ရိုဟင်ဂျာတွေ အမြောက်အမြား ထွက်ပြေးခဲ့ရတဲ့ ပြဿနာမျိုး နောက်ထပ်ဖြစ်လာဖို့ အလားအလာရှိတဲ့ တင်းမာမှုတွေဖြစ်နေတဲ့ မြန်မာနိုင်ငံနယ်စပ်မှာ ဘင်္ဂလားဒေ့ရှ် ပြည်ထဲရေးဝန်ကြီးဌာနက အဆင့်မြင့်ဒရုန်းတွေကို နေရာချထားတယ်လို့ The Defense Post သတင်းမှာ ဖော်ပြထားပါတယ်။

ဘင်္ဂလားဒေ့ရှ် ပြည်ထဲရေးဝန်ကြီးဌာနက ကမ်းရိုးတန်းစောင့် စိန့်မာတင်စခန်းနဲ့ ဘင်္ဂလားဒေ့ရှ် နယ်ခြားစောင့်တပ်ဖွဲ့စခန်းတွေမှာ နယ်စပ်လုံခြုံရေး စောင့်ကြည့်ဖို့ ဒရုန်းတွေ ပို့ဆောင်နေရာချထားတယ်လို့  The Daily Star သတင်းမှာလည်း ဖော်ပြခဲ့ပါတယ်။

လွှတ်တော်စောင့်ကြည့်အဖွဲ့ ခေါင်းဆောင် ဘနာဇီရာအာမက်က “နယ်စပ်တွေမှာ ဒရုန်းတွေနဲ့ စောင့်ကြည့်ဖို့ ကျနော်တို့က အကြံပေးတိုက်တွန်းခဲ့ပါတယ်။ ဒရုန်းနဲ့ စောင့်ကြည့်တာတွေကို ဘာစန်ချာ အပါအဝင် ရိုဟင်ဂျာဒုက္ခသည်တွေ နေထိုင်ရာဒေသတွေမှာ တပ်ဆင် နေရာချထားပြီးပါပြီ” လို့  ပြောပါတယ်။ 

ပြီးခဲ့တဲ့ ဩဂုတ်လလယ်လောက်က ဘင်္ဂလားဒေ့ရှ်နယ်နိမိတ်အတွင်းကို မြန်မာနိုင်ငံဘက်က ပစ်ခတ်လိုက်တဲ့ မော်တာကျည်တွေ အကြိမ်ကြိမ်ကျရောက်ခဲ့ပြီးနောက်မှာ နှစ်နိုင်ငံကြား ဆက်ဆံရေးတင်းမာခဲ့ပါတယ်။

နယ်စပ်ဖြတ်ကျော် ကျရောက်လာတဲ့ မော်တာကျည်တလုံးကြောင့် ဆယ်ကျော်သက်အရွယ် ရိုဟင်ဂျာ လူငယ်တစ်ဦးကို ထိမှန်သေဆုံးခဲ့ရပြီး ဘန်ဒါဘန်ဒေသအနီးက နောက်ထပ် ခြောက်ဦးလည်း ဒဏ်ရာရရှိခဲ့ကြတယ်လို့ ဆိုပါတယ်။

မော်တာကျည်ကျရောက်ခဲ့တဲ့ ဒေသဝန်းကျင်မှာ ၂၀၁၇ ခုနှစ်က မြန်မာစစ်တပ်ရဲ့ ဖြိုခွင်းနှိပ်ကွပ်မှုကြောင့် ထွက်ပြေးလာခဲ့ရတဲ့ ရိုဟင်ဂျာ ၄၀၀၀ လောက် နေထိုင်နေကြပါတယ်။။ 

