ကမ္ဘာ့ဖလားချန်ပီယံ အာဂျင်တီးနားအသင်းဟာ ဖီဖာကမ္ဘာ့အဆင့်သတ်မှတ်ချက်ရဲ့ ထိပ်ဆုံးနေရာကို ၆ နှစ်အကြာ ဧပြီ ၆ ရက်မှာ ဘရာဇီးလ်အသင်းဆီကနေ လွှဲပြောင်းရယူနိုင်ခဲ့ပါတယ်။
မနှစ်က ကာတာနိုင်ငံမှာ ကျင်းပခဲ့တဲ့ ကမ္ဘာ့ဖလားနောက်ဆုံးဗိုလ်လုပွဲမှာ ပြင်သစ်အသင်းကို အာဂျင်တီးနားအသင်းက အနိုင်ယူခဲ့တာဖြစ်ပြီး နှစ်ပေါင်း ၃၀ ကျော်အကြာမှာ ကမ္ဘာ့ဖလား အောင်မြင်မှု ရရှိခဲ့ပါတယ်။
နည်းပြ လီယွန်နယ်စကယ်လိုနီရဲ့ အာဂျင်တီးနားအသင်းဟာ နောက်ဆုံးခြေစမ်းပွဲစဉ်တွေမှာလည်း ပနားမားအသင်းကို ၂ ဂိုး ဂိုးမရှိ၊ ကူရာဆောင်အသင်းကို ၇ ဂိုးပြတ် ရလဒ်နဲ့ အနိုင်ယူခဲ့ပြီးနောက် ကမ္ဘာ့အဆင့် ၁ နေရာကို ပြန်သိမ်းပိုက်နိုင်ခဲ့ပါတယ်။
ပြင်သစ်အသင်းအနေနဲ့လည်း ယူရို ၂၀၂၄ ခြေစစ်ပွဲစဉ်တွေအဖြစ် နယ်သာလန်အသင်းကို ၄ ဂိုး ဂိုးမရှိ အပြင် အိုင်ယာလန်အသင်းကိုပါ ၁ ဂိုး ဂိုးမရှိ ရလဒ်တွေနဲ့ အနိုင်ရရှိခဲ့တာကြောင့် ကမ္ဘာ့အဆင့်ရပ်တည်ချက်မှာ ဒုတိယနေရာကို တက်လှမ်းလာနိုင်ခဲ့ပါတယ်။
ဘရာဇီးလ်အသင်းကတော့ မော်ရိုကိုအသင်းနဲ့ ခြေစမ်းပွဲစဉ်မှာ ၂ ဂိုး ၁ ဂိုး ရလဒ်နဲ့ ရှုံးနိမ့်ခဲ့တဲ့အတွက် ကမ္ဘာ့အဆင့် ရပ်တည်ချက်မှာ တတိယနေရာကို ကျဆင်းသွားပါတယ်။
ကမ္ဘာ့အဆင့်သတ်မှတ်ချက်အတွင်း ဘယ်လ်ဂျီယံအသင်းက အဆင့် ၄ နေရာမှာ အရင်အတိုင်း ဆက်ရှိနေပြီး အင်္ဂလန်အသင်းက အဆင့် ၅၊ နယ်သာလန်အသင်းက အဆင့် ၆၊ ခရိုအေးရှားအသင်းက အဆင့် ၇၊ အီတလီအသင်းက အဆင့် ၈၊ ပေါ်တူဂီအသင်းနဲ့ စပိန်အသင်းတို့က အဆင့် ၉ နဲ့ အဆင့် ၁၀ နေရာတွေမှာ အသီးသီး ရပ်တည်နေကြပါတယ်။
ဗဟိုအာဖရိကသမ္မတနိုင်ငံကတော့ နောက်ဆုံး ကမ္ဘာ့အဆင့်သတ်မှတ်ချက်အတွင်း အကြီးမားဆုံး တိုးတက်မှုရှိခဲ့ပြီး ၁၀ နေရာအထိ ကျော်လွှားကာ ကမ္ဘာ့အဆင့် ၁၂၂ နေရာမှာ ရပ်တည်နိုင်ခဲ့ပါတယ်။
