အာဏာသိမ်းအကြမ်းဖက်စစ်တပ်ရဲ့ လေကြောင်းတိုက်ခိုက်မှုကြောင့် ကျဆုံးသွားခဲ့ရတဲ့ စစ်ကိုင်းတိုင်း၊ ကန့်ဘလူမြို့နယ်၊ ပဇီကြီးကျေးရွာ ဒေသခံတွေအတွက် ဝမ်းနည်းကြောင်း နဲ့ အတူတူရှိနေကြောင်း ပြသတဲ့အနေနဲ့ NUG အစိုးရ၊ ကာကွယ်ရေးဝန်ကြီးဌာန၊ ပြည်သူ့ ကာကွယ်ရေးတပ်မတော်(PDF)၊  တောင်ပိုင်းတိုင်းစစ်ဒေသ၊ နဂါးနီစစ်ကြောင်းက အလံ တဝက်ချ အလေးပြုပြီးတော့ တမိနစ် ငြိမ်သက်ဆုတောင်းတာတွေ ပြုလုပ်ခဲ့ကြပါတယ်။

NUG ကာကွယ်ရေးဝန်ကြီးဌာန ထုတ်ပြန်ချက်မှာတော့ ဒီကနေ့ညနေအထိ အာဏာသိမ်း အကြမ်းဖက်စစ်တပ်ရဲ့ လေကြောင်းတိုက်ခိုက်မှုကြောင့် ကလေးသူငယ်တွေ၊ ကိုယ်ဝန် ဆောင် မိခင်တွေအပါအဝင် ကျဆုံးခဲ့တဲ့ အပြစ်မဲ့ပြည်သူ ၁၃၃  ယောက် ရှိခဲ့ပြီလို့ သိရပါတယ်။

ပဇီကြီးကျေးရွာကို စစ်ကောင်စီတပ်က မနေ့က မနက်ပိုင်း ၈ နာရီလောက်မှာ  လေ ကြောင်းကနေ တိုက်လေယာဉ်တွေ စစ်ရဟတ်ယာဉ်တွေနဲ့ အကြမ်းဖက်ပစ်ခတ်တိုက် ခိုက်ခဲ့ရာမှာ သေဆုံးဒဏ်ရာရှိသူတွေရဲ့ မိသားစုဝင်တွေလည်း စိတ်ဝေဒနာ ခံစားနေရသူတွေလည်း  အများအပြားရှိနေတယ်လို့ ဒေသခံတွေရဲ့ ပြောပြချက်အရ သိရပါတယ်။

ဒါ့အပြင် စစ်ကောင်စီရဲ့ လေကြောင်းတိုက်ခိုက်မှုကြောင့်  ပဇီကြီးရွာအပါအဝင် အနီးအနားက  သာယာရွာ၊ လေးတွင်စဉ်ရွာ၊ မယ်‌ဇေတောရွာ၊ မလယ်ရွာ၊‌ ချောင်းမကြီးနဲ့ ခင်ဦး မြို့နယ် ဘက်ခြမ်းက ကျေးရွာက ဒေသခံတွေပါ ရွာထဲမှာ မနေရဲကြဘဲ ထွက်ပြေးနေကြတယ်လို့လည်း သိရပါတယ်။

ပဇီကြီးကျေးရွာကို စစ်ကောင်စီရဲ့ လေကြောင်းတိုက်ခိုက်မှုနဲ့ ပတ်သက်ပြီး ကုလသမဂ္ဂ အတွင်းရေးမှူးချုပ် အန်တိုနီယို ဂူတာရပ်စ်က အပြင်းအထန် ကန့်ကွက်ရှုတ်ချလိုက်ပြီး ဒီလုပ်ရပ်ကို ကျူးလွန်သူတွေအနေနဲ့ တာဝန်ခံဖို့နဲ့ အကြမ်းဖက်မှုတွေရပ်တန့်ဖို့  တောင်းဆိုလိုက်ပါတယ်။

