ယူကရိန်းသမ္မတ ဗိုလိုဒီမာ ဇလန်းစကီးဟာ ဗြိတိန်ဝန်ကြီးချုပ် ရီရှီဆူးနတ်ခ်နဲ့ရော ဗြိတိန်ဘုရင် ချားလ်စ်နဲ့ပါ ဖေဖော်ဝါရီ ၈ ရက်က တွေ့ဆုံခဲ့ပါတယ်။
ဇလန်းစကီးဟာ ရှားရှားပါးပါး နိုင်ငံခြားခရီးစဉ်အတွင်း ဗြိတိန်မြို့တော် လန်ဒန်ကို ရောက်လာပြီး ဝန်ကြီးချုပ်ကို ဒေါင်းနင်းလမ်းက ဝန်ကြီးချုပ်ရုံးမှာသွားရောက် တွေ့ဆုံခဲ့တာပါ။
ရုရှားရဲ့ထိုးစစ်ကို ခုခံရာမှာ ယူကရိန်းကိုကူညီဖို့ စစ်ဘက်ဆိုင်ရာ ပေးပို့ကူညီတာတွေ ချက်ချင်းတိုးလုပ်မယ်လို့ ဗြိတိန်က ကြေညာခဲ့ပါတယ်။ ဒါ့အပြင် ယူကရိန်းလေယာဉ်မှူးတွေကိုလည်း သင်တန်းပေးဖို့ ကတိပြုလိုက်ပါတယ်။
ရုရှားက ယူကရိန်းကို ကျူးကျော်အပြီး ဒီဇင်ဘာလက ဇလန်းစကီးဟာ အမေရိကန်နိုင်ငံဆီကို သွားခဲ့အပြီး အခု ဗြိတိန်ဟာ ဒုတိယ နိုင်ငံခြားခရီးစဉ်ပါ။
မွန်းလွဲပိုင်းမှာတော့ ဇလန်းစကီးဟာ ပြင်သစ်သမ္မတ အီမန်နျူရယ် မက်ခရွန်နဲ့ ဂျာမန်အဓိပတိ အိုလာ့ဖ် ရှို့လ်ဇ်တို့ကို ပြင်သစ်မြို့တော် ပါရီမှာ တွေ့ဆုံခဲ့ပါတယ်။
ဖေဖော်ဝါရီ ၉ ရက်မှာ ဇလန်းစကီးဟာ ယူကရိန်းကို ဥရောပသမဂ္ဂအဖွဲ့ဝင် ဖြစ်ခွင့်ပြုရေး ခြေလှမ်းတွေကို ပိုမြန်မြန်လှုပ်ရှားဖို့နဲ့ လက်နက်တွေ ပိုတပ်ဆင်ပေးရေး ဆွေးနွေးဖို့ ဥရောပသမဂ္ဂက ထိပ်သီးအစည်းအဝေး ကျင်းပနေတဲ့ ဘယ်လ်ဂျီယံမြို့တော် ဘရပ်ဆဲလ်ကို သွားမယ်လို့ ဥရောပသမဂ္ဂ သံတမန်တယောက်ကို ကိုးကားပြီး ရိုက်တာသတင်းဌာနက ထုတ်ပြန်ထားပါတယ်။
ဗြိတိန်ဘုရင် ချားလ်စ်ဟာ သူနဲ့ကွယ်လွန်သူဇနီး ဒိုင်ယာနာတို့ အရင်က အပိုင်စားထားတဲ့ ဝေးလ်စ်နယ်ရဲ့ ဝေလမင်းသားနဲ့ ဝေလမင်းသမီး ဘွဲ့ထူးဂုဏ်ထူးအား သားအကြီးဆုံး ဝီလျံနဲ့ ချွေးမ ကိတ်တို့ကို စက်တင်ဘာ ၉ ရက်က ချီးမြှင့်လိုက်ပါတယ်။
ကိတ်ဟာ ဝေလမင်းသမီး ဘွဲ့ထူးဂုဏ်ထူးနဲ့ ဆက်စပ်နေတဲ့ သမိုင်းကြောင်းကို တန်ဖိုးထားပေမယ့် သူကတော့ ဝေလမင်းသမီးအဖြစ် သူ့ကိုယ်ပိုင်လမ်းကြောင်းကို ဖန်တီးဖို့ ကြိုးစားမှာ ဖြစ်ကြောင်း တော်ဝင်သတင်းရင်းမြစ်တခုက ပြောပါတယ်။
မယ်တော် အဲလိဇဘက် ဘုရင်မကြီး ကွယ်လွန်ပြီးနောက် စက်တင်ဘာ ၈ ရက်က နိုင်ငံအတွက် ပထမဆုံးမိန့်ခွန်း ပြောကြားရာမှာ ချားလ်စ်ဘုရင်က ၁၉၅၈ ခုနှစ်ကတည်းက ချီးမြှင့်ခံခဲ့ရတဲ့ ဝေလမင်းသား ဘွဲ့ထူးဂုဏ်ထူးအား သူ့ရဲ့အမွေခံ ဝီလျံကို ပေးအပ်ချီးမြှင့်လိုက်ရတာ ဂုဏ်ယူမိကြောင်း ပြောသွားပါတယ်။
ဝေလမင်းသားနဲ့ မင်းသမီးအသစ်က “ကျနော်တို့ရဲ့ နိုင်ငံတော်ကိစ္စရပ်တွေကို ဆက်ပြီး ဦးဆောင် လှုံ့ဆော်ပေးပြီး အသေးအမွှားကနေ အရေးကြီး ကိစ္စရပ်တွေအထိ အကူအညီတွေပေးနိုင်မှာပါ” လို့ ပြောကြားပါတယ်။
အသက် ၄၀ အရွယ် ဝီလျံ နဲ့ ကိတ်တို့ နှစ်ဦးစလုံးဟာ လတ်တလောနှစ်တွေမှာ တော်ဝင်မိသားစုအတွင်း အဓိကကျတဲ့ အခန်းကဏ္ဍမှာရှိနေပြီး ပြည်သူတွေကြား တွေ့ရလေ့ရှိပြီး သူတို့ကလေး ၃ ယောက်ကိုလည်း အခုနှစ်အစောပိုင်းက ဘုရင်မကြီးရဲ့ ပလက်တီနမ်ရတုလို ပွဲလမ်းသဘင်တွေမှာ ခေါ်ဆောင်လာတတ်ကြပါတယ်။
