အစ္စရေးရဲတပ်ဖွဲ့ဟာ ဂျေရုဆလင်မြို့ အယ်လ်အက်ဆာ ဗလီဝင်းအတွင်း ဧပြီ ၅ ရက် မနက်အရုဏ်မတက်မီ ဝတ်ပြုသူ ဒါဇင်ပေါင်းများစွာကို တိုက်ခိုက်ခဲ့တယ်လို့ မျက်မြင်သက်သေတွေက ပြောပါတယ်။

အစ္စရေးရဲတပ်ဖွဲ့ကတော့ ရုန်းရင်းဆန်ခတ်မှုအပေါ် တုံ့ပြန်တာလို့ ပြန်ပြောပါတယ်။ ဒဏ်ရာရသူရှိတယ်လို့ ပါလက်စတိုင်း လခြမ်းနီအဖွဲ့က သတင်းပို့ခဲ့ပေမဲ့ လူဘယ်လောက် ထိခိုက်ဒဏ်ရာရခဲ့တယ်ဆိုတာ အသေးစိတ် မဖော်ပြထားပါဘူး။

အစ္စရေးတပ်ဖွဲ့ဝင်တွေဟာ ဗလီဝတ်ကျောင်းတော်ဆီ ဆရာဝန်တွေမရောက်အောင် တားဆီးထားခဲ့တယ်လို့ ထုတ်ပြန်ချက်ထဲမှာ ဖော်ပြထားပါတယ်။

“ကျမ ကိုရမ်ကျမ်းရွတ်ရင်း ထိုင်ခုံမှာထိုင်ပြီး ဝတ်ပြုနေတုန်း ရဲတွေက မျက်ရည်ယိုဗုံးတွေနဲ့ ပစ်ခဲ့လို့ တခုက ကျမရင်ဘတ်ကို ထိမှန်ခဲ့တယ်” လို့ ဗလီအပြင်မှာထိုင်ရင်း အသက်ရှူဖို့ ကြိုးစားနေတဲ့ သက်ကြီး အမျိုးသမီးတယောက်က ပြောပါတယ်။

မီးရှူးမီးပန်းတွေ၊ တုတ်တွေ၊ ကျောက်တုံးတွေ ကိုင်ဆောင်ရင်း မျက်နှာဖုံးစွပ် လှုံ့ဆော်သူတွေက သူတို့ကိုယ်သူတို့ ဗလီအတွင်း သော့ခတ်ပြီးတဲ့နောက် ဗလီဝင်းထဲဝင်ဖို့ အင်အားသုံးခဲ့ရကြောင်း၊ ရဲအရာရှိတဦး ခြေထောက်မှာ ဒဏ်ရာရခဲ့တယ်လို့ အစ္စရေးရဲတပ်ဖွဲ့က သတင်းထုတ်ပြန်ပါတယ်။

အစ္စရေးက သိမ်းပိုက်ထားတဲ့ အနောက်ဘက်ကမ်းနဲ့ ဂျေရုဆလင်တို့မှာ ပြီးခဲ့တဲ့နှစ်က အကြမ်းဖက်မှုတွေ မြင့်တက်လာခဲ့ပြီး မွတ်စလင်တို့ရဲ့ ရမ်ဇာန်လမြတ်ကလည်း ဂျူးဘာသာဝင်တွေရဲ့ ပသခါပွဲ၊ ခရစ်ယာန် အီစတာတို့နဲ့ပါ တိုက်ဆိုင်နေတာပါ။ ဒါကြောင့် အခုလထဲမှာ တင်းမာမှုတွေ တိုးလာမှာကို စိုးရိမ်နေကြပါတယ်။

Temple Mount လို့ ဂျူးတွေသိကြတဲ့ အယ်လ်အက်ဆာ ဗလီဝင်းအတွင်း ပွတ်တိုက်မှုတွေကြောင့် မကြာသေးမီနှစ်တွေအတွင်း အကြမ်းဖက်မှုတွေ အစပျိုးလာခဲ့ပါတယ်။

ပါလက်စတိုင်းအုပ်စုတွေကလည်း ဝတ်ပြုကိုးကွယ်သူတွေအပေါ် အစ္စရေးရဲ့ တိုက်ခိုက်မှုကို ရာဇဝတ်မှုတခုအဖြစ် ရှုတ်ချခဲ့ပါတယ်။