မြန်မာစစ်တပ်ဘက်က ပစ်ခတ်တဲ့ကျည်တွေ ဘင်္ဂလားဒေ့ရှ်နိုင်ငံပိုင်နက်ထဲကို အကြိမ်ကြိမ် ဝင်ရောက်မှုကြောင့် ဘင်္ဂလားဒေ့ရှ်နိုင်ငံခြားရေးဝန်ကြီးက မြန်မာစစ်ကောင်စီရဲ့ သံအမတ်ကို ဆင့်ခေါ်သတိပေးခဲ့ရတာ ဩဂုတ်လနောက်ပိုင်းမှာ လေးကြိမ်ရှိခဲ့ပါတယ်။ 

အငြိမ်းစားရေတပ်ဗိုလ်ချုပ်ဖြစ်သူ ဘင်္ဂလားဒေ့ရှ် နိုင်ငံခြားရေးဝန်ကြီးဌာနရဲ့ ရေတပ်ပိုင်းဆိုင်ရာ အတွင်းရေးမှူး ခါရှိတ်အလမ်က “လေပိုင်နက်နဲ့ မြေပိုင်နက်ဆိုင်ရာ စည်းကမ်းချက်တွေ ဖောက်ဖျက်ကျူးလွန်တာနဲ့ ပတ်သက်ပြီး ကျနော်တို့ဘက်က ပြင်းပြင်းထန်ထန် ကန့်ကွက်တဲ့စာ ပေးပို့ခဲ့ပါတယ်။ ဒီလိုဖြစ်ရပ်မျိုးတွေကို အကြိမ်ကြိမ်လက်ခံနိုင်မှာ မဟုတ်တဲ့အကြောင်းကိုလည်း မြန်မာဘက်ကို သတိပေးခဲ့ပါတယ်” လို့ ပြောပါတယ်။

ရခိုင်တပ်မတော်နဲ့ မြန်မာစစ်တပ်ကြားက ပဋိပက္ခဟာ မြန်မာနိုင်ငံရဲ့ ပြည်တွင်းရေးကိစ္စသာ ဖြစ်တာကြောင့် ဘယ်လိုဖြေရှင်းမယ်ဆိုတာ မြန်မာနိုင်ငံဘက်က စိတ်တိုင်းကျရွေးချယ် ဆုံးဖြတ်ရမှာဖြစ်ပေမဲ့ ဘင်္ဂလားဒေ့ရှ်ဘက်ကိုတော့ လက်နက်ကျည်ဆန်တွေ လာကျလို့ မရဘူး။ ကျလာခဲ့ရင် အဲဒီအတွက် တာဝန်ယူရမယ်လို့လည်း ရေတပ်ကျွမ်းကျင်သူက ပြောပါတယ်။ 

ဩဂုတ်လ အစပိုင်းတည်းကနေ ရခိုင်းပြည်နယ် မြောက်ပိုင်းနဲ့ ချင်းပြည်နယ်ဘက်မှာ ကျက်စားနေတဲ့ ရခိုင့်တပ်မတော်နဲ့ မြန်မာစစ်တပ်တို့ တိုက်ပွဲတွေ ပြင်းပြင်းထန်ထန် ဖြစ်ပွားနေတာလို့ The Defence Post  သတင်းမှာ ဖော်ပြထားပါတယ်။

ဘင်္ဂလားဒေ့ရှ်-မြန်မာနယ်စပ်မှာ  အမေရိကန်ဒေါ်လာ ၁ ဒသမ ၃ သန်းတန်ကြေးရှိတဲ့ မူးယစ်ဆေးဝါးတွေကို ဘင်္ဂလားဒေ့ရှ် နယ်ခြားစောင့်တပ်ဖွဲ့က ဖမ်းဆီးရမိခဲ့တယ်လို့ သတင်းထုတ်ပြန်ပါတယ်။

ခုလိုဖမ်းဆီးရမိမှုဟာ မြန်မာနိုင်ငံနဲ့ နယ်စပ်ခရိုင်တခုဖြစ်တဲ့ ဘင်္ဂလားဒေ့ရှ်နိုင်ငံ အရှေ့တောင်ပိုင်း ကမ်းရိုးတန်း ကော့ဇ်ဘဇားခရိုင် နေရာ ၂ ခုမှာ သီးခြားဖမ်းမိခဲ့တာဖြစ်တယ်လို့ ဘင်္ဂလားဒေ့ရှ် နယ်ခြားစောင့်တပ်ဖွဲ့မှ ဒုဗိုလ်မှူးကြီး ဖိုက်ဇာ ရာမန်က ပြောပါတယ်။

