ယူရို ၂၀၂၄ ခြေစစ်ပွဲ အဖွင့်ပွဲစဉ်အဖြစ် မတ်လ ၂၃ ရက်က ပေါ်တူဂီအသင်းနဲ့ လက်ချင်စတိန်း အသင်းတို့ ယှဉ်ပြိုင်ကစားခဲ့ရာ ပေါ်တူဂီအသင်းခေါင်းဆောင် ခရစ္စတီယာနို ရော်နယ်ဒိုက နိုင်ငံတကာပွဲစဉ်အများဆုံး ကစားသမားအဖြစ် စံချိန်သစ်တင်နိုင်ခဲ့သလို သွင်းဂိုး ၂ ဂိုးပါ ရယူပေးနိုင်ခဲ့ပါတယ်။
လက်ချင်စတိန်းအသင်းကို ၄ ဂိုး ဂိုးမရှိနဲ့ အနိုင်ရရှိခဲ့တဲ့ ဒီပွဲစဉ်မှာ ရော်နယ်ဒိုက ပေါ်တူဂီအသင်းအတွက် ပယ်နယ်တီနဲ့ အလွတ်တည်ကန်ဘောကနေ ၁ ဂိုးစီ သွင်းယူပေးနိုင်ခဲ့တာပါ။
ဒါကြောင့် နိုင်ငံ့လက်ရွေးစင်အဖြစ် နိုင်ငံတကာပွဲစဉ် ၁၉၇ ပွဲအထိ ကစားပေးခဲ့ပြီးဖြစ်တဲ့ ရော်နယ်ဒိုဟာ ကူဝိတ်အသင်းက ဘတ်ဒါ အယ်လ်မူတာဝါရဲ့ ၁၉၆ ပွဲစံချိန်ကို ကျော်ဖြတ်နိုင်ခဲ့ပါတယ်။
ပေါ်တူဂီအိမ်ကွင်းအဖြစ် လက်ခံကစားခဲ့တဲ့ ဟိုဆေး အဲဗားလိတ် အားကစားကွင်းကြီးမှာ အသင်းအတွက် အနိုင်ဂိုးတွေကို ဂျိုအာ ကန်ဆယ်လိုက ပွဲအစ ၈ မိနစ်မှာ သွင်းယူပေးနိုင်ခဲ့ပြီး ဒုတိယပိုင်း ပွဲပြန်စချိန် ၄၇ မိနစ်မှာတော့ ဘာနာဒို ဆေးလ်ဗားရဲ့ နောက်ထပ်သွင်းဂိုးနဲ့အတူ ၂ ဂိုးပြတ် ဦးဆောင်နေခဲ့တာပါ။
ရော်နယ်ဒိုက ပွဲချိန် ၅၁ မိနစ်မှာ ကန်ဆယ်လိုကြောင့် ရရှိလာတဲ့ ပယ်နယ်တီပြစ်ဒဏ်ဘောကို အပိုင်သွင်းယူနိုင်ခဲ့သလို ပွဲချိန် ၆၃ မိနစ်မှာလည်း သူသွင်းယူနေကျ ပုံစံအတိုင်းဖြစ်တဲ့ အလွတ်တည်ကန်ဘောကို အပြင်းကန်သွင်းကာ အသင်းအတွက် ၄ ဂိုးမြောက် ရယူပေးနိုင်ခဲ့ပါတယ်။
ပေါ်တူဂီအသင်းခေါင်းဆောင်ဟာ ဟက်ထရစ်သွင်းဂိုး ပြည့်မြောက်ဖို့ အခွင့်အရေး ၂ ကြိမ် ရခဲ့ပေမဲ့ အသုံးမချနိုင်ခဲ့တာကြောင့် ပွဲချိန် ၇၈ မိနစ်အရောက်မှာ ဂွန်ကာလို ရာမို့စ်နဲ့ လူစားလဲခဲ့ပါတယ်။
ပြီးခဲ့တဲ့လက အသက် ၃၈ နှစ်ပြည့်ခဲ့တဲ့ ရော်နယ်ဒိုဟာ ဒီပွဲစဉ်မှာ ၂ ဂိုး သွင်းယူနိုင်ခဲ့တာကြောင့် နိုင်ငံတကာသွင်းဂိုး ၁၂၀ အထိ ရှိလာခဲ့ပြီဖြစ်ပြီး နိုင်ငံအဆင့် ဘောလုံးလောကမှာ သွင်းဂိုးအများဆုံး ကစားသမားအဖြစ်လည်း ထိပ်ဆုံးက ရပ်တည်နေပါတယ်။
နိုင်ငံတကာပွဲစဉ်တွေမတိုင်ခင် ကစားရမယ့်သုံးပွဲက တစ်ရာသီလုံးစာအတွက် အဆုံးအဖြတ်ပေးနိုင် ကြောင်း မန်စီးတီးနည်းပြ ဂွါဒီယိုလာက ပြောသွားပါတယ်။
မန်စီးတီးအသင်းဟာလာမယ့် နိုင်ငံတကာပွဲစဉ်တွေမတိုင်ခင် သုံးပွဲအဖြစ် ခရစ္စတယ်ပဲလေ့နဲ့ လိဂ်ပွဲစဉ်၊ လိုက်ဇစ်နဲ့ ချန်ပီယံလိဂ်ပွဲစဉ်၊ ဘန်လေနဲ့ အက်ဖ်အေဖလားပွဲစဉ်တွေ ယှဉ်ပြိုင်ကစား သွားရမှာပါ။
အဲဒီလို မတူညီတဲ့ပြိုင်ပွဲသုံးပွဲဟာ မန်စီးတီးအသင်းရဲ့ တစ်ရာသီစာအခြေအနေကို ဆုံးဖြတ်ပေးသွားနိုင်တယ်လို့ ဂွါဒီယိုလာက ပြောပါတယ်။
“ဒီပွဲစဉ်သုံးပွဲဟာ ရာသီအကုန်မှာ ကျနော်တို့ ဘာကိုလိုချင်သလဲဆိုတာကို သတ်မှတ်ဆုံးဖြတ်ပေးသွားလိမ့်မယ်” လို့ နည်းပြ ဂွါဒီယိုလာက ပြောပါတယ်။
မန်စီးတီးဟာ လာမယ့် မတ်လ ၁၂ ရက်ကနေ ၁၉ ရက်အတွင်းမှာ အဲဒီပွဲစဉ် ၃ ပွဲကို ဆက်တိုက်ယှဉ် ပြိုင်သွားရမှာ ဖြစ်ပါတယ်။
