စစ်ကောင်စီတပ်တွေနဲ့ ရင်ဆိုင်တိုက်ပွဲ ဆင်နွှဲတဲ့အခါ လက်နက်ခဲယမ်း ကွာဟမှုတွေ ရှိနေတာကြောင့် ပေါက်မြို့နယ်တောင်ပိုင်း ပြောက်ကျားတပ်ဖွဲ့ (SPGF) က တာဝေးပစ် လက်နက်ကြီးတမျိုးကို စမ်းသပ်ထုတ်လုပ် အောင်မြင်ခဲ့တယ်လို့ SPGF တပ်ဖွဲ့က ပြောပါတယ်။
ပြည်သူလူထု လှူဒါန်းထားတဲ့ SPGF ရဲ့ ရန်ပုံငွေနဲ့ စမ်းသပ်ထုတ်လုပ် အောင်မြင်ခဲ့တာ ဖြစ်ပြီး အကွာအဝေး တမိုင်ခွဲလောက်အထိ ပစ်ခတ်တိုက်ခိုက်နိုင်သလို ကုန်ကျစရိတ်အနေနဲ့ ကျပ် ၁၅၀,၀၀၀ လောက် ရှိတယ်လို့ SPDF ရဲ့ လက်နက်ကြီးပိုင်းဆိုင်ရာ တာဝန်ခံ ဗိုလ်လပြည့်က ဒီဗွီဘီကို ပြောပါတယ်။
အဲဒီ တာဝေးပစ် လက်နက်ဟာ ၆၀ မမ အမျိုးအစားဖြစ်ပြီး ပြောင်းဖိုးကုန်ကျငွေ ကျပ် ၈၅,၀၀၀ ဝန်းကျင်ရှိပြီး ယမ်းနဲ့ တခြားပစ္စည်းတွေနဲ့ဆိုရင် ကျပ် ၁ သိန်းခွဲလောက် ကုန်ကျတယ်လို့ ဆိုပါတယ်။
ပေါက်မြို့နယ်တောင်ပိုင်းမှာ စစ်ကောင်စီတပ်တွေနဲ့ တိုက်ပွဲဖြစ်တဲ့အခါ တတောင့်ထိုးတွေ၊ ရှော့ဂန်းတွေကိုသာ အသုံးပြုတိုက်ခိုက်နေရတာဖြစ်လို့ တာဝေးပစ်လက်နက်ကို စမ်းသပ်ထုတ်လုပ်တာဖြစ်သလို မိဘပြည်သူတွေအနေနဲ့လည်း မိမိတို့ တတ်နိုင်သလောက် ပါဝင်လှူဒါန်းပေးကြဖို့ အကူအညီတောင်းခံချင်တယ်လို့ ပြောပါတယ်။
လက်နက်ကြီးတွေ၊ မိုင်းတွေ စမ်းသပ်ထုတ်လုပ်တဲ့ နေရာမှာလည်း အန္တရာယ်များကာ မတော်တဆ ပေါက်ကွဲမှုတွေ မကြာခဏဖြစ်ပွားပြီး နိုင်ငံတဝန်းက ပြည်သူ့ကာကွယ်ရေးတပ်ဖွဲ့ဝင်တွေ တိုင်းပြည်အတွက် အသက်ပေးလိုက်ရသူတွေနဲ့ ထိခိုက်ဒဏ်ရာရရှိသူတွေ အများအပြား ရှိနေတယ်လို့ ဆိုပါတယ်။
ပေါက်မြို့နယ်တောင်ပိုင်းကို စစ်ကောင်စီတပ်တွေက ဆက်တိုက်ထိုးစစ်ဆင်နေလို PDF တွေနဲ့ မကြာခဏ တိုက်ပွဲဖြစ်ပွားကာ ဧပြီ ၇ ရက်ကစလို့ ကျေးရွာတွေကို မီးရှို့ဖျက်ဆီးလို့ ကျေးရွာ ၂၀ လောက်က ပြည်သူ ၂၀,၀၀၀ နီးပါးလောက်ဟာ ဘေးလွတ်ရာ တောတွေထဲကို ထွက်ပြေး တိမ်းရှောင်နေကြရတယ်လို့ သိရပါတယ်။