အင်ဒိုနီးရှားနိုင်ငံကို အသက် ၂၀ နှစ်အောက် ကမ္ဘာ့ဖလားပြိုင်ပွဲ အိမ်ရှင်အဖြစ် လက်ခံကျင်းပခွင့်ကို ရုပ်သိမ်းလိုက်ကြောင်း ကမ္ဘာ့ဘောလုံးအဖွဲ့ချုပ် (ဖီဖာ) က မတ်လ ၂၉ ရက်မှာ ပြောပါတယ်။
ဟိန္ဒူအများစုရှိတဲ့ ဘာလီကျွန်းရဲ့ အုပ်ချုပ်ရေးမှူးက အစ္စရေးအသင်းကို ပြိုင်ပွဲမှာလက်ခံဖို့ ငြင်းဆိုခဲ့ပြီးနောက် မဲနှိုက်တာကို ဖျက်သိမ်းခဲ့ကြောင်း အင်ဒိုနီးရှားဘောလုံးအဖွဲ့ချုပ် (PSSI) က ပြောကြားပြီးနောက် မေ ၂၀ ရက်ကနေ ဇွန် ၁၁ ရက်အထိ ကျင်းပမယ့် ပြိုင်ပွဲမှာ အိမ်ရှင်နိုင်ငံအဖြစ်ကနေ အင်ဒိုနီးရှားကို ဖယ်ရှားဖို့ ဆုံးဖြတ်ခဲ့တာဖြစ်ပါတယ်။
“လက်ရှိအခြေအနေတွေကြောင့် ၂၀၂၃ ခုနှစ် ဖီဖာ ယူ-၂၀ ကမ္ဘာ့ဖလားပြိုင်ပွဲကို အိမ်ရှင်အဖြစ် လက်ခံကျင်းပမယ့် အင်ဒိုနီးရှားကို ဖယ်ရှားဖို့ ဖီဖာက ဆုံးဖြတ်ခဲ့ပါတယ်” လို့ ဖီဖာရဲ့ထုတ်ပြန်ချက်မှာ ဖော်ပြထားပါတယ်။
လက်ရှိမှာ ပြိုင်ပွဲကျင်းပမယ့်ရက်ကို မပြောင်းလဲဘဲ အိမ်ရှင်နိုင်ငံအသစ်ကို အမြန်ဆုံး ကြေညာပေးသွားမယ်လို့ ဆိုပါတယ်။
အင်ဒိုနီးရှားဘောလုံးအဖွဲ့ချုပ် (PSSI) အပေါ် အလားအလာရှိတဲ့ ပိတ်ဆို့အရေးယူမှုတွေကိုလည်း နောက်ပိုင်းအဆင့်မှာ ဆုံးဖြတ်သွားမှာဖြစ်ကြောင်း ဆိုပါတယ်။
အင်ဒိုနီးရှားသမ္မတ ဂျိုကိုဝီဒိုဒိုကတော့ ပါလက်စတိုင်းအတွက် အင်ဒိုနီးရှားရဲ့ ထောက်ခံမှုဟာ အမြဲတမ်း ခိုင်ခံ့မြဲမြံနေတာကြောင့် အစ္စရေးရဲ့ ပါဝင်မှုဟာ ပါလက်စတိုင်းနဲ့ပတ်သက်တဲ့ နိုင်ငံခြားရေးမူဝါဒ သဘောထား ညီညွတ်မှုနဲ့ လုံးဝမသက်ဆိုင်ကြောင်း အာမခံ ပြောကြားထားပါတယ်။
ယူ-၂၀ ကမ္ဘာ့ဖလားပြိုင်ပွဲနဲ့ ပတ်သက်ပြီးတော့ ဖီဖာက အဖွဲ့ဝင်တွေ လိုက်နာရမယ့် စည်းမျဉ်းတွေကို အင်ဒိုနီးရှားနိုင်ငံဆိုင်ရာ ပါလက်စတိုင်းသံအမတ်ကြီးရဲ့ ထုတ်ပြန်ချက်ကို သဘောတူညီကြောင်းနဲ့ ဒါကြောင့် အားကစားကို နိုင်ငံရေးနဲ့ မရောထွေးပါနဲ့လို့ သမ္မတ ဝီဒိုဒိုက ပြောဆိုခဲ့ပါတယ်။
