အင်္ဂလန်ဘဏ်ဟာ ဗြိတိန်ဘုရင် ချားလ်စ်ရဲ့ ရုပ်ပုံပါတဲ့ ငွေစက္ကူအသစ်ကို ဒီဇင်ဘာ ၁၉ ရက်က ထုတ်ဖော်ပြသခဲ့ပါတယ်။

နိုင်ငံရဲ့ ငွေစက္ကူလေးခုလုံးဖြစ်တဲ့ ၅ ပေါင်၊ ၁၀ ပေါင်၊ ပေါင် ၂၀ နဲ့ ပေါင် ၅၀ တန် ငွေစက္ကူတွေမှာ ဘုရင်ရဲ့ပုံကို ပြသထားတဲ့ နမူနာ ငွေစက္ကူအကြွေသစ်တွေရဲ့ ဓာတ်ပုံတွေကို ထုတ်ပြန်ခဲ့ပါတယ်။

ငွေစက္ကူအသစ်တွေဟာ ၂၀၂၄ ခုနှစ် နှစ်လယ်ပိုင်းမှာ လည်ပတ်နိုင်မယ်လို့ မျှော်လင့်ထားကြောင်း အင်္ဂလန်ဘဏ်က ပြောပါတယ်။

ဘုရင်မကြီး အဲလိဇဘက် ရုပ်ပုံပါတဲ့ လက်ရှိငွေစက္ကူတွေဟာ တရားဝင် သုံးစွဲလို့ရတဲ့ ငွေကြေးအဖြစ် ဆက်လက်တည်ရှိနေမှာဖြစ်ပြီး စုတ်ပြဲ ပျက်စီးသွားရင်တော့ ငွေကြေးလည်ပတ်မှုကနေ ဖယ်ရှားသွားမှာဖြစ်ကြောင်း ဘဏ်ကပြောပါတယ်။

ချားလ်စ်ဟာ သူ့ရဲ့မိခင် အဲလိဇဘက်ဘုရင်မကြီး နန်းသက် နှစ်ပေါင်း ၇၀ အကြာမှာ ကွယ်လွန်သွားပြီးနောက် စက်တင်ဘာလမှာ ဘုရင်ဖြစ်လာခဲ့ပါတယ်။

အင်္ဂလန်မြောက်ပိုင်းမှာ တော်ဝင်အခမ်းအနား ကျင်းပနေတဲ့ ဗြိတိန်ဘုရင် ချားလ်စ်နဲ့  ကြင်ယာတော်မိဖုရား ကမီလာတို့ဆီကို ကြက်ဥတွေနဲ့ ပစ်ပေါက်ခဲ့တဲ့ အမျိုးသားတယောက်ကို နိုဝင်ဘာ ၉ ရက်မှာ ဖမ်းဆီးထိန်းသိမ်းလိုက်ပါတယ်။

ယော့ခ်မှာကျင်းပတဲ့ ရိုးရာအခမ်းအနားကို ရောက်ရှိလာချိန် ဗြိတိန်ဘုရင်နဲ့ မိဖုရားဆီ ကြက်ဥ ၄ လုံးက ပျံဝဲကျော်လွန်သွားပြီး မြေကြီးပေါ် ကျကွဲသွားတာဖြစ်ပါတယ်။

ဒီအဖြစ်အပျက်ကြောင့် သူတို့ဟာ လှုပ်လှုပ်ရှားရှားဖြစ်ပုံမရဘဲ အခမ်းအနားကို ဆက်လက်လုပ်ဆောင်ခဲ့ပြီး ရဲအရာရှိတွေက ကြွေးကြော်သံတွေ အော်ဟစ်နေတဲ့ ဆန္ဒပြသူတယောက်ကို အမြန်ဆွဲထုတ်သွားပါတယ်။

လူအုပ်ထဲက တခြားသူတွေက သူ့ကို လှောင်ပြောင်ပြီး ဘုရားသခင်က ရှင်ဘုရင်ကို ကယ်တင်လိုက်ပြီလို့ ကြွေးကြော်ခဲ့ကြပါတယ်။

မယ်တော် အဲလိဇဘက်ဘုရင်မကြီး ကွယ်လွန်ပြီးနောက် စက်တင်ဘာလမှာ ထီးနန်း ဆက်ခံလာခဲ့တဲ့ ချားလ်စ်ဟာ အင်္ဂလန်မြောက်ပိုင်းကို ၂ ရက်ကြာ ခရီးလှည့်လည်နေတာပါ။

၂၀၂၂ ခုနှစ်က ဘုရင်မကြီးဟာ အင်္ဂလန်အလယ်ပိုင်း နော့တင်ဟမ်ကို သွားရောက်ချိန်မှာ အဲလိဇဘက်ရဲ့ တော်ဝင်ကားကို ကြက်ဥတွေ ပစ်ပေါက်ခံခဲ့ရဖူးပြီး ၁၉၉၅ ခုနှစ်က ဒပ်ဘလင်မြို့လယ်မှာ လမ်းလျှောက်နေတုန်း ဗြိတိန်ဆန့်ကျင်ရေးသမားတွေက ချားလ်စ်ကို ကြက်ဥတွေနဲ့ ပစ်ပေါက်ခဲ့ကြပါတယ်။