ရုရှားကျူးကျော်စစ်ကြီး ပြီးဆုံးတဲ့အခါ ယူကရိန်းပြန်လည်တည်ဆောက်ရေးအတွက် ရုရှားက ဒီအပေါ်မှာ ပြန်လည်ပေးချေရမယ်ဆိုတာနဲ့ ပတ်သက်ပြီး အနောက်မဟာမိတ်နိုင်ငံတွေ အနေနဲ့ သေချာမှုရှိအောင် စဉ်းစားဆောင်ရွက်သင့်တယ်လို့ ဗြိတိန်ဝန်ကြီးချုပ် ရီရှီ ဆူနက်ခ်က ဖေဖော်ဝါရီ ၁၈ ရက်မှာ တိုက်တွန်း လိုက်ပါတယ်။
“ရုရှားကို တာဝန်ယူမှု ရှိစေဖို့ ကမ္ဘာကြီးတစ်ခုလုံးက မဖြစ်မနေ လုပ်ဆောင်ရပါ လိမ့်မယ်၊ ဘူချာ၊ အာပင်၊ မာရီယူပေါလ် ဒါမှမဟုတ် ဘယ်နေရာမှာပဲဖြစ်ဖြစ် ရုရှားကျူးလွန်ခဲ့တဲ့ ရွံ့ရှာစက်ဆုပ် ဖွယ်ရာ စစ်ရာဇဝတ်မှုတွေအတွက် နိုင်ငံတကာ ရာဇဝတ်မှုတရားရုံး ICC ကတဆင့် တရားမျှတမှု ကို ကျနော်တို့ သေချာပေါက်မြင်တွေ့ရမှာပါ၊ ရုရှားရဲ့ ဆိုးဆိုးရွားရွား ဖျက်ဆီးမှုတွေကြောင့် ထိခိုက်ခံစားခဲ့ရတာတွေအတွက်လည်း လုံးဝတာဝန်ယူရမှာဖြစ်ပါတယ်။ ကျနော်တို့အနေနဲ့ လည်း ယူကရိန်းပြန်လည်ထူထောင်ရေးဆိုင်ရာ ညီလာခံကို လာမယ့်ဇွန်လအတွင်း လန်ဒန်မြို့မှာ ပြုလုပ်သွားမှာပါ၊ ဒါကြောင့် ဒီလို ပြန်လည်တည်ဆောက်ရေးအတွက် ရုရုားကပေးချေဖို့ သေချာမှု ရှိအောင် ကျနော်တို့ အတူတကွ စဉ်စားသင့်ပါတယ်”လို့ ဝန်ကြီးချုပ်က ပြောသွားတာပါ။
ဒီမိန့်ခွန်းကို နှစ်စဉ်ကျင်းပတဲ့ မြူးနစ်လုံခြုံရေး ဆိုင်ရာညီလာခံမှာ ဆူနက်ခ် က ပြောသွားတာဖြစ်ပြီး နိုင်ငံတကာအသိုက်အဝန်းအနေနဲ့လည်း ရုရှားရဲ့ရန်လိုမှုအပေါ် တုံ့ပြန်ရာမှာ ယေဘုယျအား ဖြင့် ခိုင်မာမှုမရှိသေးဘူးလို့ မှတ်ချက်ပြုပါတယ်။
“ယူကရိန်းလေယာဉ်မှူးတွေကို နေတိုးမဟာမိတ်အဖွဲ့စံနှုန်းတွေနဲ့အတူ နည်းဗျူဟာတွေကိုပါ စတင်လေ့ကျင့်ပေးနေပါပြီ။ ဒါက အရေးကြီးတယ်လို့လည်း ကျနော့်အနေနဲ့ ယူဆပါတယ်။ ပြီးတော့မှသာ ယူကရိန်းလုံခြုံရေးကို တိုးမြှင့်ဖို့အတွက် ရေရှည်နည်းလမ်းတွေအကြောင်း ကျနော်တို့ပြောကြတာပေါ့။ ဒါက ကျနော်တို့ စလုပ်နေတဲ့အရာတွေပါ။ တခြားနိုင်ငံတွေ အနေနဲ့လည်း လိုက်ပါလာလိမ့်မယ်လို့ ကျနော်ကတော့ မြင်ပါတယ်”လို့ ဝန်ကြီးချုပ်ဆူနက်ခ်က ပြောခဲ့ပါတယ်။
ယူကရိန်းသမ္မတ ဗိုလိုဒီမာ ဇလန်းစကီးဟာ ဗြိတိန်ဝန်ကြီးချုပ် ရီရှီဆူးနတ်ခ်နဲ့ရော ဗြိတိန်ဘုရင် ချားလ်စ်နဲ့ပါ ဖေဖော်ဝါရီ ၈ ရက်က တွေ့ဆုံခဲ့ပါတယ်။
ဇလန်းစကီးဟာ ရှားရှားပါးပါး နိုင်ငံခြားခရီးစဉ်အတွင်း ဗြိတိန်မြို့တော် လန်ဒန်ကို ရောက်လာပြီး ဝန်ကြီးချုပ်ကို ဒေါင်းနင်းလမ်းက ဝန်ကြီးချုပ်ရုံးမှာသွားရောက် တွေ့ဆုံခဲ့တာပါ။
ရုရှားရဲ့ထိုးစစ်ကို ခုခံရာမှာ ယူကရိန်းကိုကူညီဖို့ စစ်ဘက်ဆိုင်ရာ ပေးပို့ကူညီတာတွေ ချက်ချင်းတိုးလုပ်မယ်လို့ ဗြိတိန်က ကြေညာခဲ့ပါတယ်။ ဒါ့အပြင် ယူကရိန်းလေယာဉ်မှူးတွေကိုလည်း သင်တန်းပေးဖို့ ကတိပြုလိုက်ပါတယ်။
ရုရှားက ယူကရိန်းကို ကျူးကျော်အပြီး ဒီဇင်ဘာလက ဇလန်းစကီးဟာ အမေရိကန်နိုင်ငံဆီကို သွားခဲ့အပြီး အခု ဗြိတိန်ဟာ ဒုတိယ နိုင်ငံခြားခရီးစဉ်ပါ။
မွန်းလွဲပိုင်းမှာတော့ ဇလန်းစကီးဟာ ပြင်သစ်သမ္မတ အီမန်နျူရယ် မက်ခရွန်နဲ့ ဂျာမန်အဓိပတိ အိုလာ့ဖ် ရှို့လ်ဇ်တို့ကို ပြင်သစ်မြို့တော် ပါရီမှာ တွေ့ဆုံခဲ့ပါတယ်။
ဖေဖော်ဝါရီ ၉ ရက်မှာ ဇလန်းစကီးဟာ ယူကရိန်းကို ဥရောပသမဂ္ဂအဖွဲ့ဝင် ဖြစ်ခွင့်ပြုရေး ခြေလှမ်းတွေကို ပိုမြန်မြန်လှုပ်ရှားဖို့နဲ့ လက်နက်တွေ ပိုတပ်ဆင်ပေးရေး ဆွေးနွေးဖို့ ဥရောပသမဂ္ဂက ထိပ်သီးအစည်းအဝေး ကျင်းပနေတဲ့ ဘယ်လ်ဂျီယံမြို့တော် ဘရပ်ဆဲလ်ကို သွားမယ်လို့ ဥရောပသမဂ္ဂ သံတမန်တယောက်ကို ကိုးကားပြီး ရိုက်တာသတင်းဌာနက ထုတ်ပြန်ထားပါတယ်။
