လီဗာပူးနည်းပြဟောင်း ဘင်နီတက်ဇ်က တိုက်စစ်မှူးဒါဝင်နူနက်ဇ်ကို တချိန်က တိုက်စစ်မှူး ဖာနန်ဒိုတောရက်စ်နဲ့ နှိုင်းယှဉ်ချီးကျူးသွားပါတယ်။

ဥရုဂွေးတိုက်စစ်မှူးဟာ နယူးကာဆယ်ကို အနိုင်ရခဲ့တဲ့ ပွဲစဉ်မှာ ပရီးမီးယားလိဂ်မှာ ၆ ဂိုးမြောက်ဂိုးသွင်းယူနိုင်ခဲ့ပြီး ခြေစွမ်းပြခဲ့ပါတယ်။

အဲဒီပွဲစဉ်ကို စကိုင်းစပေါ့ကနေ သုံးသပ်တင်ဆက်ခဲ့တဲ့ နည်းပြဟောင်း ဘင်နီတက်ဇ်ကတော့ နူနက်ဇ်ဟာ ဖာနန်ဒိုတောရက်စ် လီဗာပူးအသင်းဆီရောက်လာချိန်ကလိုဖြစ်ပြီး တချိန်မှာ တောရက်စ်လို တိုက်စစ်မှူးဖြစ်လာလိမ့်မယ်လို့ ချီးကျူးသွားခဲ့တာပါ။

တောရက်စ်ဟာ လီဗာပူးအသင်းဆီရောက် လာချိန်က နူနက်ဇ်လိုပဲ အကောင်းဆုံး အဆုံးသတ်ဂိုးသွင်းနိုင်သူမဟုတ်ခဲ့ကြောင်း၊ အသင်းနဲ့အတူ သေချာ အံဝင်လာတဲ့အချိန်မှာတော့ အားလုံးသိကြတဲ့ တောရက်စ်ဆိုပြီးဖြစ်လာခဲ့ကြောင်း၊ နူနက်ဖ်ဟာလည်း တောရက်စ်လို တိုက်စစ်မှူးဖြစ်လာနိုင်ကြောင်း ဘင်နီတက်ဇ်က ချီးကျူးခဲ့တာဖြစ်ပါတယ်။ 

အဲဗာတန်အသင်းနဲ့ လမ်းခွဲခဲ့ရတာဟာ ဘဏ္ဍာရေး အခက်အခဲတွေနဲ့ ဒဏ်ရာရ ကစားသမားတွေကြောင့် ဖြစ်တယ်လို့ နည်းပြဘင်နီတက်ဇ်က အကြောင်းပြချက်ပေးသွားပါတယ်။

ဘင်နီတက်ဇ်ဟာ ပရီးမီးယားလိဂ်နောက်ဆုံး ၁၃ ပွဲမှာ ၁ ပွဲသာအနိုင်ရခဲ့ပြီး နောဝှစ်ချ်နဲ့ ပြီးခဲ့တဲ့တစ်ပတ်ကပွဲစဉ်မှာ ရှုံးပွဲထပ်တွေ့ခဲ့ပြီးနောက် ရာထူးကနေ ထုတ်ပယ်ခံခဲ့ရပါတယ်။

အသင်းကို စတင်ရောက်ရှိခဲ့ချိန်ကစတင်ပြီး အစွမ်းကုန်ကြိုးစားခဲ့သလို ရလဒ်ကောင်းဖို့တင်မဟုတ်ဘဲ ပရိသတ်တွေရဲ့ရင်ထဲအထိ ရောက်ဖို့လည်း ကြိုးပမ်းကစားစေခဲ့တယ်လို့ ဘင်နီတက်ဇ်က ပြောပါတယ်။

“ဒဏ်ရာရ ကစားသမားတွေ ပြန်ကောင်းလာမယ်။ ပြီးတော့ ကစားသမားသစ်တွေ ရောက်လာမယ်ဆိုရင် အခုထက်ပိုကောင်းတဲ့ခြေစွမ်းရမယ်ဆိုတာ သိပါတယ်။ ဒီနေ့ခေတ်မှာ ရလဒ်ကောင်း ချက်ချင်းရယူမပေးနိုင်ဘူးဆိုရင် စိတ်ရှည်မပေးတတ်ကြတာက ဝမ်နည်းစရာဖြစ်တယ်” ဘင်နီတက်ဇ်က ပြောပါတယ်။

ဘင်နီတက်ဇ်နေရာမှာဆက်ခံဖို့ အဲဗာတန်အသင်းက နည်းပြသစ်ရှာဖွေနေပြီး အသင်းနည်းပြဟောင်း လက်ရှိ ဘယ်လ်ဂျီယံ လက်ရွေးစင်နည်းပြ မာတီနက်ဇ်ကို ပြန်ခေါ်ဖို့ချိတ်ဆက်နေတယ်လို့ သိရပါတယ်။