ဒါ့အပြင် ကုလသမဂ္ဂရဲ့ မြန်မာ့လူ့အခွင့်အရေးဆိုင်ရာ အထူးကိုယ်စားလှယ် တွမ် အန်ဒရူးစ်ကလည်း မြန်မာစစ်တပ်က အပြစ်မဲ့ပြည်သူတွေကို သတ်ဖြတ်နေတာဟာ ကမ္ဘာ ကြီးရဲ့ မျက်ကွယ်ပြုမှု ကြောင့်နဲ့ စစ်တပ်ကို လက်နက်ထောက့်ပံ့နေသူတွေကြောင့်ဖြစ်ပြီး ကမ္ဘာ့ခေါင်းဆောင်တွေအနေနဲ့ ကလေးတွေ ဘယ်လောက်များများ သေကျေမှ ဒီလို အစုလိုက်အပြုံလိုက်သတ်ဖြတ်မှုတွေ ရပ်တန့်ဖို့ လုပ်ဆောင်နိုင်မလဲလို့ မေးခွန်းထုတ် လိုက်ပါတယ်။

ကရင်ပြည်နယ်အခြေစိုက် နဂါးနီစစ်ကြောင်းအတွက် လိုအပ်နေတဲ့ ဒရုန်းရရှိဖို့ ပရောဂျက်ကမ်ပိန်း ပြုလုပ်ပြီး ပြည်သူတွေဆီကနေ အလှူငွေကောက်ခံခဲ့ရာမှာ ရာနှုန်းပြည့် အောင်မြင်ခဲ့တယ်လို့ တပ်ဖွဲ့တာဝန်ရှိသူတွေက ပြောပါတယ်။

အဲဒီကမ်ပိန်းကို ဒီဇင်ဘာ ၃ ရက်ကနေ ဇန်နဝါရီ ၄ ရက်နေ့အထိ တလတိတိ ပြုလုပ်ခဲ့တာဖြစ်ပြီး လိုအပ်နေတဲ့ငွေ ကျပ် သိန်း ၃၄၀ ရရှိခဲ့တယ်လို့ ဆိုပါတယ်။

အဲဒီလို ထောက်ပံ့ငွေရရှိဖို့ ရွှေသား အပါအဝင် ပယင်းနဲ့ အလှစီထားတဲ့ ဒေါ်အောင်ဆန်းစုကြည်ပုံ ပန်ချီကားကို ကဲစမ်းမဲလက်မှတ်ပြုလုပ်ကာ ရောင်းချခဲ့ပြီး ငွေထုတ်ယူတဲ့လမ်းကြောင်း ခက်ခဲတဲ့အတွက် ဇန်နဝါရီ ၁၇ ရက်နေ့မှပဲ ငွေတွေကို လက်ခံရရှိခဲ့လို့ ပြည်သူတွေကို အသိပေးနောက်ကျခဲ့တဲ့အတွက် အနူးအညွတ် တောင်းပန်တယ်လို့လည်း တပ်ဖွဲ့တာဝန်ခံက ပြောပါတယ်။

ဒရုန်းပရောဂျက်အတွက် ကံစမ်းမဲအစောင်ရေ ၄,၀၀၀ ရောင်းချခဲ့ရပြီး လက်မှတ်တစောင်ကို မြန်မာငွေ ၁၀,၀၀၀၊ ဘတ်ငွေ ၁၂၀ နဲ့ ရောင်းချခဲ့တာဖြစ်ကာ လက်မှတ်ဝယ်ယူအားပေးတဲ့ တဦးချင်းစီကိုလည်း ကျေးဇူးတင်သလို စစ်အာဏာရှင် အမြစ်ပြတ်ဖို့ ပြည်သူတွေအနေနဲ့လည်း ဆက်လက်ကူညီပေးဖို့ နဂါးနီစစ်ကြောင်းက တိုက်တွန်းထားပါတယ်။

အခုနှစ် ဇန်နဝါရီလဆန်းပိုင်းက နဂါးနီစစ်ကြောင်းနဲ့ ပူးပေါင်းတပ်ဖွဲ့တွေဟာ ကရင်ပြည်နယ် ကြာအင်းဆိပ်ကြီးမြို့နယ်မှာရှိတဲ့ စစ်ကောင်စီတပ် ဌာနချုပ် ၃ ခုကို ဝင်ရောက်စီးနင်းခဲ့ပြီး ရဲဘော်ဘားတိုက်၊ အရာရှိအဆောက်အအုံ၊ မော်တော်ယာဉ်တွေကို ဖျက်ဆီးနိုင်ခဲ့တဲ့အပြင် စစ်ကောင်စီတပ်သား ၄၅ ဦးကို သေကျေ ဒဏ်ရာရရှိစေခဲ့တယ်လို့ ဇန်နဝါရီ ၉ ရက်က သတင်းထုတ်ပြန်ထားပါတယ်။