ဂျာမနီနိုင်ငံ မြို့တော်ဘာလင်မှာ အများပြည်သူဝန်ဆောင်မှုကဏ္ဍတွေဖြစ်တဲ့ ဆေးရုံ၊ မီရထားစနစ်၊ စာပို့ဝန်ဆောင်မှုနဲ့ ရေပေးဝေရေးဌာနတွေက အလုပ်သမား ၅၀၀၀၀ လောက်ဟာ လုပ်ခလစာ တိုးမြှင့်ရရှိရေးအတွက် မတ် ၂၅ ရက်က အထင်ကရ ဘရန်ဒန်ဘာ့ဂ်ဂိတ်မှာ စုစည်းဆန္ဒပြခဲ့ကြပါတယ်။ 

ဒီဆန္ဒပြပွဲကို အလုပ်သမားသမဂ္ဂ ၃ ဖွဲ့က ပူးပေါင်းလုပ်ဆောင်ခဲ့တာဖြစ်ပြီး ငွေကြေးဖောင်းပွမှု မြင့်တက်လာတာနဲ့အမျှ လူအများစုအတွက် နေထိုင်မှုစရိတ်ကလည်း တိုးမြင့်လာခဲ့တယ်လို့ ဆန္ဒပြသူတွေက ပြောပါတယ်။ 

ဒါကြောင့် လစာတိုးမြှင့်ပေးဖို့နဲ့ နေထိုင်ငှားရမ်းစရိတ် လျှော့ချပေးဖို့ တောင်းဆိုခဲ့ကြတဲ့အပြင် လာမယ့် တနင်္လာနေ့စပြိး နောက်ထပ်သပိတ်မှောက်ဆန္ဒပြဖို့အတွက် စီစဉ်ထားတယ်လို့လည်း သိရပါတယ်။ 

ဒီလို သပိတ်မှောက်ဆန္ဒပြမှုကြောင့် မီးရထား၊ လေကြောင်းနဲ့ မြို့တွင်းသယ်ယူပို့ဆောင်ရေး စနစ်တွေအပြင် ဆေးဘက်ဆိုင်ရာဝန်ဆောင်မှု ကဏ္ဍတွေမှာလည်း သက်ရောက်မှု ရှိလာနိုင်ပါတယ်။ 

“ဒီနေ့ ကျနော်တို့ ဆန္ဒပြရတာဟာ ဘာလင်ရဲ့ နေထိုင်စားသောက်မှုစရိတ်က လူအများစုအတွက် အလွန်ဈေးကြီးနေပြီး ကျနော်တို့ ဒီဝင်ငွေနဲ့တင် ရှင်သန်နေထိုင်ဖို့ ခက်ခဲလာတာကြောင့် ဖြစ်ပါတယ်” လို့ EVG အလုပ်သမားသမဂ္ဂရဲ့ ဘာလင်နယ်မြေဥက္ကဋ္ဌ မိုက်ကယ် ဘာတယ်က မှတ်ချက်ပေးပါတယ်။ 

မကြာသေးခင်က ဂျာမနီနိုင်ငံတဝန်းမှာ မတူညီတဲ့လုပ်ငန်းတွေပါဝင်တဲ့ သပိတ်မှောက် ဆန္ဒပြမှုတွေလည်း ဆက်တိုက် ဖြစ်ပွားခဲ့ပါသေးတယ်။ 

ဂျာမနီအစိုးရကတော့ စေ့စပ်ညှိနှိုင်းမှုကတဆင့် ဘုံသဘောတူညီနိုင်မယ့် အဖြေရှာဖို့ အပါအဝင် ပြည်သူလူထုရဲ့ နေ့စဉ်ဘဝမှာ သက်ရောက်မှုလျှော့ချဖို့အတွက်လည်း အဖွဲ့အစည်းအသီးအသီးကို တောင်းဆိုခဲ့ပါတယ်။ 

ယူကရိန်း-ရုရှားအကြား စစ်ရေးပဋိပက္ခ စတင်ဖြစ်ပွားစဉ်ကတည်းက အမေရိကန်နဲ့အတူ နောက်ပိုင်းမှာ ဥရောပနိုင်ငံတွေကလည်း ရုရှားအပေါ် အရေးယူပိတ်ဆို့မှု အများအပြား ချမှတ်လာခဲ့ပြီး ဒီလိုအရေးယူပိတ်ဆို့မှုတွေရဲ့ ဆိုးကျိုးအဖြစ် ငွေကြေးဖောင်းပွမှု မြင့်တက်လာရာ က အလုပ်ရှင်တွေနဲ့ သမဂ္ဂတွေအကြား ပိုမိုတင်းမာလာခဲ့ကြတာ ဖြစ်ပါတယ်။ 