ပါကစ္စတန်နိုင်ငံ အနောက်မြောက်ပိုင်းပြည်နယ် မြို့တော် ပက်ရှ်ဝါရှိ ဗလီတခုအတွင်း အသေခံ ဗုံးခွဲတိုက်ခိုက်မှုကြောင့် ရဲတပ်ဖွဲ့ဝင်အများစု အပါအဝင် သေဆုံးသူဦးရေဟာ အယောက် ၉၀ အထိ မြင့်တက်လာပါတယ်။

ဇန်နဝါရီ ၃၀ ရက်မှာ ပေါက်ကွဲမှုဖြစ်ပြီးနောက် ဗလီရဲ့ အပျက်အစီးတွေအောက်မှာ ပိတ်မိနေသူတွေကို ကယ်ဆယ်ရေးလုပ်ငန်းတွေ ဇန်နဝါရီ ၃၁ ရက်မှာ ဆက်လုပ်ခဲ့ပါတယ်။ အသက်ရှင်ကျန်ရစ်သူတွေကို ရှာတွေ့ဖို့ မျှော်လင့်ချက် လျော့နည်းလာပြီး လူသေအလောင်းတွေကို ဆွဲထုတ်နေရကြောင်း ကယ်ဆယ်ရေးသမားတွေက ပြောပါတယ်။

ဒဏ်ရာရသူတွေထဲက တချို့ဟာ နောက်ဆုံးမှာ အသက်ဆုံးရှုံးသွားခဲ့ပြီး ပေါက်ကွဲမှုဖြစ်တဲ့ နေရာကနေ ပြန်ယူခဲ့တဲ့ ရုပ်အလောင်းတွေကိုပါ ထည့်တွက်ခဲ့တာပါ။

ပေါက်ကွဲမှုဖြစ်ပွားပြီးနောက် ရုပ်အလောင်းတွေနဲ့ ဒဏ်ရာရသူအများစုကို ပက်ရှ်ဝါရှိ Lady Reading ဆေးရုံကို ပို့ဆောင်ခဲ့ပါတယ်။

ပေါက်ကွဲမှုဖြစ်ပွားပြီးနောက် ပြည်နယ်ကျန်းမာရေးဌာနက ပက်ရှ်ဝ်ရှိ ဆေးရုံတွေမှာ အရေးပေါ်အခြေအနေ ကြေညာခဲ့ပြီး ပြည်သူတွေကို သွေးလှူဒါန်းပေးဖို့ မေတ္တာရပ်ခံခဲ့ပါတယ်။

အလွှာပေါင်းစုံက ပြည်သူတွေက ဒီတိုက်ခိုက်မှုကို ရှုတ်ချခဲ့ကြပြီး အကြမ်းဖက်ဝါဒရဲ့ ခြိမ်းခြောက်မှုကို တိုက်ဖျက်ဖို့အတွက် ရဲတပ်ဖွဲ့ဝင်တွေကို ခေတ်မီလက်နက်တွေ တပ်ဆင်ပေးတာ အပါအဝင် အကြမ်းဖက်သမားတွေကို ပြတ်ပြတ်သားသား အရေးယူဖို့ အစိုးရကို တိုက်တွန်းကြပါတယ်။

ပါကစ္စတန်ဝန်ကြီးချုပ် ရှာဘတ်စ် ရှရစ်ဖှ်ဟာ ဒဏ်ရာရရှိသူတွေကို သွားရောက်ကြည့်ရှုခဲ့ပြီး ပက်ရှ်ဝါက အဆင့်မြင့် လုံခြုံရေးအစည်းအဝေးမှာ နိုင်ငံတွင်း လက်ရှိလုံခြုံရေးအခြေအနေကို လေ့လာသုံးသပ်ခဲ့ပါတယ်။

အကြမ်းဖက် ဗုံးခွဲမှုအပြီး နိုင်ငံတဝန်း လုံခြုံရေး အထူးသတိပေးချက် ထုတ်ပြန်ထားပါတယ်။

ဒေသတွင်း မီဒီယာတွေရဲ့ ဖော်ပြချက်အရ တေရစ်ခ်-အီ- တာလီဘန်-ပါကစ္စတန် (TTP) က ဒီတိုက်ခိုက်မှုအတွက် တာဝန်ရှိကြောင်း အခိုင်အမာ ဆိုထားပါတယ်။

အသက် ၂၅ နှစ်အရွယ် ဗုံးခွဲသမားဟာ ဖောက်ခွဲရေးပစ္စည်း ၇ ကီလိုဂရမ်နဲ့ တိုက်ခိုက်မှုကို လုပ်ဆောင်ခဲ့တယ်လို့ ဆိုပါတယ်။