ရှမ်းပြည်တောင်ပိုင်း လျွိင်လင်ခရိုင် ပင်လုံမြို့မှာ မူးယစ်ဆေးသုံးစွဲထားတဲ့သားဖြစ်သူက  မိဘ နှစ်ပါးကို သတ်ဖြတ်ပြီး အလောင်းတွေကို ခုတင်အောက်နဲ့ အိမ်ခြံဝင်းထဲ  မြှုပ်နှံထားခဲ့တဲ့အမှု ဖြစ်ပွားခဲ့ပါတယ်။

ပင်လုံမြို့ ရပ်ကွက် ၃ ရှိ နေအိမ်တစ်အိမ်မှာနေထိုင်သူ ဦးလောနဲ့ နန်းမတ် (အမည်လွှဲ) တို့ဇနီးမောင်နှံဟာ ရက်အတန်ကြာပျောက်ဆုံးနေပြီး ဆွေမျိုးတွေက အဆက်အသွယ်မရလို့ မတ် ၁၂ ရက်က သက်ဆိုင်ရာကို တိုင်ကြားခဲ့ကြောင်း၊ တာဝန်ရှိသူတွေက သွားရောက်စစ်ဆေးရာမှာ အိပ်ခန်းခုတင်အောက်မှာ ဖွက်ထားတဲ့ ဦးလောရဲ့အလောင်းနဲ့ နန်းမတ်ရဲ့အလောင်းကိုလည်း အိမ်ဝင်းရှိ ထင်းပုံဘေးမှာ မြှုပ်ထားတာ တွေ့ရတယ်လို့ ပင်လုံမြို့ ဖြူစင်မေတ္တာနာရေးနဲ့ မြတ်နှလုံးသားလူငယ်အဖွဲ့ ဥက္ကဋ္ဌ ဦးစိုင်းယုံးက ဒီဗွီဘီကို ပြောပါတယ်။ 

“သူတို့က ဈေးရောင်းတာလေ။ ခုတလော ဈေးသွားတာလည်း မတွေ့၊ ဖုန်းဆက်လို့လည်း မရဘူး။ ၁၂ ရက်နေ့က သူတို့သားကြီးကိုတွေ့တယ်၊ အဲဒါဆွေမျိုးတွေက သွားမေးတော့ သူ့အမူအယာ ပျက်နေတယ်၊ ပြီးတော့ အိမ်တံခါးသော့ခတ်ပြီးအပြင်ထွက်သွားတယ်တဲ့။ ဆွေမျိုးတွေက သက်ဆိုင်ရာကိုတိုင်တော့ ကျနော်တို့လည်းလိုက်သွားရတယ်၊ အိမ်တံခါးသော့ဖျက်ပြီး အထဲဝင်ရှာတော့ ခုတင်အောက်မှာ ဦးလောရဲ့အလောင်းကိုတွေ့တာ၊ လည်ပင်းမှာ ဓားထိုးခံရတဲ့ဒဏ်ရာနဲ့၊ အလောင်းက ပုပ်ပွနံစော်နေပြီ၊ အသတ်ခံရတာကြာပြီထင်တယ်။ အလောင်းကိုဆေးရုံသယ်ခဲ့ပြီး ရဲတွေက သူတို့သားကိုလိုက်ရှာတယ်။ ညနေ ၆ နာရီကျော်လောက် ပင်လုံ-တောင်ကြီးအထွက်လမ်း ပန်မုံ့ရွာနားမှာ အိတ်တလုံးနဲ့လမ်းလျှောက်နေတဲ့ သူ့ကိုဖမ်းမိတာ၊ သူက အမေရဲ့ အလောင်းကိုလည်း ခြံဝင်းထဲက ထင်းပုံနားမှာ မြှုပ်ထားတယ်လို့ ဝန်ခံတယ်။”

သူတို့သားမှာ အသက် ၂၀ ကျော်ရွယ်ရှိပြီး ဒီမတိုင်ခင်က ဆိုင်ကယ်လိုချင်ကြောင်း မိဘတွေကိုပူဆာရာက မိဘက ဝယ်မပေးနိုင်တာကြောင့်  မိဘနှစ်ပါးလုံးကို ဓားနဲ့ထိုးသတ်ခဲ့တာလို့ ဆိုပါတယ်။ 

လူသတ်မှု ကျူးလွန်ခဲ့တဲ့နေ့ကို အတိအကျမပြောပေမယ့် မတ် ၁၀ ရက်လို့ တာဝန်ရှိသူတွေက ခန့်မှန်းပါတယ်။

သူဟာ ရာဘဆေးသုံးတတ်ပြီး စိတ်သိပ်မနှံ့ကြောင်း၊ သူတို့အဖေကတော့ လေဖျန်းပြီး အိပ်ရာက မထနိုင်တာကြာပြီလို့ ဆွေမျိုးနီးစပ်တွေက ပြောပါတယ်။ 