ဂျာမနီနိုင်ငံ ဘာလင်မြို့ရှိ ဗြိတိန်သံရုံးကနေ လျှို့ဝှက်အချက်အလက်တွေ စုဆောင်းပြီး ရုရှားနိုင်ငံဆီ ပေးပို့ခဲ့တဲ့ လုံခြုံရေးအစောင့်က သူ လုပ်ခဲ့တဲ့ လုပ်ရပ်တွေအတွက် ရှက်ရွံ့မိကြောင်း ဖေဖော်ဝါရီ ၁၄ ရက်က လန်ဒန်တရားရုံးမှာ ထွက်ဆိုခဲ့ပါတယ်။

အသက် ၅၉ နှစ်အရွယ် ဒေးဗစ်ဘော်လန်တိုင်းန်စမစ်သ်က သူဟာ သူ့လုပ်ဖော်ကိုင်ဖက်တွေနဲ့ အငြင်းပွားပြီး စိတ်ဓာတ်ကျနေချိန်မှာ သံရုံးကို နည်းနည်းလောက် ပညာပေးမယ်ဆိုပြီး လျှို့ဝှက်အချက်အလက်တွေကို စတင်စုဆောင်းခဲ့ကြောင်း ပြောပါတယ်။

စမစ်သ်ဟာ ရုရှားစစ်ထောက်လှမ်းရေးအဖွဲ့ဝင်တဦးအဖြစ် ပုံဖမ်းထားတဲ့ ယူကေ လျှို့ဝှက်ထောက်လှမ်းရေးအေဂျင်စီ MI5 အရာရှိတဦးဖြစ်တဲ့ Irina  နဲ့ တွေ့ဆုံပြီး နောက်နေ့ ၂၀၂၁ ခုနှစ် သြဂုတ်လမှာ ဖမ်းဆီးခံခဲ့ရတာပါ။

Irina က ရုရှားကို ထိခိုက်စေနိုင်တဲ့ သတင်းကို တယောက်ယောက်က ဗြိတိန်ကို ပေးပို့ခဲ့တာကြောင့် သူ အကူအညီလိုကြောင်း စမစ်သ်ကို ပြောကြားခဲ့တယ်လို့ ဆိုပါတယ်။

စမစ်သ်ဟာ နိုင်ငံတော်လျှို့ဝှက်ချက် အက်ဥပဒေနဲ့ ပြစ်မှု ၈ ခုမှာ အပြစ်ရှိကြောင်း နိုဝင်ဘာလက ဝန်ခံခဲ့ပါတယ်။ အဲဒီစွဲချက်တွေထဲမှာ ၂၀၂၀ ပြည့်နှစ် နိုဝင်ဘာလက ဘာလင်ဆိုင်ရာ ရုရှားစစ်သံမှူး ဗိုလ်ချုပ်ကြီး ဆာဂေး ချူခရော့ဗ်ဆီကို သတင်းအချက်အလက်တွေ ပေးပို့တာနဲ့ ပတ်သက်တဲ့ စွဲချက်တခုလည်း ပါဝင်ပါတယ်။

တခြားတရားစွဲဆိုမှု ၇ ခုထဲမှာ ရုရှားနိုင်ငံအတွက် အသုံးဝင်မယ့် သတင်းအချက်အလက်တွေ စုဆောင်းတာတွေ ပါဝင်ပြီး အဲဒီထဲက ၄ မှုဟာ ဗြိတိန်ကို အကူအညီပေးနေတယ်လို့ ယူဆရတဲ့ ရုရှားနိုင်ငံသား “ဒီမီထရီ” အဖြစ် ပုံဖမ်းထားတဲ့ MI5 အရာရှိတဦးနဲ့ ဆက်စပ်နေပါတယ်။

စမစ်သ်ဟာ အစိုးရအဖွဲ့ ဝန်ကြီး ၂ ဦးဆီက ဝန်ကြီးချုပ် ဘောရစ်ဂျွန်ဆင်နဲ့ လျှို့ဝှက် အစိုးရဆက်သွယ်မှု အပါအဝင် တခြား အရေးကြီးစာရွက်စာတမ်းတွေကို ၃ နှစ်ကျော် စုဆောင်းခဲ့ကြောင်း ဖေဖော်ဝါရီ ၁၃ ရက်မှာ တရားရုံးက ကြားနာခဲ့ပါတယ်။

သူဟာ ဘီယာ ၇ ပိုင့် သောက်ပြီးနောက် စာရွက်စာတမ်းတွေကို ရိုက်ကူးခဲ့တာဖြစ်ပြီး အဲဒီတုန်းက အကြံကောင်းတခုလို့ ထင်ခဲ့မိကြောင်း စမစ်သ်က အင်္ဂါနေ့မှာ ပြောပါတယ်။ ဒါပေမဲ့ သူဟာ ဗြိတိန်ကို သိသိသာသာကြီး ထိခိုက်စေမယ့် တခြားဘယ်သူ့ကိုမှ စာရွက်စာတမ်းတွေကို မလွှဲပေးခဲ့ဘူးလို့ ပြောသွားပါတယ်။