လက်ကျန်ပွဲစဉ်တိုင်းက ဗိုလ်လုပွဲတပွဲလို ဖြစ်သွားပြီလို့ မန်စီးတီးတိုက်စစ်မှူး အယ်လ်ဗာရက်ဇ်က ပြောပါတယ်။
အယ်လ်ဗာရက်ဇ်ဟာ ဒဏ်ရာကြောင့် ဒီဘရိုင်းမပါဝင်ခဲ့တဲ့ ကွင်းလယ်တိုက်စစ်နေရာမှာ ခြေစွမ်း ပြသနိုင်ခဲ့ပြီး အနိုင်ဂိုး ၁ ဂိုး သွင်းယူနိုင်ခဲ့ပါတယ်။
ဖူဟမ်ကို အနိုင်ရတဲ့ပွဲစဉ်အပြီးမှာတော့ အာဆင်နယ်ကို ကျော်ဖြတ်ပြီး အမှတ်ပေးဇယားထိပ်ကို ရောက်လာတဲ့ မန်စီးတီးအတွက် လက်ကျန်ပွဲစဉ်တိုင်းက ဗိုလ်လုပွဲ ဖြစ်သွားပြီလို့ ပြောခဲ့တာပါ။
“နံပါတ် ၁ နေရာဆိုတာ ရာသီအစကတည်းက ကျနော်တို့ လိုချင်တဲ့နေရာပေါ့။ ကစားသမား တိုင်းက အကောင်းဆုံးလုပ်ဆောင်နိုင်ခဲ့လို့ နံပါတ် ၁ နေရာကို ပြန်လာနိုင်ခဲ့တာဖြစ်ပြီး နံပါတ် ၁ နေရာကို ဆက်ပြီး ထိန်းသိမ်းသွားဖို့လိုပါတယ်”လို့ အယ်လ်ဗာရက်ဇ်က ပြောပါတယ်။
မန်စီးတီးဟာ လက်ကျန်တပွဲ မကစားရသေးပေမဲ့ ဒုတိယနေရာက အာဆင်နယ်ကို ၁ မှတ် အသာ နဲ့ ဦးဆောင်နေပါတယ်။
၂၀၂၂ ကာတာကမ္ဘာ့ဖလားပြိုင်ပွဲ ရဲ့ နောက်ဆုံးဗိုလ်လုပွဲမှာ အာဂျင်တီးနားအသင်းက လက်ရှိချန်ပီယံ ပြင်သစ်အသင်းကို ပင်နယ်တီအဆုံးအဖြတ်နဲ့ အနိုင်ရပြီး ကမ္ဘာ့ဖလားကို ၃ ကြိမ်မြောက်ဗိုလ်စွဲသွားပါတယ်။
ဒီပွဲမှာ အာဂျင်တီးနားအသင်းက ဘောလုံးပိုင်ဆိုင်မှုရော ဂိုးပေါက်ကန်သွင်းခွင့်တွေပါ ပိုရခဲ့ပြီး အဖွင့်ဂိုးကိုတော့ ပွဲချိန် ၂၃ မိနစ်မှာ မက်ဆီက ပင်နယ်တီကနေတဆင့် သွင်းယူခဲ့တာပါ။ အာဂျင်တီးနားအတွက် ဒုတိယ ဂိုးကိုတော့ ပွဲချိန် ၃၆ မိနစ်မှာ မက်အယ်လစ်စတာရဲ့ ပေးပို့မှုကနေ ဒီမာရီယာက သွင်းပေးခဲ့ပြီး ပထမပိုင်းမှာပဲ အာဂျင်တီးနားအသင်းက ၂ ဂိုး ဂိုးမရှိနဲ့ အနိုင်ရနေတာပါ။
ဒုတိယပိုင်း ပွဲချိန် မိနစ် ၈ဝ မှာတော့ ပြင်သစ်အသင်းအတွက် ပထမ ချေပဂိုးကို အန်ဘာပေးက ပင်နယ်တီကနေတဆင့် သွင်းယူပေးခဲ့ပြီး နောက်တမိနစ်အကြာမှာပဲ သူရမ်ရဲ့ ဘောလုံး ပေးပို့မှုကနေတဆင့် အန်ဘာပေကပဲ နောက်ထပ် ချေပဂိုး သွင်းယူပေးခဲ့လို့ ဒုတိယပိုင်းအပြီးမှာ တဖက် ၂ ဂိုးစီသရေကျနေခဲ့ပါတယ်။
အချိန်ပိုထပ်ကန်ရာမှာတော့ ပွဲချိန် ၁၀၈ မိနစ်မှာ မက်ဆီက အာဂျင်တီးနားအသင်းအတွက် တတိယ အနိုင်ဂိုးသွင်းယူပေးခဲ့သလို ပွဲချိန် ၁၁၈ မိနစ်မှာ ပြင်သစ်အတွက် ချေပဂိုးကို အန်ဘာပေက သွင်းယူခဲ့လို့ ၃ ဂိုးစီသရေကျနေခဲ့ပါတယ်။
ပင်နယ်တီ အဆုံးအဖြတ်ကန်ရာမှာတော့ အာဂျင်တီးနားအသင်းက ၄ ဂိုး ၂ ဂိုးနဲ့ အနိုင်ရပြီး ဗိုလ်စွဲသွားပါတယ်။
အာဂျင်တီးနားက ၁၉၇၈ ခုနှစ်နဲ့ ၁၉၈၆ ခုနှစ်တွေမှာ နှစ်ကြိမ် ဗိုလ်စွဲခဲ့ဖူးပြီး အခုတကြိမ် တတိယအကြိမ်မြောက် ဗိုလ်စွဲတာဖြစ်ပါတယ်။
အာဂျင်တီးနား အသင်းဟာ အုပ်စုအဖွင့်ပွဲစဉ်မှာ ဆော်ဒီအာရေဗျကို ရှုံးနိမ့်ခဲ့ပေမဲ့ နောက်ပွဲတွေမှာ တောက်လျှောက်အနိုင်ရပြီး ကွာတားဖိုင်နယ်မှာ နယ်သာလန်၊ ဆီမီးဖိုင်နယ်မှာ ခရိုအေးရှားကို ကျော်ဖြတ်ပြီး ဗိုလ်လုပွဲ တက်လာခဲ့တာဖြစ်ပါတယ်။
ပြင်သစ်အသင်းကလည်း အုပ်စုဗိုလ်အဖြစ်နဲ့ တက်လာပြီး ကွာတားဖိုင်နယ်မှာ အင်္ဂလန်၊ ဆီမီးဖိုင်နယ်မှာ မော်ရိုကို အသင်းတွေကို ကျော်ဖြတ်ပြီး ဗိုလ်လုပွဲတက်လာတာဖြစ်ပါတယ်။
၁၉၉၈ ခုနှစ်နဲ့ ၂၀၁၈ ခုနှစ်တွေမှာ နှစ်ကြိမ် ဗိုလ်စွဲထားတဲ့ ပြင်သစ်အသင်းကတော့ ကမ္ဘာ့ဖလားထပ်ယူဖို့ ရည်မှန်းချက် မအောင်မြင်ဘဲ ဒုတိယဆုနဲ့သာ ကျေနပ်လိုက်ရပါတယ်။
