အီတလီနိုင်ငံမီလန်မြို့က စူပါမားကတ်တစ်ခုမှာ ဓားထိုးခံခဲ့ရတဲ့ အာဆင်နယ်နောက်ခံလူ မာဘလို မာရီဟာ ဒဏ်ရာကို ခွဲစိတ်ကုသခဲ့လို့ ၂ လလောက် အနားယူရမယ်လို့သိရပါတယ်။
အီတလီကလပ် မွန်ဇာမှာအငှားစာချုပ်နဲ့ ကစားနေတဲ့ ပါဘလိုမာရီဟာ ဇနီးနဲ့ သားဖြစ်သူတွေနဲ့အတူ မီလန်မြို့က စူပါမားကတ် တစ်ခုကိုသွားရောက်ခဲ့ရာမှာ စိတ်ရောဂါအခံရှိသူတစ်ဦးက ဓားနဲ့ တိုက်ခိုက်ခံခဲ့ရတာပါ။
အဲဒီတိုက်ခိုက်မှုအတွင်းမှာ စူပါမားကတ်ဝန်ထမ်းတစ်ဦးသေဆုံးခဲ့ပြီး ပါဘလိုမာရီနဲ့အတူ တခြားဒဏ်ရာရသူတွေလည်းရှိခဲ့တာပါ။
နောက်ခံလူ မာရီဟာ နောက်ကျောဘက် ကြွက်သားဒဏ်ရာ နှစ်ချက်ရရှိခဲ့ပြီး ခွဲစိတ်ကုသခဲ့ရတာပါ။ သူ့ရှေ့မှာပဲ သေဆုံးသွားခဲ့ရသူကိုမြင်တွေ့ခဲ့ရပြီး အဲဒီလူရဲ့မိသားစုနဲ့ ထပ်တူ ကြေကွဲဝမ်းနည်းရကြောင်း၊ ဆုတောင်းစကားပါးခဲ့ကြတဲ့ပရိသတ်တွေကို ကျေးဇူးတင်ရှိကြောင်း ပါဘလိုမာရီကတွစ်တာကနေ အသိပေးခဲ့ပါတယ်။
ဓားနဲ့တိုက်ခိုက်သူဟာ အသက် ၄၆နှစ်အရွယ်ရှိပြီး မီလန်မြို့ ဆန်ပါအိုလိုဆေးရုံရဲ့ စိတ်ရောဂါကုဌာနမှာ ဖမ်းဆီးပြီး ကုသမှုပြုလုပ်ထားတယ်လို့သိရပါတယ်။
အီတလီနိုင်ငံ မွန်ဇာမြို့ ဘောလုံးအသင်းရဲ့ ကစားသမား ပါဘလိုမာရီနဲ့ တခြားသူ ၄ ယောက်ဟာ မီလန်အပြင်ဘက်က အက်ဆာဂိုမြို့ ရှော့ပင်းမောလ်တခုမှာ ဓားထိုးခံခဲ့ရကြောင်း ANSA သတင်းဌာနက အောက်တိုဘာ ၂၇ ရက်မှာ ဖော်ပြခဲ့ပါတယ်။
ဘီဘီစီသတင်းမှာတော့ အသက် ၄၆ နှစ်အရွယ် သံသယရှိသူကို ဖမ်းဆီးထားပြီး စူပါမားကက်မှာ တိုက်ခိုက်ရတဲ့ အကြောင်းရင်းကို ရှင်းရှင်းလင်းလင်း မသိရကြောင်း ပြောပါတယ်။ ဘိုလီးဗီးယားနိုင်ငံသားတယောက် သေဆုံးသွားကြောင်း အီတလီရဲတပ်ဖွဲ့က ပြောပါတယ်။
မွန်ဇာအသင်း အမှုဆောင်အရာရှိချုပ် အက်ဒရီယာနို ဂါလီယာနီက “ပါဘလိုမာရီရဲ့ နောက်ကျောမှာ အတော်လေးနက်တဲ့ ဒဏ်ရာတခုရရှိခဲ့ပြီး ကံကောင်းလို့ အသက်အန္တရာယ်အတွက် အရေးကြီးတဲ့ အဆုတ်နဲ့ တခြားအင်္ဂါအစိတ်အပိုင်းတွေကို မထိမိခဲ့ပါဘူး။ သူ့အသက်အန္တရာယ် မစိုးရိမ်ရပါဘူး၊ သူ အမြန်ပြန်ကောင်းလာမှာပါ” လို့ စကိုင်း အီတလီ ရုပ်သံဌာနကို ပြောကြားခဲ့ပါတယ်။
အသက် ၂၉ နှစ်အရွယ် စပိန်ဗဟိုခံစစ်ကစားသမား မာရီဟာ အာဆင်နယ်ကနေ စီးရီးအေကလပ် မွန်ဇာမှာ အငှားနဲ့ သွားရောက်ကစားနေတာ ဖြစ်ပါတယ်။
အာဆင်နယ်ကလည်း ပါဘလိုရဲ့အေးဂျင့်နဲ့ အဆက်အသွယ်ရပြီး သူ ဆေးရုံတက်နေရကြောင်း၊ ဒဏ်ရာမပြင်းထန်ကြောင်း သိရတယ်လို့ ထုတ်ပြန်ထားပါတယ်။
