ကမ္ဘာ့ဖလားဗိုလ်လုပွဲစဉ်ကို ဒိုင်တွေရဲ့ မှားယွင်းမှုကြောင့် ပြန်ကန်ပေးဖို့ တောင်းဆိုခဲ့တဲ့ ပြင်သစ်ပရိသတ်တွေကို ကွင်းလယ်ဒိုင်လူကြီး ဆီမွန်မာချီညက်က ပြန်လည်တုံ့ပြန်လိုက်ပါတယ်။

ပြင်သစ်ပရိသတ် နှစ်သိန်းကျော်ဟာ ဗိုလ်လုပွဲစဉ်ကို ပြန်ကန်ပေးဖို့ အွန်လိုင်းကနေ လက်မှတ်ရေးထိုး တောင်းဆိုခဲ့ပြီး အာဂျင်တီးနားရရှိခဲ့တဲ့ သွင်းဂိုး နှစ်ဂိုးဟာ ခွင့်မပြုသင့်တဲ့ ဂိုးတွေလို့လည်း ဆိုပါတယ်။

ပရိသတ်တွေအပြင် ပြင်သစ်မီဒီယာတချို့ကလည်း မက်ဆီရဲ့ အချိန်ပို သွင်းဂိုးမှာ ဂိုးမဝင်ခင် အရန်ခုံတန်းက ကစားသမား နှစ်ဦးက ကွင်းထဲကို ရောက်ရှိနေလို့ စည်းမျဉ်းအရ ဂိုးမပေးသင့်ဘူး လို့ ဖော်ပြခဲ့ကြတာပါ။

ဘောလုံး ဥပဒေ(၃)၊ အပိုဒ်(၉)မှာ ဂိုးသွင်းနေချိန်မှာ အပြင်က လူ တစ်ဦးဦးက ကွင်းထဲဝင်နေမယ်ဆိုရင် သွင်းဂိုးကို ခွင့်မပြုဘဲ အလွတ်တည်ကန်ဘောသာပေးရမယ်လို့ ပါရှိကြောင်း ပြင်သစ်သတင်းစာ L’Equipe က ထောက်ပြခဲ့တာပါ။

ဗိုလ်လုပွဲကို ကိုင်တွယ်ခဲ့တဲ့ ပိုလန်ဒိုင်လူကြီး မာချီညက်ကတော့ အမ်ဘာပေဂိုး သွင်းနေချိန်မှာ အရန်ခုံတန်းက ပြင်သစ်ကစားသမား ၇ ဦးအထိ ကွင်းထဲဝင်ရောက်နေကြောင်း ဖုန်းထဲက ဓာတ်ပုံ သက်သေနဲ့တကွ ပြန်လည်တုံ့ပြန်ခဲ့တာဖြစ်ပါတယ်။ 

မန်ယူပရိသတ်တွေရဲ့ လုပ်ရပ်ကြောင့် ဥရောပဘောလုံးအဖွဲ့ချုပ်က အသင်းကို ဒဏ်ငွေယူရို ၁ သောင်း ပြစ်ဒဏ်ချမှတ်ခဲ့ပါတယ်။ 

မန်ယူအသင်းပရိသတ်တွေဟာ အက်သလက်တီကိုအသင်းကို ၁ ဂိုး ဂိုးမရှိ နဲ့ ရှုံးနိမ့်ခဲ့တဲ့ ချန်ပီယံလိဂ်ဒုတိယအကျော့ပွဲစဉ်မှာ နည်းပြ ဆီမြွန်နီကို အရာဝတ္ထုတွေနဲ့ ပစ်ပေါက်ခဲ့တာပါ။ 

ပွဲအပြီးမှာ အသင်းအဝတ်လဲခန်းဆီကို လျှောက်လာတဲ့ အက်သလက်တီကို နည်းပြ ဆီမြွန်နီကို မန်ယူပရိသတ်တွေက အရာဝတ္ထုတွေနဲ့ပစ်ပေါက်ခဲ့သလို ဆဲဆိုမှုတွေလည်း ပြုလုပ်ခဲ့တာပါ။ 

ယူနိုက်တက်အသင်းဟာ အက်သလက်တီကို အသင်းကိုရှုံးနိမ့်ခဲ့တာကြောင့် နှစ်ကျော့ပေါင်းရလဒ် ၂ ဂိုး ၁ ဂိုးနဲ့ ချန်ပီယံလိဂ်ပြိုင်ပွဲကနေထွက်ခွာခဲ့ရတာပါ။ 

ဥရောပဘောလုံးအဖွဲ့ချုပ်ဟာ စကော့တလန်ကလပ် ရိန်းဂျားအသင်းကိုလည်း ယူရို ၄၆,၂၅၀ ကျော် ဒဏ်ရိုက်ခဲ့ပါတယ်။ 

ရိန်းဂျားပရိသတ်တွေဟာ ဘရာဂါနဲ့ယူရိုပါလိဂ်ကွာတားဖိုင်နယ်မှာ မီးရူးမီးပန်းတွေ ပစ်ဖောက်ခဲ့သလို အသင်းတာဝန်ရှိသူတွေဟာလည်း ပွဲချိန်နောက်ကျခဲ့ရာမှာ တာဝန်ရှိခဲ့တာကြောင့် ပြစ်ဒဏ်ချမှတ်ခံခဲ့ရတာပါ။ 

အလားတူ လီဗာပူးအသင်းကိုလည်း ဘင်ဖီကာနဲ့ ပထမအကျော့ပွဲစဉ်မှာ ပွဲချိန်နောက်ကျစေမှုကြောင့် ယူရို ၁ သောင်းဒဏ်ရိုက်ခံရပြီး နည်းပြ ယာဂန်ကလော့ပ်ဟာလည်း သတိပေးခံခဲ့ရပါတယ်။ 

ဂါလာတာစာရေးအသင်းကတော့ ဘာစီလိုနာနဲ့ပွဲမှာ ပရိသတ်တွေက ပုလင်းတွေ၊ ပလတ်စတစ်ခွက်တွေနဲ့ ပစ်ပေါက်မှုကြောင့် အဲဒီပွဲကြည့်စင်တန်းကို ၂ နှစ်လောက်အထိ ပိတ်ထားဖို့ ဆိုင်းငံ့ပြစ်ဒဏ်ချမှတ်ခံခဲ့ရပါတယ်။