ပြင်သစ်အသင်းနည်းပြ ဒေးရွှန့်ဟာ အသင်းခေါင်းဆောင်သစ်ရာထူး ခန့်အပ်ရာမှာ ဂရစ်ဇ်မန်းကို ကျော်ပြီး အမ်ဘာပေကို တာဝန်ပေးခဲ့ပါတယ်။
အသက် ၂၄ နှစ်ပဲရှိသေးတဲ့ တိုက်စစ်မှူး အမ်ဘာပေဟာ ပြီးခဲ့တဲ့ ၂၀၂၂ ကမ္ဘာ့ဖလားမှာ ဂိုးအများဆုံးကစားသမားဆု ရခဲ့ပြီး ပြင်သစ်နဲ့ စုစုပေါင်း ၆၆ ပွဲမှာ ၃၆ ဂိုး သွင်းယူထားတာပါ။
အသင်းခေါင်းဆောင်တာဝန်ယူခဲ့တဲ့ ဂိုးသမား ဟူဂိုလိုရစ်က လက်ရွေးစင်ကနေ အနားယူသွားခဲ့တာကြောင့် အမ်ဘာပေကို အသင်းခေါင်းဆောင်သစ် ခန့်အပ်ခဲ့တာပါ။
အသက် ၃၂ နှစ်ရှိပြီး ပြင်သစ်အတွက် ပွဲပေါင်း ၁၁၇ ပွဲကစားပြီး ၄၂ ဂိုးသွင်းထားတဲ့ ဂရစ်ဇ်မန်းကိုတော့ ဒုတိယအသင်းခေါင်းဆောင်တာဝန် ပေးခဲ့ပါတယ်။
အဲဒီကိစ္စအပေါ် ဂရစ်ဇ်မန်းဘက်က ဝမ်းနည်းစိတ်ပျက်ခဲ့ရတာကြောင့် ပြင်သစ်အတွက် ဆက်ကစားပေးဖို့ မရေမရာဖြစ်လာခဲ့ကြောင်း L’Equipe သတင်းက ဖော်ပြသွားခဲ့ပါတယ်။
နည်းပြ ဒေးရွှန့်ကတော့ အမ်ဘာပေဟာ အသင်းခေါင်းဆောင်တဦးမှာရှိရမယ့် ရှိသင့်ရှိထိုက်တာတွေ အားလုံးရှိကြောင်း ပြောထားပါတယ်။
တိုက်စစ်မှူး ဘင်ဇီမာဟာ သူ့ရဲ့မွေးနေ့နဲ့ အချိန်ကိုက် ပြင်သစ်အသင်းကနေအနားယူကြောင်း တရားဝင်ကြေညာလိုက်ပါတယ်။
ဘင်ဇီမာဟာ ဒီဇင်ဘာ ၁၉ ရက်က အသက် ၃၅ နှစ်ပြည့်မြောက်ခဲ့တာဖြစ်ပြီး အဲဒီနေ့မှာပဲ နိုင်ငံအသင်းကနေ အနားယူကြောင်းကြေညာခဲ့တာပါ။
“ဒီနေ့ ကျနော် ရောက်ရှိနေတဲ့နေရာအတွက် အားထုတ်မှုတွေကော၊ အမှားတွေပါ လုပ်ဆောင်ခဲ့ပြီး အဲဒီအတွက် ဂုဏ်ယူမိပါတယ်။ ကျနော်ရဲ့ဇာတ်လမ်းကို ရေးပြီးပြီဖြစ်ပြီး ကျနော်နဲ့ ပြင်သစ်အသင်းရဲ့ ပတ်သက်မှုဟာလည်း အဆုံးသတ်သွားပါပြီ” လို့ ဘင်ဇီမာက ရေးသားခဲ့ပါတယ်။
ဘင်ဇီမာ ဟာ ဒဏ်ရာပြဿနာကြောင့် ကာတာကမ္ဘာ့ဖလားကိုလွဲချော်ခဲ့ပြီး ပြင်သစ်ချန်ပီယံဖြစ်ခဲ့တဲ့ ၂၀၁၈ ပြိုင်ပွဲမှာလည်း ပါဝင်ခွင့်မရခဲ့သူပါ။
အသက်မပြည့်သူအမျိုးသမီးနဲ့ပတ်သက်ပြီး စုံစမ်းခြင်းခံခဲ့ရ တာကြောင့် ပြင်သစ်အသင်းမှာ ကစားခွင့်ပိတ်ပင်ခံခဲ့ရပါသေးတယ်။
ဒါပေမဲ့ ဒီဘက်နှစ်တွေ အတွင်းမှာပြန်လည်ရွေးချယ်ခံခဲ့ရပြီး ပြင်သစ်နဲ့ စုစုပေါင်း ၉၇ ပွဲမှာ ၃၇ ဂိုးသွင်းယူနိုင်ခဲ့ပါတယ်။
