ကမ္ဘောဒီးယားနိုင်ငံမှာ ပထမဆုံးအကြိမ် အိမ်ရှင်အဖြစ် လက်ခံကျင်းပတဲ့ ၃၂ ကြိမ်မြောက် အရှေ့တောင်အာရှ ဆီးဂိမ်းစ်ပြိုင်ပွဲရဲ့ ဖွင့်ပွဲအခမ်းအနားကို မေလ ၅ ရက်နေ့  မြို့တော်ဖနွမ်းပင်ရှိ မိုရိုဒေါ့ခ်တေချို အမျိုးသားအားကစားကွင်းကြီးမှာ ကျင်းပဖို့ ပြင်ဆင်နေပါတယ်။ 

ဒီအရှေ့တောင်အာရှနိုင်ငံမှာ ဆယ်စုနှစ် ၃ ခုကြာ ပြည်တွင်းစစ်နဲ့အတူ ဆယ်စုနှစ် ၂ ခုကြာ စစ်ပြီးကာလ ပြန်လည်ထူထောင်ရေးလုပ်ငန်းစဉ်တွေကြောင့် ၂ နှစ် တကြိမ် ကျင်းပတဲ့ ဒီပြိုင်ပွဲကြီးကို တခါမှ လက်ခံကျင်းပနိုင်ခဲ့ခြင်း မရှိပါဘူး။ 

ဒေသတွင်းအားကစားသမားတွေဟာ ဆီးဂိမ်းပြိုင်ပွဲကြီးရဲ့ အားကစားနည်း ၃၇ မျိုးမှာ ဝင်ရောက် ယှဉ်ပြိုင်ရမှာဖြစ်ပြီး ကမ္ဘောဒီယားနိုင်ငံရဲ့ ရိုးရာအားကစားနည်းတွေဖြစ်ကြတဲ့ ခမာစစ်တုရင် ပြိုင်ပွဲအပါအဝင် ဘိုကတ်တောနဲ့ ခွန်ခမာလိုမျိုး ကိုယ်ခံပညာအားကစားနည်း ၂ ခုကိုပါ ထည့်သွင်း ကျင်းပသွားမှာ ဖြစ်ပါတယ်။ 

ဆီးဂိမ်းပြိုင်ပွဲတွေဟာ ရိုးရာအားကစားနည်းတွေကို နိုင်ငံရပ်ခြားပရိသတ်တွေဆီ ထုတ်လွှင့် ပြသနိုင်မယ့် အခွင့်အရေးတစ်ရပ် ဖြစ်တယ်လို့ ပွဲစီစဉ်သူတွေက ပြောကြားခဲ့ကြောင်း ပြည်တွင်း သတင်းဖော်ပြချက်တွေအရ သိရပါတယ်။ 

ကမ္ဘောဒီးယားဝန်ကြီးချုပ် ဟွန်ဆန်ကလည်း ဆီးဂိမ်းပြိုင်ပွဲဆိုင်ရာ ဝင်ခွင့်လက်မှတ်တွေဟာ နိုင်ငံသားအားလုံးအတွက် အခမဲ့ဖြစ်တယ်ဆိုပြီး ပြီးခဲ့တဲ့လက ကြေညာထားပါတယ်။ 

ဒီလို အားကစားနည်းမျိုးစုံပါဝင်တဲ့ ၃၂ ကြိမ်မြောက် ဒေသတွင်း ဆီးဂိမ်းပြိုင်ပွဲကြီးကို  မေ ၅ ရက်က ၁၇ ရက်အထိ ကျင်းပသွားမှာဖြစ်ပြီး ဘောလုံးပွဲစဉ်တွေကတော့ ပြီးခဲ့တဲ့လကုန်ပိုင်းကတည်းက စတင်ကျင်းပနေပြီဖြစ်ပါတယ်။ 

တရုတ်ဝန်ကြီးချုပ် လီကီချန်းဟာ ကမ္ဘောဒီးယားဝန်ကြီးချုပ် ဟွန်ဆန်နဲ့ အပြန်အလှန် ပူးပေါင်းဆောင်ရွက်မှုတိုးမြှင့်ဖို့  နိုဝင်ဘာ ၉ ရက်က ဖနွမ်းပင်မြို့တော်မှာ တွေ့ဆုံဆွေးနွေးခဲ့ပါတယ်။

