရီးတခေါက်နှစ်ခေါက်လောက် တက္ကစီဆွဲရင် အမြတ်ငွေကျန်တယ်။ ခုက ဓာတ်ဆီဈေးတက်တော့ အရင်လို အမြတ်ငွေသိပ်မကျန်တော့ဘူး။ ဒီကြားထဲမှာ ဆိုင်ကယ်ဖမ်းမိရင် ဒဏ်ကြေးက ၃ဝ,ဝဝဝ လောက်ပေးရတော့ ပိုပြီးခက်ခဲလာတာပေါ့။”
မြိတ်မြို့မှာ ဓာတ်ဆီဈေးနှုန်းတွေ တလနဲ့တလ ဈေးနှုန်းပြောင်းလဲမှုတွေရှိနေပြီး အရင်လက တလီတာကို ၂,၅ဝဝ ကျပ်ထိ မြင့်တက်သွားကာ အခုလမှာ တလီတာကို ၂,၂၅ဝ ကျပ်ကို လျော့ကျသွားပေမဲ့ မကြာမီ ဓာတ်ဆီဈေးနှုန်းတွေ ပြန်မြင့်တက်လာမှာကို စိုးရိမ်ပူပန်နေရတယ်လို့ ဆိုင်ကယ်တက္ကစီသမားတဦးက ဆိုပါတယ်။
စစ်အာဏာမသိမ်းခင်က မြိတ်မြို့မှာ ဓာတ်ဆီဈေးနှုန်း တလီတာ ၁,ဝဝဝ ကျပ်သာရှိခဲ့ပြီး စစ်အာဏာသိမ်းပြီးနောက်ပိုင်း ဓာတ်ဆီဈေးနှုန်း တလီတာ ၂,ဝဝဝ ကျပ်အထိ ထိုးတက်သွားပြီး ပြန်ကျတာ မရှိသေးပါဘူး။
ကချင်ပြည်နယ်၊ ပူတာအိုမြို့မှာ ဓာတ်ဆီရှားပါးလာတဲ့အတွက် ဖေဖော်ဝါရီ ၈ ရက်မှာ ၁ ဂါလန်ကို ကျပ် ၁၀,၀၀၀ အထိ စျေးတက်နေပြီလို့ ပူတာအိုဒေသခံတွေထံက သိရပါတယ်။
အရင်က ကိုဗစ်ကာလအတွင်းမှာ ဆီတဂါလန်ကို ကျပ် ၄၅၀၀ ဝန်းကျင်သာ ရှိပြီး အခု ဆီတင်ပို့ခွင့် ပိတ်ပင်ခံလိုက်ရပြီးနောက် တဖြည်းဖြည်း မြင့်တက်လာကာ ဆီဆိုင်တွေမှာလည်း ဓာတ်ဆီပြတ်လပ်သွားတယ်ဆိုပြီး ပိတ်လိုက်တာလို့ ဒေသခံတွေက ပြောပါတယ်။
“မနေ့က ဖေဖော်ဝါရီ ၇ ရက်နေ့ မနက်ထိတော့ ဆီဆိုင်တွေ ဖွင့်တယ်။ နေ့လယ်ရောက်တော့ ဆီမလောက်ဘူးဆိုပြီး ပိတ်ထားတယ်လေ။ စစ်ကောင်စီက မြစ်ကြီးနားကနေ ပူတာအိုကို လောင်စာဆီတင်ပို့တာကို တားမြစ်ထားတော့ ပိုပြီးရှားပြီး ဈေးပိုတက်ဖို့ပဲ ရှိတော့တယ်”လို့ ဒေသခံတစ်ဦးက ပြောပါတယ်။
လောင်စာဆီ ပြတ်လပ်ပြီး ကုန်ဈေးနှုန်း အဆမတန် မြင့်တက်လာမှာကိုလည်း ဒေသခံတွေက စိုးရိမ်နေကြတာပါ။ ဆီပြတ်လပ်တော့မယ်ဆိုတဲ့ သတင်းကြောင့် ဒေသခံတွေက ဆီဆိုင်တွေမှာ တိုးဝှေ့ဝယ်ယူခဲ့ကြပြီး ဆီဆိုင် တဆိုင်ပြီးတဆိုင် ဆီပြတ်လပ်သွားလို့ ဆိုင်ပိတ်ရာမှာ ဒီကနေ့ ဖေဖော်ဝါရီ မနက်ပိုင်းမှာတော့ ဆီဆိုင်အားလုံး ပိတ်သွားပြီလို့ သိရပါတယ်။
ပြီးခဲ့တဲ့ ဖေဖော်ဝါရီ ၆ ရက်ကနေစပြီး စစ်ကောင်စီက ဆီတွေတင်ပို့တာကို တားမြစ်ထားတာ ဖြစ်ပြီး လိုင်းကားဆွဲတဲ့ ကားဆရာတွေလည်း လမ်းမှာသုံးဖို့လောက်ပဲ တင်ဆောင်ခိုင်းတယ်လို့ သိရပါတယ်။
ပူတာအိုခရိုင်ကို လောင်စာဆီ တင်ဆောင်ခွင့် ဘာကြောင့် တားမြစ်တယ်ဆိုတာမျိုး စစ်ကောင်စီဘက်က ပြောကြားတာမျိုးမရှိဘဲ ရုတ်တရက် အခုလို ကန့်သတ် တားမြစ်လိုက်တာပါ။ ဆီတင်တဲ့ကားတွေကိုလည်း မြစ်ကြီးနားကို ပြန်လည် လှည့်ပြန်ခိုင်းနေတာလို့ သိရပါတယ်။
အခု တားမြစ်ခံရတဲ့ ပူတာအိုဒေသဘက်မှာ Putao PDF နဲ့ စကစတို့ တိုက်ပွဲဖြစ်ပွားခဲ့ကာ တပ်စခန်းတွေ ဆုတ်ခွာပေးခဲ့ရတာမျိုး ရှိလာပြီးတဲ့နောက် အခုလိုမျိုး လောင်စာဆီ တင်ဆောင်ခွင့် ကန့်သတ်ပိတ်ပင်ခံလိုက်ရတာမျိုး ရှိလာတာပါ။
၂၀၁၈ ခုနှစ်မှာ KIA ကနေ စစ်ရေးအရ ဇနန်တံတားကို ဖျက်ဆီးခဲ့တဲ့နောက်မှာ ပူတာအိုမြို့မှာ ဓာတ်ဆီပြတ်တောက်မှုရှိခဲ့ပြီး ဓာတ်ဆီ ၁ ပုလင်းကို ၁၀,၀၀၀ကျပ်အထိ ဈေးထိုးတက်ဖူးတယ်လို့ သိရပါတယ်။