မကွေးတိုင်းဒေသကြီး ပေါက်မြို့နယ်တောင်ပိုင်းက ကျေးရွာ ၂ ရွာကို မတ် ၂ ရက်နေ့ ညပိုင်းနဲ့ ဒီကနေ့ မနက်ပိုင်းတွေမှာ စစ်ကောင်စီတပ်တွေ ဝင်ရောက်ပြီး မီးရှို့ဖျက်ဆီးခဲ့ကြတယ်လို့ ဒေသခံတွေက ပြောပါတယ်။
ပေါက်မြို့နယ်တောင်ပိုင်း လယ်ယာကျေးရွာကို မနေ့မနက် ၉ နာရီကျော်လောက်က စစ်ကြောင်းထိုးလာတဲ့ စစ်ကောင်စီတပ်တွေနဲ့ ပျူစောထီး အင်အား ၁၅၀ လောက်ကို ဒေသခံ ကာကွယ်ရေးတပ်ဖွဲ့တဖွဲ့က ပစ်ခတ်ခဲ့တာကြောင့် ည ၈ နာရီလောက်မှာ အဲဒီစစ်ကောင်စီတပ်တွေနဲ့ ပျူစောထီးတွေက ရွာကို မီးရှို့ဖျက်ဆီးခဲ့ကြတာလို့ ဒေသခံတယောက်က ဒီဗွီဘီကို ပြောပါတယ်။
"နှစ်ဖက် တိုက်ပွဲဖြစ်တာတော့ မရှိဘူးဗျ။ သေနတ်သံကြားလို့ မီးရှို့ဖျက်ဆီးသွားကြတာ။ သေနတ်ကတော့ ဘယ်အဖွဲ့အစည်းက ပစ်ခတ်တယ်ဆိုတာ မသိရသေးဘူး။ လယ်ယာရွာမှာ အိမ်ခြေ ၂၀၀ ကျော်လောက်ရှိတဲ့အနက် နေအိမ် ၁၀၀ ကျော်လောက် မီးလောင်ဆုံးရှုံးခဲ့တယ်။ ဒါ့အပြင် လက်ပံလှကျေးရွာကိုလည်း ဒီကနေ့မနက်ပိုင်းမှာ စစ်ကောင်စီတပ်တွေနဲ့ ပျူစောထီးတွေ ပူးပေါင်းပြီး မီးရှို့ဖျက်ဆီးခဲ့ကြတယ်ဗျ။ မီးတွေကတော့ လောင်နေတုန်းပဲ။ ဘယ်နှအိမ်လောင်တယ် ဆိုတာကိုတော့ အတည်မပြုနိုင်သေးဘူး။ စစ်ကောင်စီတပ်တွေက အဲဒီရွာကို မီးရှို့ပြီး ဝန်ခြုံးရွာဘက်ကို ထွက်သွားကြတယ်။"
စစ်ကောင်စီတပ်တွေ ဝင်ရောက်မွှေနှောက်ပြီး မီးရှို့ဖျက်ဆီးခံရတဲ့ ကျေးရွာ ၂ ရွာက ဒေသခံပြည်သူ ၁,၀၀၀ နီးပါးလောက်ဟာ ဘေးလွတ်ရာ ထွက်ပြေးတိမ်းရှောင်နေကြရတယ်လို့ ဆိုပါတယ်။
စစ်ကောင်စီတပ်တွေဟာ ဝန်ခြုံးရွာမှာ ပြီးခဲ့တဲ့ ၂ ရက်လောက်က ကား ၃ စီးနဲ့ အင်အားထပ်တိုးကာ ဝန်ခြုံးရွာအရှေ့ဘက်နဲ့ ရွာထဲမှာ တပ်စွဲထားပြီး ကင်းပုန်းတွေလည်း ချထားတယ်လို့ ပြောပါတယ်။
ဝန်ခြုံးရွာ အနောက်ဘက်က တောင်ကုန်းပေါ်မှာ ပြီးခဲ့တဲ့ ဖေဖော်ဝါရီလ ၂၈ ရက် နေ့လယ်ပိုင်းက စစ်ကောင်စီတပ်တွေနဲ့ ပျူစောထီးအဖွဲ့တွေကို ဒေသခံ ပြည်သူ့ကာကွယ်ရေးအဖွဲ့တွေဖြစ်တဲ့ SPGF နဲ့ GZ အဖွဲ့ပေါင်းပြီး မိုင်းခွဲတိုက်ခိုက်ခဲ့လို့ ၂ နာရီကျော်ကြာ တိုက်ပွဲအပြင်းအထန်ဖြစ်ခဲ့ပြီး စစ်ကောင်စီဘက်က ၃ ယောက်သေဆုံးကာ အများအပြား ဒဏ်ရာရရှိခဲ့ပါတယ်။
