ဗြိတိန်ဘုရင် ချားလ်စ်ဘုရင်နန်းတက်ပွဲမတိုင်ခင် ရက်ပိုင်းအလို မေလ ၂ ရက်က ဘက်ကင်ဟမ်နန်းတော် အပြင်ဘက်မှာ သေနတ်ကျည်တောင့်တွေလို့ သံသယရှိတဲ့ ပစ္စည်းတွေကို ပစ်ပေါက်ခဲ့တဲ့ အမျိုးသားတယောက်ကို ဖမ်းဆီးခဲ့ပြီး အရာရှိတွေဟာ အဲဒီဧရိယာအတွင်းမှာပဲ ထိန်းချုပ်ဆောင်ရွက်တဲ့ ဖောက်ခွဲမှုကို ပြုလုပ်ခဲ့ပါတယ်။
အဲဒီအမျိုးသားဟာ သူ့ကို ရဲတွေမဖမ်းခင် ဂရင်းနစ်စံတော်ချိန် ၁၈ နာရီလောက်က ဘက်ကင်ဟမ်နန်းတော် ဂိတ်တံခါးတွေနားကို ချဉ်းကပ်လာပြီး သေနတ်ကျည်ကတ်တွေလို့ သံသယရှိတဲ့ ပစ္စည်းတွေကို နန်းတော်မြေနေရာထဲ ပစ်ချခဲ့ကြောင်း ရဲတပ်ဖွဲ့က ပြောပါတယ်။
သူ့ကိုရှာဖွေရာ ဓားတလက် တွေ့ရှိခဲ့ပြီးနောက်မှာ ထိခိုက်ဒဏ်ရာရစေတဲ့ တိုက်ခိုက်ရေးလက်နက် လက်ဝယ်ထားရှိမှု သံသယနဲ့ ဖမ်းဆီးထားကြောင်း လန်ဒန်မြို့တော် ရဲတပ်ဖွဲ့က နောက်ဆုံးထုတ်ပြန်ချက်တခုမှာ ပြောပါတယ်။
အင်္ဂါနေ့ အခင်းဖြစ်ပွားချိန်မှာ ချားလ်စ်ဘုရင်နဲ့ ကြင်ယာတော် ကမီလာတို့ဟာ နန်းတော်မှာ မရှိခဲ့ကြောင်း ဘက်ကင်ဟမ်နန်းတော်က ပြောပါတယ်။
ရဲတပ်ဖွဲ့ကတော့ အဲဒီကိစ္စကို အကြမ်းဖက်မှုနဲ့ ဆက်နွှယ်မှုအဖြစ် လောလောဆယ် သဘောထားခြင်း မရှိဘူးလို့ ထုတ်ပြန်ချက်မှာ ဖော်ပြထားပါတယ်။
ရဲတပ်ဖွဲ့နဲ့ လုံခြုံရေးအဖွဲ့တွေဟာ စနေနေ့မှာ ကမ္ဘာတဝန်းက နိုင်ငံ့ခေါင်းဆောင်တွေ တက်ရောက်ကြမယ့် ချားလ်စ်ဘုရင်ရဲ့ နန်းတက်ပွဲအတွက် ပြင်ဆင်နေကြပြီး လန်ဒန်မြို့ရဲ့ လမ်းမတွေပေါ်မှာ လူအုပ်ကြီးတွေ တန်းစီစောင့်ကြည့်နေကြမယ်လို့လည်း မျှော်လင့်ထားပါတယ်။
အမေရိကန်သမ္မတ ဂျိုးဘိုင်ဒင်က လာမယ့် မေလ ၆ ရက် ဘက်ကင်ဟမ်နန်းတော်မှာ ကျင်းပမယ့် ချားလ်စ်ဘုရင်ရဲ့ နန်းတက်ပွဲကို တက်ရောက်မှာမဟုတ်ဘူးလို့ အိမ်ဖြူတော်ရဲ့ တာဝန်ရှိသူက တိုင်းမ်မဂ္ဂဇင်းကို ပြောပါတယ်။
သမ္မတ ဘိုင်ဒင်ရဲ့ အချိန်ဇယားကို စီစဉ်ပေးရသူက “သမ္မတကြီးရဲ့ မေလအတွက် အစီအစဉ်တွေက အခုထိ ရေးဆွဲနေတုန်းပါ။ ဒါပေမဲ့ နိုင်ငံတနိုင်ငံရဲ့ ဘုရင့်နန်းတက်ပွဲကို အခုလို တခြားနိုင်ငံရဲ့ သမ္မတက တက်ရောက်တယ်ဆိုတာမျိုးက မသင့်တော်ဘူးလို့ ထင်ပါတယ်။ တရားဝင်ဖိတ်စာမျိုး မရောက်သေးပေမဲ့ ဖိတ်ခဲ့ရင်တောင် သမ္မတကြီးက မတက်ဖို့များတယ်” လို့ ပြောပါတယ်။
ဗြိတိသျှဘုရင်စနစ်က အိုင်ယာလန်ကို ကိုလိုနီပြုတာနဲ့ ပတ်သက်ပြီး ဘိုင်ဒင်မိသားစုက ဒေါသထွက်ပါတယ်။ သမ္မတ ဘိုင်ဒင်ကအိုင်းရစ်လူမျိုးဖြစ်တဲ့အတွက် ပုဂ္ဂိုလ်ရေးအရ မကျေမနပ်ဖြစ်တာ ကြာပါပြီလို့ တိုင်းမ်မဂ္ဂဇင်းက မှတ်ချက်ပြုပါတယ်။
မေလ ၆ ရက်မှာ ကျင်းပမယ့် နန်းတက်ပွဲကို ကမ္ဘာတဝန်းက နိုင်ငံသမ္မတတွေ၊ ဝန်ကြီးချုပ်တွေနဲ့ ဘုရင်၊ ဘုရင်မတွေကိုလည်း ဧပြီလထဲမှာ တရားဝင်ဖိတ်စာတွေနဲ့ ဖိတ်ကြားသွားမယ်လို့ သိရပါတယ်။
ဝင်ဆာရဲတိုက်မှာ သမ္မတ ဂျိုးဘိုင်ဒင်နဲ့ သမ္မတကတော် ဒေါက်တာ ဂျေးလ်ဘိုင်ဒင်တို့ဟာ ဘုရင်မ အဲလိဇဘက် မသေဆုံးခင် တနှစ်ကျော်လောက်က တွေ့ဆုံခဲ့ကြပြီး ဘုရင်မကြီးရဲ့ ဈာပနကိုလည်း တခြားခေါင်းဆောင်တွေနဲ့အတူ တက်ရောက်ခဲ့ပါတယ်။
ဘုရင်မကြီး အဲလိဇဘက် ကွယ်လွန်ပြီးနောက် စက်တင်ဘာလမှာ ချားလ်စ်ဘုရင်က နန်းတက်ခဲ့တာဖြစ်ပြီး မိခင်ထက် ပိုမိုကြီးကျယ်တဲ့ နန်းတက်ပွဲ ကျင်းပမယ်လို့ ဆိုပါတယ်။