“တရုတ်နဲ့ ကမ္ဘောဒီးယားဟာ အစဉ်အလာ ချစ်ကြည်ရင်းနှီးမှု နက်ရှိုင်းပြီး နိုင်ငံရေးအရ အပြန်အလှန်ယုံကြည်မှု အဆင့်အတန်း မြင့်မားတယ်။ နယ်ပယ်အသီးသီးမှာ အသီးအပွင့်တွေ ဖြစ်ထွန်းပြီး လက်တွေ့ကျတဲ့ ပူးပေါင်းဆောင်ရွက်မှုကို ခံစားရတယ်” လို့ လီက ပြောပါတယ်။

တရုတ်နိုင်ငံဟာ ကောင်းမွန်တဲ့ ကမ္ဘောဒီးယား လယ်ယာထွက်ကုန်တွေ တင်သွင်းမှုကို တိုးမြှင့်ပြီး စက်မှုထွန်းကားရေး အရှိန်အဟုန်နဲ့ ကမ္ဘောဒီးယားကို ပံ့ပိုးကူညီမယ်လို့လည်း လီက ပြောပါတယ်။

နှစ်နိုင်ငံဟာ သိပ္ပံနဲ့နည်းပညာ၊ ပညာရေးနဲ့ ယဉ်ကျေးမှုဆိုင်ရာ ပူးပေါင်းဆောင်ရွက်မှုကို နက်နက်ရှိုင်းရှိုင်း လုပ်ဆောင်ရင်း တိုက်ရိုက်လေကြောင်းခရီးစဉ်တွေ တိုးမြှင့်ဆောင်ရွက်သွားမယ်လို့လည်း လီက ပြောပါတယ်။

ဟွန်ဆန်က ကမ္ဘောဒီးယားနဲ့ တရုတ်တို့ဟာ ခိုင်မာတဲ့မိတ်ဆွေတွေဖြစ်ကြပြီး နှစ်နိုင်ငံ ချစ်ကြည်ရင်းနှီးမှုကို ကမ္ဘောဒီးယားပြည်သူတွေက ထောက်ခံအားပေးတယ်လို့ ပြောပါတယ်။

“ကမ္ဘောဒီးယားဟာ တရုတ် တနိုင်ငံတည်းမူဝါဒကို အခိုင်အမာထောက်ခံပြီး မျှဝေထားတဲ့ အနာဂတ်နဲ့ ကမ္ဘောဒီးယား-တရုတ် အသိုက်အဝန်းကို တည်ဆောက်ရေး ထောက်ခံကြောင်း သတိပြုမိတယ်၊ နှစ်နိုင်ငံဆက်ဆံရေးနဲ့ ပူးပေါင်းဆောင်ရွက်မှုတွေ နက်ရှိုင်းလာစေဖို့ တရုတ်နဲ့ ပူးပေါင်းဆောင်ရွက်သွားမယ်” လို့ ဟွန်ဆန်က ပြောပါတယ်။

နှစ်ဖက် အကျိုးစီးပွားဆိုင်ရာ ကိစ္စရပ်တွေကိုလည်း အမြင်ချင်း နက်နက်ရှိုင်းရှိုင်း ဖလှယ် ဆွေးနွေးခဲ့ကြပါတယ်။

တွေ့ဆုံပွဲအပြီးမှာ လီနဲ့ ဟွန်ဆန်တို့ဟာ နှစ်နိုင်ငံ ပူးပေါင်းဆောင်ရွက်ရေး စာရွက်စာတမ်း ၁၀ ခုကျော်ကို လက်မှတ်ရေးထိုးခဲ့ကြပြီး ဖနွမ်းပင်-ဆီဟာနုဗီးလ် အမြန်လမ်းကို ဖွင့်လှစ်ခဲ့ပါတယ်။

မနေ့ မွန်းလွဲပိုင်းမှာ တရုတ်ဝန်ကြီးချုပ်ဟာ ကမ္ဘောဒီးယားနိုင်ငံ လွတ်လပ်ရေးကျောက်တိုင်နဲ့ ခမည်းတော် နိုရိုဒမ် စီဟာနု ရုပ်တုတို့မှာ လွမ်းသူ့ပန်းခွေ ချခဲ့ပါတယ်။