နီကာရာဂွါနိုင်ငံမှာ ဂျီနိုတီဂါကနေ ဆန်ဆဘေးရှန်ဒီရလီကို ထွက်ခွာလာတဲ့ ခရီးသည် ၆၀ လောက် လိုက်ပါလာတဲ့ ဘတ်စ်ကားတစီးဟာ အာဖရိကပျားအုံတွေရှိတဲ့ ဧရိယာမှာ ကားမှောက်ခဲ့တယ်လို့ ဒေသတွင်းမီဒီယာတွေက ဖော်ပြခဲ့ပါတယ်။

လူသတ်ပျားလို့ လူသိများတဲ့ အာဖရိကပျားတွေဟာ ကားပေါ်က ခရီးသည် ၄၅ ယောက်ကို တုပ်ခဲ့ပါတယ်။

မီးသတ်ဌာနနဲ့ ကျန်းမာရေးဝန်ကြီးဌာနက ဝန်ထမ်းတွေ ရောက်မလာခင်မှာ ဒေသခံတွေက ခရီးသည်တွေကို ကူညီကယ်ဆယ်ခဲ့ကြပါတယ်။

မေ ၈ ရက်နေ့မှာ ပျားဆိပ်တက်ပြီး လူ ၄ ဦး သေဆုံးခဲ့တယ်လို့ ကနဦး သတင်းရရှိခဲ့ပြီး နောက်ထပ် ၂ ဦးဟာ ဆေးရုံကိုပို့ဆောင်ပြီးနောက် သေဆုံးခဲ့ကြောင်း ထုတ်ဖော်ပြောကြားပါတယ်။

ပျားဆိပ်တက်လို့ သေဆုံးသွား‌သူတွေထဲမှာ အသက်၈ နှစ်အရွယ် အန်ဒရာ ကယ်ရိုလီနာနဲ့ သူ့အမေ အန်ရ်ဒါ ဇယ်လီရ အသက် ၄၇ နှစ်တို့ ပါဝင်ပါတယ်။

အဆိုပါ မတော်တဆမှုမှာ ၁၄ ဦး ထိခိုက်ဒဏ်ရာရရှိခဲ့ပြီး ၄ နှစ်အရွယ် ကလေးတဦးပါဝင်ကာ ပြင်းထန်တဲ့ အခြေအနေ ရှိနေတယ်လို့ သိရပါတယ်။

အာဖရိကပျားတွေဟာ ပိုမိုခုခံကာကွယ်တတ်ကြပြီး တခြားမျိုးစိတ် ပျားတွေထက် လူကို တုံ့ပြန်ဖို့ ပိုမိုမြန်ဆန်ပါတယ်။

အာဖရိကပျားတွေကြောင့် လူပေါင်း ၁,၀၀၀ ခန့် သေဆုံးခဲ့ပြီး ပျားတုပ်ခံရသူတွေဟာ ဥရောပပျားတွေထက် ၁၀ ဆ ပိုမိုပြင်းထန်စွာ ခံစားရပါတယ်။

Source - Sky News

နိုင်ငံရေးအကျဉ်းသား ၂၀၀ ကျော်ကို လွှတ်ပေးခဲ့ပြီး အမေရိကန်ကို ပို့ဆောင်လိုက်ကြောင်း နီကာရာဂွါ တရားရေးဌာနက ဖေဖော်ဝါရီ ၉ ရက်မှာ သတင်းထုတ်ပြန်ပါတယ်။

သစ္စာဖောက်လို့ သတ်မှတ်ခံရတဲ့ အကျဉ်းသား ၂၂၂ ဦးကို ပြည်နှင်ဒဏ်လိုက် ပေးကြောင်း နီကာရာဂွါ တရားစီရင်ရေး အဖွဲ့ဝင်တဦးက ရုပ်မြင်သံကြား ထုတ်ပြန်ချက်တခုမှာကြေညာခဲ့တာပါ။

နီကာရာဂွါအစိုးရဟာ လူ ၂၂၂ ဦးကို လွှတ်ပေးဖို့ တဖက်သတ် ဆုံးဖြတ်ခဲ့ကြောင်းနဲ့ အမေရိကန်ပြည်ထောင်စုက သယ်ယူပို့ဆောင်ရေးကို စီစဉ်ပေးခဲ့ကြောင်း အမေရိကန် ပြောရေးဆိုခွင့်ရှိသူက အတည်ပြုခဲ့ပါတယ်။

လတ်တလောနှစ်တွေအတွင်း သမ္မတ ဒန်နီရယ် အော်‌တေဂါ အစိုးရအဖွဲ့ဟာ အတိုက်အခံတွေ၊ ဂျာနယ်လစ်တွေနဲ့ ဘာသာရေးခေါင်းဆောင် ဒါဇင်ပေါင်းများစွာကို ဖမ်းဆီးခဲ့ပြီး သူတို့ထဲက တချို့ဟာ ၂၀၁၈ ခုနှစ်က အစိုးရဆန့်ကျင်ရေး ဆန္ဒပြမှုတွေကြောင့် ဖမ်းဆီးခံခဲ့ရတာပါ။

လွတ်မြောက်လာသူတွေထဲမှာ သမ္မတလောင်း ကိုယ်စားလှယ်ဟောင်း ၅ ဦးနဲ့ ထင်ရှားတဲ့ ကျောင်းသားတက်ကြွလှုပ်ရှားသူ လက်စ်သာ အလေမန်တို့ ပါဝင်ကြောင်း နီကာရာဂွါ တရားစီရင်ရေး မှတ်တမ်းအရ သိရပါတယ်။

အကျဉ်းသားဟောင်းတွေဟာ ကြာသပတေးနေ့ မနက်ပိုင်းမှာတော့ ဝါရှင်တန်အနီးရှိ ဒါးလက်စ် အပြည်ပြည်ဆိုင်ရာလေဆိပ်ကို ရောက်ရှိခဲ့ကြပါတယ်။

အမေရိကန်နိုင်ငံခြားရေးဌာနက အဲဒီလူတွေကို အမေရိကန်ရှိ သူတို့ရဲ့ ဆွေမျိုးတွေနဲ့ ချိတ်ဆက်ကူညီပေးသွားမှာဖြစ်ကြောင်း ရိုက်တာသတင်းဌာနက သုံးသပ်ထားတဲ့ အမေရိကန် အရာရှိတွေရဲ့ အီးမေးလ်တစောင်အရ သိရပါတယ်။

ရောက်ရှိလာသူအားလုံးဟာ လူသားချင်းစာနာထောက်ထားမှုဆိုင်ရာ လွတ်ငြိမ်းချမ်းသာခွင့် လုပ်ငန်းစဉ်ကို ဖြတ်သန်းသွားရမှာဖြစ်ကြောင်း ဘိုင်ဒင်အုပ်ချုပ်ရေးအဖွဲ့က ပြောပါတယ်။