မန်စီးတီးအသင်းဟာ ကမ္ဘာ့ဖလားပြိုင်ပွဲကစားမယ့်နိုင်ငံအသင်းတွေဆီကို ကစားသမားတွေစေလွှတ် ပေးခဲ့မှုအတွက် ဖီဖာဆီကနေ ငွေအများဆုံးရရှိမယ့်အသင်းဖြစ်လာဖို့ရှိနေပါတယ်။

ဖီဖာဟာ ကလပ်အသင်းတွေရဲ့အကျိုးကိုရည်ရွယ်ပြီး နိုင်ငံအသင်းတွေဆီကို စေလွှတ်တဲ့ ကစားသမားအရေအတွက်နဲ့ အောင်မြင်မှုကိုလိုက်ပြီး ငွေကြေးထောက်ပံ့ပေးပါတယ်။

ဖီဖာဟာ ကစားသမားတစ်ဦးအတွက် တစ်ရက်ကို ဒေါ်လာ တစ်သောင်းနဲ့ ညီမျှတဲ့ ပေါင် ၈၁၂၀ ကို မိခင်ကလပ်တွေဆီ ပြန်ပေးတာပါ။

မန်စီးတီးအသင်းဟာ ကမ္ဘာ့ဖလားပြိုင်ပွဲဆီကို စုစုပေါင်း ၁၆ ဦးစေလွှတ်ခဲ့တာပါ။ အဲဒီထဲက အာဂျင် တီးနားတိုက်စစ်မှူးအယ်ဗာရက်ဇ်က ဗိုလ်လုပွဲကစားခွင့်ရရှိမှာပါ။

အုပ်စုအဆင့်ကနေ ထွက်ခဲ့ရတဲ့ ဘယ်လ်ဂျီယံကစားသမား ဒီဘရိုင်းနဲ့ ဂျာမနီကွင်းလယ်လူ ဂွမ်ဒိုဂန်တို့အတွက် ဖီဖာဆီက ငွေကြေးသိပ်မရပေမယ့် ကွာတားဖိုင်နယ်တက်ခဲ့တဲ့ အသင်းတွေက ကစားသမားတွေလည်း ရှိပါတယ်။

မန်စီးတီးအနေနဲ့ ကစားသမား ၁၆ ဦးအတွက် စုစုပေါင်း ပေါင် ၄ သန်းခွဲရရှိနိုင်ပြီး တခြားအသင်းတွေထက် ပိုများတဲ့ပမာဏဖြစ်လာမှာပါ။

ဘာစီလိုနာအသင်းက ကစားသမား ၁၇ ဦး အထိစေလွှတ်ပေးခဲ့ရပေမယ့် စပိန်အသင်းက ၁၆ သင်း အဆင့်မှာပဲထွက်ခဲ့ရလို့ ပေါင် ၃ ဒသမ ၃ သန်းလောက်သာရရှိနိုင်တယ်လို့သိရပါတယ်။

ဘာစီလိုနာပြီးရင်တော့  မန်ယူ၊ ချဲလ်ဆီး၊ စပါးနဲ့ အာဆင်နယ်အသင်းတွေက ငွေကြေးရရှိနိုင်မှုမှာ အစဉ်လိုက်ရပ်တည်နေပါတယ်။ 

ဆွစ်ဇာလန်အသင်းနဲ့ ယှဉ်ပြိုင်ကစားရမယ့် ရှုံးထွက်ပွဲစဉ်အတွက် ပွဲထွက်ကစားသမားစာရင်းကို ပေါ်တူဂီလက်ရွေးစင်အသင်းအတွက်ပဲ ကြည့်ပြီးဆုံးဖြတ်ရွေးချယ်သွားမယ်လို့ နည်းပြဆန်းတို့စ်က ပြောပါတယ်။

တောင်ကိုရီးယားနဲ့ အုပ်စုနောက်ဆုံးပွဲစဉ်မှာ အသင်းခေါင်းဆောင် ရော်နယ်ဒိုကို လူစားလဲခဲ့ပြီးနောက် နည်းပြဆန်းတို့စ်နဲ့ ရော်နယ်ဒိုတို့ ကြားမှာ အဖုအထစ်ရှိခဲ့ပါတယ်။

ဆွစ်ဇာလန်နဲ့ရှုံးထွက်ပွဲစဉ်မှာ ရော်နယ်ဒိုကို ပွဲထွက်မလားဆိုတာ မပြောနိုင်ကြောင်းနဲ့ အသင်းအဝတ်လဲခန်းထဲမှာပဲ ဘယ်သူတွေက ပွဲထွက်ခွင့်ရမယ်ဆိုတာ ပြောပြမှာဖြစ်ကြောင်း နည်းပြဆန်းတို့စ်က ပြောပါတယ်။

“ပွဲထွက်ကစားသင့်တဲ့ လူစာရင်းကိုပဲ ကျနော် ရွေးချယ်မှာပါ။ ပြီးတော့ တစ်စုံတစ်ယောက်အတွက် မဟုတ်ဘဲ ပေါ်တူဂီနဲ့ နိုင်ငံ့လက်ရွေးစင်အတွက်ပဲ ကြည့်ပြီး ရွေးချယ်မှာပါ။ ရော်နယ်ဒိုနဲ့ကိစ္စက အတွင်းထဲမှာ ဖြေရှင်းပြီးပါပြီ”လို့ နည်းပြဆန်းတို့စ်က ပြောပါတယ်။

စီရော်နယ်ဒိုကတော့ နည်းပြဆန်းတို့စ်နဲ့ စကားအချေအတင်ဖြစ်ခဲ့တာကို ငြင်းဆန်ထားပါတယ်။