စပါးအသင်းရဲ့ ခံစစ်ကစားပုံနဲ့ ခြေစွမ်းအပေါ် နည်းပြကွန်တေကပြန်လည်ဝေဖန်လိုက်ပါတယ်။
အာဆင်နယ်၊ မန်စီးတီးအသင်းတို့နဲ့ကစားခဲ့တဲ့ ပွဲစဉ်တွေမှာ ဂိုးပြတ်ရှုံးနိမ့်ခဲ့ရတဲ့ စပါးဟာ ချန်ပီယံလိဂ်ဝင် ခွင့်ရဖို့ ခက်ခက်ခဲခဲ ကြိုးစားရဖို့ ရှိနေတာပါ။
နောက်ဆုံး ၁၀ ပွဲမှာ ၂၁ ဂိုးအထိပေးခဲ့ရတဲ့ ခံစစ်ပိုင်းက တန်းဆင်းဇုန်က အသင်းတွေရဲ့ စွမ်းဆောင်ရည်မျိုးဖြစ်ပြီး ပြီးခဲ့တဲ့နှစ်ကလို ဂိုးမပေးရတဲ့ပွဲစဉ်တွေရှိဖို့ လိုအပ်ကြောင်း နည်းပြ ကွန်တေက ပြောပါတယ်။
“မနှစ်က ဟူဂိုလိုရစ်တစ်ယောက် ဂိုးမပေးရတဲ့ပွဲ ဘယ်လောက်အထိရှိခဲ့သလဲဆိုတာ မှတ်တောင် မမှတ်မိတော့ဘူး။ ဒါပေမဲ့ ဒီနှစ်ရောက်မှ ပွဲတိုင်းကို အနည်းဆုံး ၂ ဂိုးလောက်ပေးနေရတယ်။ ဒါက ကျနော်တို့ရဲ့အခြေအနေမှန်ဖြစ်ပြီး တန်းမဆင်းရဖို့ တိုက်ပွဲဝင်နေတဲ့ အသင်းတစ်သင်း လိုဖြစ်နေတယ်” လို့ နည်းပြ ကွန်တေကပြောပါတယ်။
လက်ကျန် ၁၈ ပွဲကစားဖို့ ကျန်သေးတာကြောင့် ဥရောပချန်ပီယံလိဂ်ဝင်ခွင့်ရရှိဖို့ ဆက်ပြီး အိပ်မက်မက်ချင်သေးတယ်လို့လည်း နည်းပြကွန်တေက ပြောသွားပါတယ်။
စပါးအသင်းဟာ ချန်ပီယံဆုဖလားကို စိန်ခေါ်နိုင်တဲ့အဆင့်အတန်းမရှိသေးကြောင်း နည်းပြ ကွန်တေက ပြောပါတယ်။
မနေ့ညကပွဲစဉ်မှာ ဗီလာအသင်းကို ၂ ဂိုး ဂိုးမရှိနဲ့ ရှုံးနိမ့်ခဲ့အပြီးမှာ အသင်းရဲ့ ကစားသမားအင်အားနည်းပါးမှုကိုထောက်ပြီး ချန်ပီယံဆုကို စိန်ခေါ်နိုင်စွမ်းမရှိသေးကြောင်း နည်းပြ ကွန်တေကပြောခဲ့တာပါ။
ချန်ပီယံဆုကို စိန်ခေါ်နိုင်ဖို့ဆိုရင် အရည်အသွေးမြင့်တဲ့ အမာခံကစားသမား ၁၄ ဦး ၁၅ ဦးလောက်ရှိဖို့ လိုအပ်သလို ခြေစွမ်းတိုးတက်လာနိုင်တဲ့ လူငယ်ကစားသမားတွေလည်း ရှိဖို့လို ကြောင်း နည်းပြကွန်တေကပြောပါတယ်။
“ချန်ပီယံဆုစိန်ခေါ်နိုင်ဖို့ဆိုရင် နှစ်တိုင်းကစားသမား ၂ ဦး လောက်ခေါ်ဖို့လိုတယ်။ ပေါင်သန်း ၆၀-၇၀ တန်ကစားသမားတွေကမှ အသင်းလူစာရင်းကိုတိုးတက် လာနိုင်တယ်။ ကျနော်တို့အသင်းမှာ ဂိုးဖန်တီးနိုင်စွမ်းရှိတဲ့ ကစားသမားတွေအများကြီးမရှိဘူး”လို့ နည်းပြကွန်တေက ပြောပါတယ်။
စပါးအသင်းဟာ ရစ်ချာလီဆန်နဲ့ ဘန်တန်ကာ တို့လိုခြေစွမ်းပြနေတဲ့ ကစားသမားတွေ ဒဏ်ရာရနေတာကြောင့်လည်း ဗီလာကို အိမ်ကွင်းမှာ ၂ ဂိုးပြတ်နဲ့အရေးနိမ့်ခဲ့ရတာဖြစ်ပါတယ်။