ပြီးခဲ့တဲ့ အောက်တိုဘာ ၈ ရက်က မူးယစ်ဆေးဝါး တရားမဝင်သယ်ဆောင်လာသူ ၂ ယောက်ဟာ မြန်မာဘက်ကနေ နတ်မြစ်ကို ကူးဖြတ်ပြီးတော့ နိုင်ငံတွင်းဝင်ရောက်လာဖို့ ကြိုးပမ်းခဲ့တာဖြစ်ပြီး နယ်ခြားစောင့် လုံခြုံရေးတပ်ဖွဲ့က လိုက်လံဖမ်းဆီးခဲ့ချိန်မှာတော့ မြန်မာဘက်ကို ပြန်လည်ထွက်ပြေးသွားခဲ့ကြတယ်လို့ ထုတ်ပြန်ချက်မှာဖော်ပြပါတယ်။

ဒါပေမဲ့ သူတို့နဲ့အတူ ပလတ်စတစ်အိတ်ထဲမှာ ထည့်သွင်း သယ်ဆောင်လာခဲ့တဲ့ ခရစ္စတယ် မက်သဖက်တမင်းအိုက်စ် မူးယစ်ဆေးပြား(ယာဘ) အလုံး ၃၀,၀၀၀ ကိုတော့ ဖမ်းဆီးရမိခဲ့တယ်လို့ ဆိုပါတယ်။

ဘင်္ဂလားဒေ့ရှ် နယ်ခြားစောင့် တပ်ဖွဲ့ဟာ ဒီအရင် အောက်တိုဘာ ၆ ရက်တုန်းကလည်း ယာဘမူးယစ်ဆေးပြား အလုံး ၅၀,၀၀၀ ကို ဖမ်းဆီးရမိခဲ့ပြီး ဖမ်းဆီးမှု ၂ ခုပေါင်းမှာ တန်ကြေးအမေရိ ကန်ဒေါ်လာ ၁ ဒသမ ၃ သန်းရှိတယ်လို့ ထုတ်ပြန်ချက်ထဲမှာ ဖော်ပြပါတယ်။

အဆိုပါ ဖမ်းဆီးရမိမှုမှာတော့ တက်ခ်နာ့ဖ်ဒေသတွင်းက စစ်ဆေးရေးဂိတ်တခုမှာ မှောင်ခိုသမား ၂ ယောက်ကို စစ်ဆေးဖို့ အချက်ပြခဲ့ပေမယ့် မူးယစ်ဆေးပြားတွေကိုသာ ဖမ်းဆီးရမိခဲ့ပြီး သူတို့ကိုတော့ မဖမ်းဆီးနိုင်ခဲ့ဘဲ လွတ်မြောက်သွားခဲ့တယ်လို့ ဆိုပါတယ်။

မူးယစ်ဆေးဝါးတွေရဲ့ တန်ကြေးသတ်မှတ်ချက်ကိုတော့ ဘင်္ဂလားဒေ့ရှ်နိုင်ငံ မူးယစ်ဆေးဝါးထိန်းချုပ်ရေးဦးစီးဌာနရဲ့ လမ်းညွှန်ချက်နဲ့အညီ နိုင်ငံတကာနဲ့ ပြည်တွင်းဈေးကွက်တွေကို အကဲဖြတ်ပြီးနောက် မူးယစ်ဆေးဝါးတန်ဖိုး ဘယ်လောက်ရှိနိုင်တယ် ဆိုတာကို ဆုံးဖြတ်တယ်လို့ ဒုဗိုလ်မှူးကြီး ဖိုက်ဇာက ပြောပါတယ်။

Ref-Yenisafak