လူသတ်မှုကျူးလွန်သူကို လက်ရှိ ပင်လုံမြို့မရဲစခန်းမှာ  ဖမ်းဆီးထိန်းသိမ်းထားပြီး တရားဥပဒေအရ ဆက်လက်အရေးယူသွားမယ်လို့ သိရပါတယ်။

ရှမ်းပြည်တောင်ပိုင်း လွိုင်လင်ခရိုင် ပင်လုံမြို့နယ် နောင်လိုင်ကျေးရွာရိုးရာပွဲတစ်ခုမှာ ပြီးခဲ့တဲ့ အပတ်က ဆင်းရဲနွမ်းပါးလင်မယား ၂ ဦးက လူမမယ် ရင်သွေးငယ် ၄ ဦးကို လာရောက် ရောင်းချခဲ့တဲ့ ဖြစ်ရပ်တစ်ခု ဖြစ်ပွားခဲ့ပါတယ်။

အဲဒီနေ့က နောင်လိုင်ရွာမှာမြို့ရွာစောင့်နတ်ပူဇော်ပွဲကျင်းပစဉ် နားစမ့်ဆိုတဲ့တောင်ပေါ်ရွာက လာတဲ့ အသက် ၃၀ ကျော်ရွယ် လင်မယား ၂ ယောက်ဟာ စားဝတ်နေရေးခက်ခဲပြီး ကလေးတွေကို ဆက်မမွေးနိုင်တော့တဲ့အတွက် လိုချင်တဲ့သူတွေပေးမယ်၊ ရောင်းမယ်လို့ ပြောခဲ့ကြောင်း ပွဲခင်းရောက် ယိင်းခမ်းလှိုင်းက ဒီဗွီဘီကို ပြောပါတယ်။ 

“ပွဲခင်းထဲမှာ ကလေးလာရောင်းနေတယ်ဆိုလို့ ကျမလဲသွားကြည့်တာပေါ့၊ ကလေးက ၄ ယောက်။ ယောက်ျားလေး ၂ ယောက်၊ မိန်းကလေး ၂ ယောက်။ အကြီးဆုံးယောက်ျားလေးက ၅ နှစ်ကျော်၊ ဒုတိယမိန်းကလေးက ၃ နှစ်၊ အငယ် ၂ ယောက်က ၁ နှစ် ၆ လ နဲ့ ၅ လရွယ်ပါ။ အငယ် ၂ ယောက်လုံး နို့စို့နေတုန်းပဲ၊ သူတို့ပါးစပ်က ရောင်းမလား ပေးမလားဆိုတာကို သဲသဲကွဲကွဲမကြားရဘူး၊ လူအုပ်က တယောက်တမျိုးနဲ့ ဆူညံနေတာဘဲ။ သေချာတာကတော့ သူတို့ဆက်မမွေးနိုင်ဘူးလို့ပြောတာ။ အဲဒီမှာ အဒေါ်ကြီး တယောက်က အကြီးဆုံးသားကို မွေးစားမယ်ပြောတော့ ကလေးက နည်းနည်းသိတတ်နေပြီဆိုတော့ မလိုက်ဘူး၊ အမေနဲ့ပဲ နေချင်တယ်ပြောလို့ ပွဲခင်းထဲကလူတွေ အကုန်သနားသွားကြတယ်၊ ကလေးကို မရောင်း ပါနဲ့လို့ပြောပြီး ကစားစရာတွေ မုန့်တွေ ပိုက်ဆံတွေဝိုင်းပေးကြတယ်။”             

သူတို့လင်မယားဟာ တောင်ပေါ်တိုင်းရင်းသားတမျိုးဖြစ်ပြီး ပြောဆိုဆက်ဆံရတာ စကားသိပ်မပေါက်ကြောင်း၊ အမေဖြစ်သူကလည်း ကြည့်ရတာ ဉာဏ်ရည်မပြည့်သလိုပဲလို့ သူမက ဆက်ပြောပါတယ်။ 

ရွာသားဆီက အလှူငွေ ကျပ် ၂ သိန်းကျော်လောက်ရပြီးနောက် သူတို့လည်း ကလေး ရောင်းမယ့်အကြောင်း ထပ်မပြောတော့ဘဲ ပင်လုံသွားချင်တယ်ပြောလို့ ရွာသားတွေက လိုက်ပို့ပေးလိုက်တယ်လို့ ဆိုပါတယ်။ 

ဒီဖြစ်စဉ်ကို ယိင်းခမ်းလှိုင်းက လိုက်ဖ်လွှင့်ပြီး လူမှုကွန်ရက်မှာ တင်ခဲ့တာကြောင့် သူတို့မိသားစုကို ကူညီချင်သူတွေအများအပြား ဆက်သွယ်လာပေမယ့်  နောက်ထပ်မတွေ့ရတော့ ဘူးလို့ ဆိုပါတယ်။