ပီရူးပြည်သူတွေဟာ ဇန်နဝါရီ ၁၇ ရက်က အဖြူရောင်တွေဝတ်ဆင်ပြီး နိုင်ငံမှာ ငြိမ်းချမ်းရေးကို တောင်းဆိုနေချိန်မှာ လီမာမြို့တော်မှာတော့ သမ္မတသစ် ဒီနာဘိုလူအာတာ နုတ်ထွက်ပေးရေး တောင်းဆိုနေတဲ့ ဆန္ဒပြပြည်သူတွေကို ရဲတပ်ဖွဲ့က လူစုခွဲဖို့ ကြိုးပမ်းခဲ့ပါတယ်။

အစိုးရဆန့်ကျင်ရေး ဆန္ဒပြပွဲအတွင်း ပီရူးအလံရဲ့ အရောင်တွေအတိုင်း ဝတ်ဆင်ထားကြတဲ့ ဆန္ဒပြသူတွေဟာ ရဲတွေဘက်ကို မျက်ရည်ယိုဗုံးတွေ ပြန်ပစ်နေကြပြီး အနည်းဆုံး လူတယောက် ဓာတ်ငွေ့ကြောင့် ထိခိုက်ခဲ့တာကို ရိုက်တာရုပ်သံသတင်းမှာ မြင်တွေ့ရပါတယ်။

“ကျနော်တို့ဟာ အာဏာရှင်အစိုးရအောက် ရောက်နေတယ်လို့ ခံစားနေရတာကြောင့် ကျနော်တို့နိုင်ငံကို ခုခံကာကွယ်ဖို့ လီမာကိုလာပြီး ပါဝင်ခဲ့တာ”လို့ လီမာမြို့တော်ကို လာရောက်ခဲ့တဲ့ ဆန္ဒပြသူတဦးကပြောပါတယ်။

ပီရူးနိုင်ငံရဲ့ နယ်မြေအသီးသီးက ဆန္ဒပြသူတွေလည်း သမ္မတသစ် နုတ်ထွက်ပေးရေးကို တောင်းဆိုဖို့ လီမာမြို့ကို အရောက်လာခဲ့ကြပြီး သမ္မတ ဒီနာကလည်း အစိုးရဆန့်ကျင်ရေး ဆန္ဒပြပွဲတွေမှာ ပါဝင်သူတွေဟာ အတင်းအကျပ် ဖိအားပေး ခြိမ်းခြောက်ခံရသူတွေဖြစ်ကြောင်း ကြေညာခဲ့ပါတယ်။

လက်ဝဲဝါဒီ သမ္မတဟောင်း ပီဒရိုကတ်စတီလိုဟာ ကွန်ဂရက်လွှတ်တော်ကို ဖျက်သိမ်းဖို့ တရားမဝင် ကြိုးစားခဲ့မှုနဲ့  ရာထူးကနေ ဖယ်ရှားခံရပြီး ယာယီဖမ်းဆီးထိန်းသိမ်းခံခဲ့ရတာပါ။

ဒီနောက် သူ့ကိုထောက်ခံသူတွေက လမ်းပေါ်ထွက်ဆန္ဒပြခဲ့ကြပြီး ဆန္ဒပြသူတွေဟာ သမ္မတသစ် ဒီနာ ရာထူးကနေဆင်းပေးဖို့၊ ရွေးကောက်ပွဲတွေ စောစောကျင်းပဖို့၊ ဖွဲ့စည်းပုံအခြေခံဥပဒေသစ်ရေးဆွဲဖို့နဲ့ လွှတ်တော်ဖျက်သိမ်းဖို့ စတာတွေ တောင်းဆိုနေကြပါတယ်။

ပီရူးနိုင်ငံ လီမာမြို့တော်မှာ နိုဝင်ဘာ ၂၀ ရက်က သမ္မတ ပတ်ထရို ကတ်စ်တီလို နုတ်ထွက်ပေးရေး တောင်းဆိုခဲ့ကြရင်း လမ်းပေါ်ကိုထွက်လာခဲ့တဲ့ ရာနဲ့ချီတဲ့ အစိုးရဆန့်ကျင်ရေး ဆန္ဒပြသူတွေနဲ့ ရဲတွေအကြား ရုန်းရင်းဆန်ခတ် ဖြစ်ပွားခဲ့ပါတယ်။

အနီရောင်နဲ့ အဖြူရောင် ဒေါင်လိုက်အဆင်းကြောင်း အလံတွေနဲ့ အစိုးရဆန့်ကျင်ရေး ကြွေးကြော်သံ ဆိုင်းဘုတ်တွေ ကိုင်ဆောင်ကာ ဆန္ဒပြသူတွေဟာ ပီရူးမြို့တော်ရှိ အတိုက်အခံတွေ ကြီးစိုးတဲ့ ကွန်ဂရက်ဆီကို ချီတက်ခဲ့ကြတာပါ။

ရဲတွေဟာ ဒိုင်းကာတွေ၊ ဦးထုပ်တွေဆောင်းပြီး ဆန္ဒပြသူတွေကို မျက်ရည်ယိုဗုံးခွဲကာ လူစုခွဲခဲ့ကြပါတယ်။ ဒဏ်ရာရသူစာရင်းကိုတော့ အစီအရင်ခံတာမျိုး မရှိသေးပါဘူး။

ပြီးခဲ့တဲ့နှစ် ဇူလိုင်လက အာဏာရလာခဲ့တဲ့ သမ္မတ ပတ်ထရို ကတ်စ်တီလိုဟာ စွဲချက်တင်ခံဖို့ ကြိုးစားမှု နှစ် ကြိမ်ကို ကျော်လွှားနိုင်ခဲ့ပြီး အတိုက်အခံ လွှတ်တော်အမတ်တွေကလည်း ကွန်ဂရက်အတွင်းမှာ လိုအပ်တဲ့ထောက်ခံမဲ မရှိဘူးဆိုတာကို သိထားပေမဲ့ သမ္မတကို စွဲချက်တင်နိုင်မယ့် အမှုအသစ်အတွက် ထောက်ခံမှု ရှာဖွေနေပါတယ်။