ဘန်လေအသင်းကို ပရီးမီးယားလိဂ်ဆီ တန်းတက်အောင်စွမ်းဆောင်နိုင်ခဲ့တဲ့ နည်းပြကွန်ပနီဟာ အသင်းနဲ့ ၅ နှစ် စာချုပ်သစ်ချုပ်ဆိုခဲ့ပါတယ်။

ကွန်ပနီဟာ ဘန်လေအသင်းကို ခံစစ်အသားပေးအသင်း ပုံစံကနေ ဆွဲဆောင်မှုရှိတဲ့ တိုက်စစ်အသားပေးအသင်းအဖြစ် ပြောင်းလဲပေးခဲ့သူလဲဖြစ်ပါတယ်။

တခြားအသင်းတွေနဲ့ အပြောင်းအရွှေ့သတင်းတွေထွက်ပေါ်ခဲ့ပေမဲ့ ဘန်လေအသင်းမှာပဲ ဆက်ရှိဖို့ ဆုံးဖြတ်ပြီး ၂၀၂၈ ခုနှစ်အထိ စာချုပ်ချုပ်ဆိုခဲ့တာပါ။

အသင်းပရိသတ်တွေနဲ့အတူ ဘန်လေအသင်းကို ပိုကောင်းတဲ့ အသင်းဖြစ်အောင် စွမ်းဆောင်သွားချင်ပြီး  ၅ နှစ်စာချုပ်ချုပ်ဆိုခဲ့တာက မှန်ကန်တဲ့ ဆုံးဖြတ်ချက်ဖြစ်ကြောင်း ၃၇နှစ်ရှိ နည်းပြ ကွန်ပနီကပြောပါတယ်။

ဘယ်လ်ဂျီယံသားဟာ ကစားသမားဘဝက မန်စီးတီးအသင်းမှာ နည်းပြဂွါဒီယိုလာနဲ့ လက်တွဲညီခဲ့သူဖြစ်ပြီး လာမဲ့ရာသီမှာ နည်းပြဘဝနဲ့ ပရီးမီးယားလိဂ် ဆီပြန်ရောက်တော့မှာ ဖြစ်ပါတယ်။ 

စပါးတိုက်စစ်မှူးဟယ်ရီကိန်းဟာ ခရစ္စတယ်ပဲလေ့နဲ့ပွဲမှာ တစ်ဂိုးသွင်းယူခဲ့ပြီးနောက်ရွန်းနီရဲ့ စံချိန်ကို ကျော်ဖြတ်ပြီး ပရီးမီးယားလိဂ်သွင်းဂိုး ဒုတိယအများဆုံးကစားသမားဖြစ်လာပါတယ်။

ဟယ်ရီကိန်းဟာ ပဲလေ့နဲ့ပွဲမှာ ပရီးမီးယားလိဂ်သွင်းဂိုး ၂၀၉ ဂိုးပြည့်မြောက်ခဲ့ပြီး ၂၀၈ ဂိုးသွင်းခဲ့တဲ့ရွန်းနီရဲ့ စံချိန်ကို ကျော်ဖြတ်နိုင်ခဲ့တာပါ။

ပရီးမီးယားလိဂ်သမိုင်းတစ်လျှောက် ဂိုးအများဆုံးကစားသမားက နယူးကာ ဆယ်တိုက်စစ်မှူးဟောင်း အလန်ရှီးယားဖြစ်ပြီး ဂိုး ၂၆၀ သွင်းယူထားတာပါ။ 

ဟယ်ရီကိန်းဟာ ပွဲပေါင်း ၃၁၇ ပွဲမှာပဲ  ၂၀၉ ဂိုးသွင်းယူနိုင်ခဲ့တာဖြစ်ပြီး ရွန်းနီးထက် ၁၇၄ပွဲ လျော့နည်းကစားပြီး သွင်းယူနိုင်ခဲ့တာပါ။ 

ဝိန်းရွန်းနီက စုစုပေါင်း ၄၉၁ ပွဲမှာ ၂၀၈ ဂိုးသွင်းယူခဲ့တာဖြစ်ပါတယ်။ ဟယ်ရီကိန်းဟာ ပရီမီးယားလိဂ်ဂိုးအများဆုံးစံချိန်တင်ထားတဲ့ အလန်ရှီးယားကိုလိုက်မီဖို့ ၅၁ ဂိုးလိုအပ်နေသေးပြီး စံချိန်သစ်တင်နိုင်ဖို့ နှစ်ရာသီလောက် စောင့်ရဖို့ရှိပါတယ်။